Глава 27
О сем яко подобает по вся воскресныя дни на утрени и во всю Светлую Неделю прикладоватися ко Кресту Господню
Еще подобает всем православным християном целовати всеусердно Крест Господень на утрени после Евангелия аще идеже бывает славословие, сиречь служба. Аще ли же и кроме службы идеже по Псалтыри стоят и тамо по триех кафизмах кадити, и Крест Господень положити на Евангелие или на иную книгу и приложитися Кресту Господню. И потом останныя две кафизмы дочитати. Аще ли где и молитвами стоят и тысячу молитв отстояти и потом кадити, Крест Господень положити на плат, на место чисто, и целовати, и оставшия пять лестовок достояти. Тако же и на Светлой Недели подобает после Утрени и после часов и после вечерни целовати Крест Господень, прикладовати же ся подобает ко Кресту со страхом и радостию, страхом греха ради.
Яко не достоини сущее, радость подобает Церкви Божия всем православным християном Крест Господень лобызати и прочия святыя иконы. Целовати же Крест Господень тако подобает – Аще на Светлой Недели точию прекрестившеся приложитися и потом поклон поясной положити. Аще в прочия недели, то сперва пред целованием два поклона до земли положити и приложитися ко Кресту и паки земный поклон положити и проститися к настоятелю и ко братии. Но точию подобает чистым в чистоте приступати и целовати Крест сие бо есть Святыя Божия Церкви предание. Подобает опасно соблюдати и не зрети на оных, иже сего не сотворяют, но слушати и повиноватися наставником и учителем, на всякое дело благо нас научающих. Сице бо и уста святоотеческие (Иосиф Патриарх, Октаи в предисловии) всем православным християном повелевает Крест Господень целовати.
Глава 28
О сем яко не подобает святых икон променивати мирским
Святых образов письменных и меднолитных християнскаго дела, в мире живущим, сиречь мирским человеком в ереси пребывающим, не променивати. Понеже в домы их ходят попы, и окропление сотворяют и молебствуют по своей ереси скверной. И сего ради невозможно бытии Христу с Велиаром. Понеже писано есть: (Соборник малый) «Яко же еретицы служат Отцу своему Диаволу и во всем Богови противятся». «И паки другое Писание сему подобно сказует: «Аще нечестивии держат место, да бегаеши от него». Яко же преподобнии и святители освящают, тако нечестивии оскверняют. Того ради неподобает святыни предавати псом. Сиречь святых икон променивати им, но блюсти опасно и хранитися от них, да некако возмездие за сие примем от Господа. Но аще неции от еретик восхотят получити себе от християн святыя иконы, и аще обещаются обратится в закон християнский и принятии веру благочестиву. Тако же и святыя иконы опасно соблюдати от еретик. И се да будет подобно, яко же и царю Константину еще в неверии сущу предаде ему Вседержитель Господь Крест Свои видети на небеси. Еще сущу неверну тому и не имущу закона Божия. И повеле ему Крест сотворенный по образу явльшегося Креста на небеси пред полками своими носити. Подобно и образ нерукотворенныи посла Господь ко Авгарю, еще погану сущу тому. Тако же и великомученице Екатерине еще неверной и не крещенной даде святыи старец образ Пресвятыя Богородицы для уловления в веру. Сице и иная многая Святая Писания являет. Но обаче вси си приимши образ Господа и прияша веру благочестивую. Сице и ныне аще необещаются приятии Закон Божий, тем никако же променивати святыя иконы, но соблюдати их опасно. А который аще преслушницы будут святоотеческому взаконению, и будут променивати всем без разделу и таковых подобает от братии отлучати, предлагая ему от книги преподобнаго Никона Черныя Горы слово 67. Но точию тем подобает предавати святыя иконы, аще желают приити ко благочестию и закон Божий прияти неотложно.
Глава 29
О сем яко не подобает без обещания в Закон Божий приимати
Подобает же и се утвержение веры християнския творити всем воспринимающим в Закон Божий и хотящих приити в веру Христову. Первое возвести ему все житие християнское поряду, да бы наперед слышал каково житие християнское. Первое сие да возвещано будете егда хощет сотворити обещание пред Господем Богом, что бы с детми женатыми и с дочерми замужными не житии, но во особой храмине пребывати и пищу самому про себя готовити.
А работати вместе не возбраняем, и в гости к мирским не ходити и на поседки тако же не ходити. И в бани с ними не парится и из сосудов их не мытися. На праздники же их не ходити, аще и сродницы тамо есть. Хмельнаго пития не питии и мясо тако же не ясти, лишения ради пречистых Божиих Таин. И с торжища что не купити: рыбы или масла или соль или сосуды или ино что потребное, молитися Господу Богу. И освящение просити за всяко брашно сиречь: лествицу молитися и за кладезную воду такожде молитися. Того ради что ходят по воду вси мирстии и с рук их вода в кладезь течет. Тако же и о правиле келейном и церковном крузе все наперед возвестити. И о постех и о среде и пятке сказати како поститися и одежу свою мирскую пременити. И между порами до обеда или после обеда до ужина нимало ничего ни вкусити.
Тако же и на поле или во огороде никаковаго овоща, ни малыя крупицы ни коснутися. Ни ягод в лесу ни вкушати. Тако же и питии днем не часто, но единова или дважды. Такоже и праздники Господни и Воскресныя дни всячески богоугодно подобает празновати и пред праздником и пред воскресением поздно не работати, но рано всякое дело оставляти.
И к ворожбам не ходити. И мирских людей умирающих до церкви их не провожати. И матерскими брани не бранитися, не иными какими скверными словесы сваритися. Но и песен бесовских не токмо не пети, но и не слушати. На скачки и пляски и на свадьбы не взирати. Но и мылом лица своя не измывати. И не советовати младым людем женитися или замуж идти.
А паче же всего наказывати младым людем приходящим в веру друг со другом не ложитися вместе и не оскрвенитися никакоже. Но чисто и сохранно и целомудренно житии. Но и не женатым людем приходящим к вере тоже наказовати, что бы им пребывати во святей вере, твердо и крепко и сохранно во всем житии пребывание имети.
Еще же им тогда же возвещати и сим устрашати и души их соблюдати и епитемии сказати, за кииждо грех полагаемыя. Еще же возвещати и то, что бы к раздорником и не согласникам с вами не слушати, и не прелщатися никакоже лестными их словесы. И аще сия вся сотворити и сохранити обещаются и таковых с любовию приимати и Святым Писанием укрепляти и о душах их попечение имети и к подвигу укрепляти и к посту, и к молитвам наставляти. А паче же мужа и жену младых сущих целомудрию и чистоте поучати и обещания от них изтязовати. Яко же глаголет Василий Великий правило 19 лист 332. «Отрицаяися мира, вопрошен да будет, аще может без жены терпети, и яве да исповесть. Да егда отвержется запрещение приимет. Мужей отрицающихся брака и девствовати изволивших, подобно есть вопрошати их страны тоя епископу, аще воистину таковое житие любят и исповедание их яве приимати. И аще приступят от тле к сластному и сластолюбивому житию блуд творящих запрещение примут» (Правило 59, Лист оборот).
Блудник 7 лет запрещение приемлет, 2 лета плачася и в 2 послушая Божественных Писании и два припадая и едино стоя с верными без общения. В 9 лето прият будет на общение (Правило 60). Обещавшаяся девствовати или в черничество постригшася и потом впадши в блуд 15 лет запрещение приимет: 4 лета да плачется 5 еже да послушает и 4 лета еже да припадает и прочая тамо чти до окончания.
Сице убо зрите со испытанием от Святаго Писания яко тако повелевает нам приимати, и в Закон Божии с обещанием сим и с показанием сего Святаго Писания понеже сие многопечальное время с преждебывшим временем при благочестии не согласует, но тогда быша церкви и священницы, и паки мужа и жену в нынешнее время некому браковенчати, паки яко не имеем священнаго чина, но тако со обещанием чистоты приимати. И было бы наказание наше, еже во всем чистоту имети. Аще ли же сами и погрешат послышание сем и по приятии закона, но мы неповинни будем.
Глава 30
О молении со иноверными во единой храмине
Во единой храмине со иноверными по углом во едино время молитися не подобает. И весма от таковых сохранятися достоит. Понеже, священная правила тако творити возбраняют. Сице глаголющее: «Верным со оглашенными ни в дому да не помолятся. Оглашеннаго же не мним бытии точию того он же оглашен ко Крещению. Но и некрещеннии, сиречь: погании нарицаются оглашении по Божественному Златоусту» (Маргарит). Их же призывает Вседержитель Господь, в 1 час, и в 3, и в 6, и в 9, и в 11. А инии оглашении по грехом именуются, по священным правилом всем же сим троим оглашенным различие сотворися от Святыя Церкви. Единии ко крещению, а вторыи по грехом, а трети нечестивии еретицы сих всех паче весма отлучатися от таковых подобает.
Не точию молитися во единой храмине, но ниже с ними прекреститися по разсуждению древних отец. Кая бо часть по Писанию верному с неверным, аще жити с неверным возбраняет. Кольми паче молитися, яко же писано в мучении святаго Арефы. Непопускаху бо (вернии) ни единому иноверцу посреде себе житии – ни эллину, ни жидовину, ни еретику. Точию сами яко единыя матере соборныя и апостольския церкве чада пребываху во всяком благочестии и чистоте. Еще же и се воспомянути подобает. Аще который по Псалтыри стоят или молитвами, то не подобает за собою становити иноверных и купно с ними молитвы творити. Но точию аще где имеется совершенная служба со чтением и пением. И за таковою службою стояти таковым и то которыя не хулят ниже ругаются християнской вере, но немедленно и не отложно приити хотят в Закон Божии. Но друзии же аще и неведают веры истинныя, но обаче хотят послушати чтения и пения и от того в познание истинны мнози приходят, якоже равноапостольный князь Владимир и инии мнози. Сице бо о таковых и Писание сказует (Кормчая лист 370). Службе бывающеи в церкве не подобает приходити еретиком, аще не обещаются покаятися. Тако же и Никон Черногорский в слове 33 глаголет: «И стояти еретиком за службою не попущает разве аще обещаются покаятися и от ереси убегнути». И паки Писание глаголет: Сему же подобно сказует в Священном Правиле Зинарь 154. Есть же и другое разсуждение ныне полагается, нужнаго ради жительства и пребывания, понеже нужды ради гонителей внидет и хульник на собор стояти. Яко же в Пролозе о некоем срацыне введшем кони своя в Церковь и самому вне стоявшу и узревша иерея закалающу агнец в Божественнеи Литургии, и от того прииде в познание истины и спасение получи. Сице убо и князь Великий Владимир в познание истиннаго благочестия прииде слышания ради Божественнаго Славословия и видения ради церковнаго благолепия. Сице убо и ныне мнози приходят в разум истинныи от слушания чтения и пения Божественнаго Писания.
Глава 31
О ядении на едином столе со иноверными
На едином столе с неверными отнюд не подобает ясти. Но блюсти себе опасно, понеже стол яко сосуд един. Того ради яко из единаго сосуда християнскаго измываем, понеже трапеза сия на ней же християне вкушают подобно есть священней трапезе яко же глаголет о ней Святое Писание (Патерик скитской, Зинарь 189, Пролог август 4). Такоже и трапеза еретическая наричется безчествовавших трапеза. Не подобает православному християнину к ней приступати, и к своей трапезе такоже не достоит припускати. Понеже несть в неверных християнския веры, несть и Бога в них. Понеже познание Божие от правыя веры никтоже знает Бога.
Сице же подобает и еще паче, яко в безмолвии на трапезе сидети и молитву Исусову творити и смерть свою поминати. Аще ли же кто безстудно седит на трапезе и глаголет некия праздныя смехотворительныя беседы. И тако сии человек по Святому Писанию отступи от Бога и Бог от него и молитва его не приятия и вси трудове его не полезни. И паки аще кто на трапезе беседуя ни чим же разликует. Ядыи бо лакомством безчинным или беседуя что любо зло или добро, не человеку достоин сицевый, но и свиние и котке. Сему подобно и во отечнице о ядущих на трапезе и единовидное брашно ядущих. Трижды видения в нем составляема видится, ов яст мед, а другии яст хлеб, а ин мотылу, мед убо безмолвие и молитва. Хлеб же благодарение о брашне, мотыла же не благодарение и роптание еже о брашне.
Глава 32
О сем яко неподобает с детьми женившимися посреде их жити
С детьми, женившимися от брачныя ереси, или с дочерми призячеными житии родителем их вместе, отеческое разсмотрение по священным правилом и разсуждению их зело возбраняют совокупно бытии. Того ради яко взираючи во священныя и Божественныя правила. Они бо тако всем нам сказуют и различают ереси, и возбраняют весма и запрещают. Яко же глаголют зде Василий Великий во 2 книге, во главе 379, Зонар глава 76, и Маргарит лист 559 и Патерик киевопечерский слово 13. Тако бо и во иных Божественных Писаниих о сем много свидетельствуют согласно. Яко весма с еретики любви и дружбы и совокупления и соединения, и жития с ними никакоже имети. И аще кто совокупления с ними в житии имеет и любовь творит к ним не разлучную, якоже глаголет преподобный Иосиф Волоцкий: «Творяи бо сия чужда себя творит Христовы Церкви и чужд есть Владыки Христа. Того бо ради таковое запрещение на себя приемлют и чуждых себе от Владыки Христа сотворяют».
Поне же обычаи свои и нрав весма к ним имеют привязан, и тако уклоняются и удаляются от Православныя Церкви, яко же глаголет Никон Черногорский в слове 57: «Того ради яко не удобь отторжене имут своих обычаи, ниже по Евангелию жизнь приемлют». А Святое Евангелие Христовыми Усты учит нас, глаголя Сице: «Аще кто не возненавидет отца своего и матерь, жены и чад и братию и сестр не может бытии мои ученик». И паки: «Аще кто любит отца или матерь паче мене, несть мене достоин. И иже любит сына и дщерь паче мене несть мене достоин». И како зде тако будет разсудительно предлагает всем хотящим спастися. Ныне же кто не любит тако сына и дщерь паче Христа во истинну любят и почитают нечестие, паче благочестия и отлучают себе от Бога и от веры Христовы. И не слышат и не внимают словесем Святаго Писания.
Коликое безчисленное поучение от Святаго Писания и отец наказание, вся бо сия поучения ни во что вменяют. Еще же и паче того злеиши, яко злобу научающих имеют. О велие зло сии человецы душам своим готовят и погибель вечную себе устрояют. Понеже по Писанию Христовых Уст речена быша: «Слушаяи вас мене слушает», и отметаяися вас мене отметается». Зри зде и реченная разумеи и о спасении души своеи попецыся, мнози бо святи не точию из домов своих бежаху неверных ради и оскверненных, ереси ради с ними пребывания. Но из градов бояхуся святи с таковыми пребывати даже бы не прияти от Господа казнь велию за пребытие с ними. Поистине и в правду глаголет Божественный Закон: «християнин всяк кроме неверных да пребывает». Понеже убо и Лот аще и праведник бяше, но из Содома изыде и спасение получи.
И аще кто не хощет сего наказания слушати и тако творити яко же заповеда Бог и святии его, да будет отлучен от Святыя Божия Церкви и от всея о Христе братии. По оному словеси реченному прежде, яко чюжда себе творит от православныя веры и от Святыя Церкви. Сице убо и Июда апостол в предисловии послания своего глаголет: «Таже обличает и отгоняет их яко лестьца (и повелевает верным не едино общение имети с таковыми), но точию подобает о таковых плакати и горько рыдати. Яко же глаголет Божественный Златоуст: (Беседа седьмая. Лист 1881) «Плачися неверных, плачися иже ничто же от онех отстоящих и иже безпросвещения отходящих иже без печати си, и воистину плачев многих достоини суть сии и воплех, понеже в не царских суть со осужденными и с повинными казни, сего ради блюдем себе опасно».
Глава 33
О сем яко не подобает с еретики купно во единой храмине житии или чим их оправдати
Сице убо достоино есть и се воспоминати, яко же прежде рекохом о верных с неверными. Отцы и матери верни сут с не верными их чады женившимися житии Святое Писание возбраняет, и о сем отеческое повеление возбраняет тако же согласно со Святым Писанием отлучает, ибо о сем во преди речено бысть. Ныне же паки тому же подобно и с чужими в неверии пребывающими жити Святое Писание возбраняет и всем явственно о сем глаголет (Кормчая лист 15): «Понеже убо и Ветхи Рим аполинариевою ересью падеся, Вторый Рим еже есть Константинополь, агарянскими внуцы от безбожных турок обладаем растлися».
Зри убо зде со вниманием, яко не точию доми ими оскверняются, но и градове, кольми паче домове их в них же вместе с неверными пребывают и оправдание некое от них сотворяют, а себе вернии великое осуждение за сие дело уготовляют. Но убо подобает всяким видом и действом и словом и помышлением удаляти себе от таковых. Всячески от еретик отлучаютися. Яко же глаголет Никон Черныя Горы, Слово 3-е, опасно себе да внимаем, да некако нечестива некоего человека оправдим словом или делом дара ради сходящи воли его сложению, горе рече горе, глаголющим злое добро, а доброе зло, а полагает свет во тьму, и тьму в свет. И се разумно да примем разсуждение отеческое, понеже не свое тако сказуют, но Писание Святое изъявляют и житии в неверными не попущают. Но правильному разуму святых отец сказанию, и како сие благочестиво вменити достоит, еже вместе с неверными единодомно пребывати.
Но разве аще которыя обещаются муж и жена в чистоте и в целомудрии жити и плотьскою похотию не сходитися ни мало ни много и неосквернити телеса своя никако же. К тому же ни гульбы имети ни вместнаго спания, ни обнимания, ни целования, ни глумления безчиннаго. Аще же к тому в Закон Божии приити не отложно соизволяют, и Святое Писание со многим вниманием слушают и последуют писанному и с таковыми пребывати и житии возможно, по Господню Словеси реченному: (Евангелие) «Аще в неки дом внидите и приемлют вы (сиречь учение) в том дому пребываите». Аще неции по прелести мира сего пребывают и во всякои скверности житие свое провожают, и чада ражают, и от еретик всякия дары и таины употребляют и в домы своя их впущают. Аще и неволею, но по нужди, но обаче скверность велия сотворяется, яко же и мученицы от неизволения и тяжкия муки Христа отвергошася, но обаче не именуются мученицы, но отступницы. К тому же и ризное украшение имеют и на праздники еретическия ходят и на гульбища и во всяком похотении пребывают и скверность всякую исполняют, и с таковыми житии инкакоже не возможно. И по Господню Словеси изыти скоро из дому тог, и прах прилипши от ног отрясти подобает.
И ненавидити их и гнушатися и отбегати яко от змия ядовитаго или льва лютаго или яко огня всепаляющего. Понеже по Писанию приличествует о них глаголати (Апокалипсис глава 13, Кормчая правило 83). Елицы бо закону Божию не повинуются суть жидове и внуцы их. И паки, якоже глаголет Василий Великий: «Обычаем и сластем паче работати восхощут нежели Господеви и Евангельскаго жития не приемлют ни едино нам обще к ним слово. И паки: Аще ли нецыи рече, не отступно держатися своих обычаи, и не престают согрешати. К таковым ни едино нам общение. Да не погубиши себе не исправлением приобщаяся. Зри зде реченная святыми: «Не о поганых убо глаголет, ниже о еретиках, но суть именем християне, делы яко погани и таковых подобает всяким видом отвращатися и от бегати и общения с ними не имети, кольми же паче подобает от самых тех нечестивых и скверных еретик удалятися и отбегати от них, и никакоже с ними общение имети. Яко же и паки глаголет во отечнице: (Лимонарь глава 12) «Брат вопроси авву Алимпия, презвитера лавры святаго Герасима глаголя: «Рцы слово еже на пользу». Он же рече ему: « не веселися со еретиком и держи язык и чрево». (Минея четия. Декабрь 28).
Такоже святии изволяюще со зверми житии и в вертепех и в пропастех, нежели со беззаконными пребывати (Евангелие неделя 29). Никакоже примешатися праведным лукавому и чистым скверному, ниже бо купно бытии со священными не удобь имеяи от мовену греха скверну. Кое б причастие света ко тме, или кая часть верному с неверными, не дано бо ему от закона еже смешатися со другими человеки (сиречь с неверными). И Шестыи Вселенский Собор в правиле 11 глаголет: «Иже како присвояяися к ним, аще причетник да отвержется, мирскии да отлучится». А Златоуст Божественный толь страшно и ужасно глаголет (Маргарит слово 13). «Аще и безплотных сам житие поживет, еретиком же приобщается в дружбе и в любви, таковыи чюждь есть Владыки Христа».
И да не буди то еже разневатися на нас, яко бо мы воспрещаем таково житие имети и с еретики дружество и любовь и совокупление имети, а нам молчанием сие покрывати невозможно. Яко же паки глаголет Писание: (Кормчая 6 го Собора) «Не подобает ереси покрывати, молчаливы ибо потаковник, иже молчит и не обличает грехи брата своего не милосерд есть и подобен оставившему яд в теле уяденнаго от ядовитаго зверя». Да аще о гресе подобает обличити. Коль паче о ересех не умолчати, да не умолится человеком спасение, ибо всяк человек освящается веры исповеданием. И паки (Маргарит) ты же веси таковыя творящих и тщишися утаити и не обличаеши сам ниже исповеси иным могущим сия упразднити. Не явственно ли есть, яко и ты любиши. Тем же со онеми иже сия творящими, огню вечному предан будеши (Маргарит слово лист 583). Глагол убо таковых услышате и не будете преклоняющееся к неверным (лист 589). Кая бо община свету ко тме, послушаите православнии и с еретики не смешивайтиеся. Да не сведены будете в вечныя муки с ними. Подобно поучает и Иоанн списатель лествицы, сице глаголет: (Лист 7) «Точию от иноверных подобает осквернятися и со иноверными общение не имети». Но Ефрем преподобный такоже повелевает (Слово 102) «От еретик удалятися». Но вси святии согласно о сем поучают и от еретик разлучают и жити с ними не попущают. Мнози бо святии не точию из домов поганых бежаху, но и из градов.
Подобно и Иоанн митрополит никеискии, и Афанасии Александриискии и Досифии, ученик преподобнаго Зосимы на армены, согласно и на всех еретик сказует. Яко еретиков в домы не пускати християном да не оскверняются верни от зловерных. Занеже благодать Божия отбегает от мест тех идеже еретицы приходят и ту Господь не пребывает, но бесове. (Зинарь правило 88). Тем же яко истиннии мои пособницы и ученицы святых апостол единомудренно сими святыми и богоносными отцы, и исповедаша ми яже предаша нам святыми апостолы, истинно яже подтвердиша и укрепиша святии богоноснии отцы наши и предаша нам сице и в православней и истинней вере пребывати и не прикасатися ниже связоватися (со еретики), ниже совещатися с ними. Но тех отбегати и сторонитися их и проклинати их яко наследники огню вечному и служители дияволи плененныя Диаволом и погубители душетленныя.
Глава 34
О хождении во одежде еже не подобно християном
Краткую одежду, что глаголется телогрея, сие есть нехристиянское одеяние, сиречь поганое, или паки женам шити мужескую одежду себе или аще готовую на ся возлагают. Или паки черкесную одежду мужие и жены у себе держат и носят, и в том себе держат и носят. И во том себе греха не ставят инии же и на молитве в них стоят. Еще же к сему инии сапоги с каблуками высокими носят и вся християны возмущают и в соблазн приводят, а сами в тои противности пребывают. А за сие зело повредно есть истинному християнину и укорительно и поносно на благочестие и сии соблазнители и противницы во истинну достойни суть отлучению, по святых отец писанию и неточию за то едино, что поганых обычаи любезно держат сиречь одежду их нехристиянскую.
Но за самую ту настоящую християнскую, которое лице но свою одежду посуществу носят, но мужие женскую, а жены мужскую, но убо Писание о сих тако глаголет (Библия глава 14) «Аще муж или жена в чуждую одежду облекутся, сиречь не по преданию отеческому да будет анафема». Сего ради блюдемся опасно сея прелести и погибели, тако убо есть и независтно Богу еже человекугодия ради преступати закон его и паки прелестников мира сего разумы от безумных умыслы отревати (Кирилл Иерусалимский) и яко от гадов ядовитых убегати от них подобает и на прелесть их не смотрети. Понеже всяки нрав их и обычаи и одежда не подобная. Души правоверных погубляет.
Яко же паки рече Писание: «Аще которая жена мнящееся воздержания ради пременит одеяние. И во обычнаго места в одеяние мужеское облечется, да будет проклята». (Кормчая Лист 58). Такожде и мягкая, сиречь шелковое одеяние весьма ныне нам не приличествует носити. Сице бо о сем мягком, сиречь шелковом одеянии и Божественный Златоуст воспретительно глаголет и носити возбраняет, аще и не в сие время, но в самое то благополучное и пространное и повелительное. Наше же время несть радости и веселия, но плачь и горькое сетование. Сего ради яко наконец времени постигохом да не мнит же кто сему бытии, яко бы мы от себе воспрещаем сие носити одеяние. Но точию совет душеспастительный смирение предлагаем и на древний образ взирати повелеваем, даже бы в покаянии и во умелении житие свое препровождати и кончину свою в покаянии ожидати. А паче же подобает волю свою отсекати и отревати и не последовати еи ни в чем же. Понеже воля наша по Святому Писанию медяна стена стоит, между нами и Бога. Не дает нам приити к Богу и спастися (Авва Дорофей глава 7).
Сего ради подобает последовати повелению святых и святоотеческому благословению и совету даже бы нам не погибнути душею и телом и не осудитися вечно мучитися. Якоже сказует и научает нас Божественный Златоуст и инии мнози, не украшати себе никакоже и не взирати на прочия иныя человеки иже прельщающееся на прелесть мира сего. Горе бо рече миру от соблазн.
И паки аще кто от верных соблазнится и будет тако творити и иных от верных соблажняти, аще и не словом, но видом единем, горе тому человеку. По Святому Евангелию добре бы (было) ему оселки камен обесити на выи его и ввержену быти в море. Им же соблазн приходит и прочих в соблазн приводит. Добре бы ему не родитися неже соблазнити единаго от малых сих. Иже бо добрая и мягкая одеянии имущему и красная не восхощет сеи не явитися человеком, но сюду и везде себе являет и не точию се же о красных одеждах воспоминати, но и простыя мужеския жене, а женския мужу, никакоже недостоит на ся возлагати.
Глава 35
О погребении неверных
А иже кто от неверных умрет, Божественный Иоанн Златоуст глаголет: (Слово 57) «А иже кто в неверии отиде сиречь, умрет, таковаго точию земле предаите, сиречь погребите. Тропари же и пения и псалмов и милостыни и поклоны и кадила и фимиама и образа Божия и с честию да не провожают их, понеже некрещени суть и невернии. Тако же и отступников от веры Христовы и еретиком приобщившихся сему же точию погребению предати. Яко же и прочих еретик. А к еретическому погребению да не текут вернии отднюд, и да с ними прокляти будут. Апостоли бо рекоша: «Поминаите во псалмех и молитвах и памяти творите. Третины и девятины и четыредесятины и годины яже в вере скончавшихся и верным поминати их тако повелевает. А о неверных Христос Сын Божий тако глаголет: «Оставите мертвых погрести своя мертвеца. Рекше, неверныя неверным». Аще же правовернии поидут провожати нечестивых или отступников Божия веры, таковые анафема подлежат трижды. Аще ли сродници сии еретицы и отступницы от веры, и то великия ради нужды, аще некоему их погрести от неверных, тогда полагает 3 тысячи земных поклонов, с милостынею и со слезами пред Богом. Да простит их Господь Бог, тяжкое сие согрешение, нужды ради настоящия.
Глава 36
О сем подобает ведати всем православным християном, яко не достоит не приимших християнскую веру умерших поминати
Сице убо и се ведати подобает яко недостоит умерших поминати, аще которыя не примут Святыя Веры. Аще и родители аще и чада, аще и зело ближнии сродницы будут. Аще и постницы и воздержницы и милостивии. Аще нечто и святых отец хранят предание. По оному словеси реченному (Лимонарь Глава 26). «Аще и вся добродетели исправит человек, а не право верует во оно место и на сия муки приходят идеже Арии и Нестории и Ориген и прочие еретицы.
Тако же подобно и Божественный Златоуст во нравоучении 25 глаголет: «Яко не крещеныи исправления имат умрет в геену отходит». Сицевая и иная многая Святая Писания тако сказуют. Сего ради и поминание таковых отрицают святии творити. Ведомо же да будет и всем известно и не сомнительно яко поминати таковых не подобает. Ведущее убо Божественнии Отцы яко же за усопших поминания, глаголя: (Пролог ноября 9) «Милостыня и службы велику тем подают ослабу и пользуи обще се церкви творити повелевают, от святых апостол се приемше. Якоже рече (Беседа лист 1231) «Сеже о благочестивых глаголет (Феодорит Студийский Лист 28). О нечестивых же аще и всего мира имение даси убогим, ничтоже успееши (Кормчая Лист 28) «Ему же живу сущу враг бе Богу». Яве есть яко и умрешу имже не имети милости, не бо есть неправды пред Богом.
Праведен бо Господь и правду любит и воздаст комуждо по делом его. Подобно и Кирилл Иерусалимскии тако же глаголет и поминати таковых не приимших закона Божия не повелевает. К сим же и ина многая безчисленная Святая Писания поминати таковых весьма отрицают. Да будут же и паки помяновена Пречистая Господня Словеса, реченная сице: «остави мертвых погрести своих мертвецы». Тако же и поминати им своя мертвецы, сиречь неверных довлеет. Нам же несть тако. Никакоже довлеет не крещенных поминати, и сего ради подобает нам поминати словеса душеспасительная и повелеваемое творити, якоже заповеда нам Святое Писание и самим собою никакоже разсуждати по своему произволению.
Глава 37
О сем яко неподобает мокроту естественную противу Востока испущати
Подобает же убо и се благочиние и благоговение имети всякому роду мужеску и женску в православии пребывающим житие свое чисто провожати и Бога боятися и Закон Божии соблюдати не погрешно. И естественную нужду чисто соблюдати, сиречь мокроту естества противу Востока не испущати. Такоже и другую естественную нужду подобно сему сохраняти и от Востока отвращатися, но к Западом или в нощную страну сие творити. Но точию со благоговением и с молитвою Исусовою. Аще и скверно сие и нечисто дело, но обаче по естеству сие творение из начала сотворено Богом. А рука же своима блюстися опасно и нехватати кроме обычная естественная нужды. Аще кто похотолюбием будет держати и зрети естество свое и се вменится ему яко блуд сотворил есть.
Тако бо глаголют Священная Правила (Зинарь Правило 197) «Инок аще имеется за срамныи уд и поглядает его, яко блуд сотворил есть». И сего ради блюдем себе опасно. Такоже и полуденныя страны сицевым же действом блюстися достоит, аще о сеи стране и неписано есть. Но обаче разсуждением отеческим сие советуется понеже в полуденной стране все Христово строение бысть: Рождество и Богоявление и Распятие и Воскресение и Вознесение и прочие вси праздницы Христовы и Пресвятыя Богоматере и всех святых апостол и святых совершенная тамо память. И не буди се наше повеление, но точию совет благ предлагаем даже бы себе соблюдати. Подобно яко же кто видит Церковь Божию и на ню зревшее мокроту испущает, тако не осудит совесть его. А о мокроте зело страшно Святое Писание еже к Востоку возбраняет, сице глаголющее: (Старчество Глава 34) «Аще чернец на Восток мочится, поклон 300 на 6 днеи полагати». И сего ради блюдемся опасно.
Глава 38
О приходящих ко святей вере, мужем и женам подобает чисто и целомудренно жити
Приходящих ко благочестию, сиречь, к вере Християнстеи обоим купно мужем и женам, и приимшим купно Благочестивыи Закон и благодать Святаго Крещения. Подобает им жити во благочестии чисто и воздержано и целомудренно и всякою крепостию и твердостию веры, соблюдати себе опасно от всякия нечистоты и скверны и плотьскаго совокупления и естественнаго похотения, еже между собою. К сему же и обнимания и целования и на одре легания вместе никакоже имети, но разно спание творити. Тако же и измыватися кождо особь единому и не зрети нагих между собою.
К сему же смехотворения и глумления не имети, того ради чисто и сохранно повелеваем жити, понеже несть у нас священника, и некому их паки брачным совокуплением благословити по Святому Писанию, но тако просто жити яко брату духовну с духовною сестрою. Сего ради подобает духовным отцем и о Христе братии таковых новопришедших со уговором приимати, и вся им наперед возвестити и все житие чистое и целомудренное сказати, и совокупление плотьское между собою не имети. И аще согрешат по вере, то наперед и о епитимии возвестити им, даже бы устрашилися сего и не погрешали.
И аще тако что и сохранно поживут и велию и пребогатую мзду и благодать и милость от Господа Бога примут в день судныи от Праведнаго Судии. Понеже воистину велие и праведное чудо и удивлению многому достоино. Подобно яко лен со огнем лежит, или висит, а не горит, и кто сие не глаголет чюдо быти, тако и сии муж со женою аще в чистоте поживут, и в воздержании пребывают, не велие чюдо. И несть ли многому дарованию достоини. Аще ли же паки по вере скверным и плотьским похотением и не чистым житием и скверным похотолюбием жити и пребывати будут, и сии яко блудницы осудятся и от Церкви Божия да отлучатся по разсуждению Святаго Писания.
И сего ради разсуждение о сицевых тако лежит: Яко Церковь Божия о крещении еретичестем разсмотреша разсуждает, сице глаголя: «Яко еретическое крещение, тако и брак еретический несть брак. Разлучити и разделити времени ради сего весма опасаемся, но токмо о сем просим и вселюбезно молим таковыя сверстники, имети житие чисто и не воздержано и зело опасательно, спасения ради души своея. Сия прелести убегати: (Беседа 537). «Велие убо благо есть еже миловати нищих, ни что же таково еже от прелести свободитися. Иже бо сие творяи, бывает яко же Петр и Павел, и ниже паки глаголет. И аще кто имать друга и сродника и домашняго сия да творит и сия да глаголет и будет яко Петр и Павел». (Преподобный Ефрем слово 37). «О чистото девственная не токмо в приснодевьствующих обретаемая, но и в покающихся стяжимая. Сия убо возлюбити вси потщимся да тожде благословение от Господа приимем».
Глава 39
О сем яко подобает всем православным християном удалятися и воздержатися от мясоядения и от винопития
Еже и о сем совет предлагаем, а не повелеваем, принужденно. Но точию ради души своея, яко же кто хощет тако в житии своем да управляет времени же ради сего настоящего разумеваем сице. Яко болезненно есть и зело скорбно и многому плачу и сетованию достоино. Понеже лишихомся всея сладости и радости духовныя, а паче же всякия болезни тягчаиши есть, яко лишихомся самыя тоя превеликия благодати и сладости душевныя, Пречистаго Тела и Животворящия Крове Христа Спаса Нашего. Самыя высокия главизны спасения нашего и како нам возможно без печали быти. Сих Святых Даров лишившимся и сластеи плотских причащатися: мясо ясти и вино питии. Таковую печаль зря нестерпимую не сам ли Господь рече ко июдеом. Егда отимеся от них Жених и тогда постятся в тыя дни.
И сего ради подобает поминати Слово Господне, яко отяся от нас Жених, сиречь, Пречистая и Божественная Манна. Ибо и прежде сего времени, и в самое то во благое время и в настоящую радость, но тогда советоваху мнози святии не ясти мяса ни пити вина. Тако же и Пречистая Мати Господня егда явися Досифею еще юну сущу, и глагола ему: «Аще хощеши спастися и от вечных мук избавитися, постися и молися часто и не яждь мяса и избавишися мук сих». Три бо сия законныя заповеди предаде Пресвятая Богородица. Воистинну достоит и нам внимати себе и взирати на образ крепости и воздержания и последовати сим добро и полезно и душам спасительно. Яко же глаголет Авва Дорофеи: (слово 10) «Даждь крови и прими Дух, сиречь подвигнися и будеши во обычаи добродетели, своея ради души подвизатися и всяко тщание и попечение имети и не указовати на прежде бывшия времена во благочестии. Понеже оное прежднее время, нашему последнему и всепечальному и многоскорбному и всех благ лишенному и всепрезлобно гонительному и многоплачевному несть прилично первое время к нашему сему времени приложити.
Глава 40
О пиянстве его же подобает хранитися
Хмельнаго пития християном не подобает вкушати и на кабаки оныя скверныя еретическия не ходити и пития их никакова не испивати. И аще которыя не послушают Святаго Писания и запрещение отеческое презрят и наказание их отмещут и таковых весма подобает всячески от Святыя Церкве отлучати и общения с ними не имети. Понеже прелести мира сего вдашася и скверную мерзость и нечистоту возлюбиша и с еретик общение прелюбезно сотвориша. Во истинну бо приличествует слово еже глаголет о сих Божественныи Златоуст (Беседа лист 136). Яко же бо смертоносныи растворяющии былия, медом каячаши помазующи, удобь приятен творят приемлющим смертоносныи яд и яко сладкое пиво привлачающаго мерзостное греха пиянство и блудно осквернение воистинну и в правду правая глаголати подобает от Святых Божественных Писании: «Яко аще и при благочестии пияница кто был бы, таковыи не имать части в Царствии Небеснем и в Церкви Божии (Зачал 139). И ясти с таковым апостол не повелевает и уподобляет пияниц равно блудникам и хищникам и идолослужителям.
Зри зде всяк и разумеваи душеполезная словеса. Ныне же и паче весьма таковых пияниц подобает отлучати от Святыя Божия Церкве и о Христе братии понеже не токмо в прелесть мира сего внидоша, но и всю богомерзскую и прескверную ересь восприяша. Яко же глаголет Писание (Меч Духовныи неделя 5). Понеже сии вси пиют чашу бесовскую, вси елицы чаши пиянства держатся пиют чашу бесовскую. А иже воздержатися от пиянства и от всех потоков беззакония. Пророк Иоиль глаголет: (Октября 7). Паки о сих же пияницах: «Прельщении есте истрезвитеся упивающиися и плачите и рыдающе пагубы вашего пиянства». Во истинну бо неверных и некрещенных есть человек веселие пиянственное (Соборник лист 190). И не внидет бо в душу осквернившуюся от пиянства Дух Святыи (Беседа лист 57). Ничто же тако бесу любезно, яко наслаждение и пиянство. Сего ради сии не чуют гласы правды Божия и ниже внушают глас Его. Упилися безумием и не хощут истины разумети и ниже Правде Божии себе покориша. Зри зде благоразумныи читателю и познаи истинну от Святаго Писания и разум восприми о спасении души своея. Не помещи толику радость яко же глаголет Божественный Златоуст (Беседы лист 874). «Не изливаи сокровища, не вводи пиянства печали матери, Диаволу радость, безчисленная раждающи злая ибо сон смерти от сюду уподобися и главоболение и недузи и забвения и мертвости образ. Сего ради престани упиватися глаголет святыи. А паче же подобает от смешения еретическаго удалятися себе всяким образом по благочестии живущи.
Глава 41
О сем яко не подобает себе в напасти волею предавати
Паки о сем подобно есть разумети, яко не подобает себе волею в напасти предавати. Сам бо Господь показал образ бегания, еже по рождении в Египет. И паки сам Господь глаголет: «Аще гонят вы во граде сем, бегаите в другии». Тако же много и безчисленно святых о сем согласно сказуют. Яко мнози бежаша гонения ради и мучения от убивающих и гонящих. И бежаша в пустыни, в горы и в вертепы и в пропастех земных и в разселинах каменных себе скрываху. А в напасти немнози себе предаяху, но точию крепции и тверди в мученицех.
А самоизвольно сами себе святии никтоже мучен и убиен бысть до смерти. Аще и в пустыню убежаху, а гладом себе не уморяху, но различныя подвиги и труды подимаху, былием и зелием себе питаху. Днии по четыредесяти пищи себе не приимаху. Тако бо святии и нам образ показаша терпения и злострадания и в напастех и в бедах терпеливо и мужественно терпети, а смерти себе самоизвольно не предавати. Но аще и придет смерть внезапу Божиим изволением на комуждо месте или в дому или на пути или в пустыни, се бо есть предел Божии, его же никтоже не придет.
Но о сем Афанасии святыи милость Божию являет, сице глаголя: «Яко аще кто чрез реку поидет и пред ним люди идут и тои по нем идет и утонет, мученическую смертию умрет. Аще поидет един и никтоже по неи идет, и потонет тои сам себе убиица бывает. Тако же и на высоту неции восходят или древо самоизвольно и падет от туду, то сам себе убиица бывает». Или кто себе сам убиет различно, или ножем или инеем чем, яко же глаголет Василии Велики лист 450 о убивающих самих себе. «Аще кто со брега ся вержет и утопится или убиет сам себе или заколет или удавит или сожжется, и таковаго да не помянеши. Ниже милостыню за него твориши. Аще будет и Бога ради сие сотворит, да не пощадится, понеже се не заповеда Господь яковыя и сицевыя добродетели никому же творити». Аще ли же кто ин будет сотворил, яко да поеши над ним помины и милостыню твориши по нем, а сотворивыи ему сие убииство, да претится вольнаго убиицы канона.
Такоже и Евсевии святыи глаголет: (лист 157) «Аще ли кто играя поползнется или к гонителем сопротив идет разгордяся или оставя одежду избавления еже изятися от рук гонителеи и бежати от них или из рук их, сам ся смертию коею любо предаст, и то суть врази Божии». Аще и веры ради Христовы гоним, и предаст сам себе смерти, аще и из рук мучителеи, сии суть яко невернии не обрящут милости Божия на суде, понеже страха ради изволиша сами ся вечно погубити невозвратно». И на таковых сбудется реченное во откровении Иоанна Богослова: «Страшливым и маловерным часть им во езере огненном со Диаволом будет неизмолимо». Сим же подобно и священная правила согласуют сице рекуще (Номоканон правило 175). «Аще убо убиет сам себе человек, не поют над ним, ниже поминают и разве аще бяше безумен (Кормчая лист 370) сиречь вне ума своего по 14 ответу святаго Тимофея Александрийскаго, подобно и Зинарь глаголет правило 81. «Иже волею своею падет и убиется сего ради не поют над ним ни да творят памяти ему».
Аще ли не волею падет и убиется и умрет и сего ради отпоют над ним по уставу и памят творим над ним и не точию тако просто, но на речем его и мученика. А паче же положити в судьбы Господни таковыя иже впадут в руки нечестивыя нагло и предадут себе самоизволно различнои смерти, иже прежде не слышаша прогонителеи, что идут на них и хотят взятии и мучити (Октябрь 9 день). Подобно яко же сотвори святая мученица Домника со дщерми своими, изторгшася из рук нечестивых и в реце потопоша. Разсудивше же сице яко любве ради Христовы, лучше есть водою утопитися нежели беззаконным в руце предатися (Минеи чети. Октябрь 15).
Сице и Пелагия святая врежеся со окна на землю от мучителеи и тако скончася и мученицеи наречеся. Тако же и святая княгиня Ольга, нареченная во святом Крещении Елена, сице глаголющее (Июль 11). «Лучше есть в воде утопитися нежели в блуд впасти». Сия же аще и быша, но сотворися им внезапу нашествие от безбожных. Аще ли же кто слышав грядущих мучителеи, то подобает бежати по Господню Словесе. Аще ли ж бежати несть камо и невозможно сюду и сюду обстояния нечестивых ради, но тогда вдати себе на пост и на молитву и предатися в Судьбы Господни и слезы многи излияти и просити у Господа свобождения от рук нечестивых. Аще ли же невозможно бежати и свободитися от рук их то молитися о терпении с благодарением. Даже бы дал Господь претерпети до конца.
А сего ни где же слышахом ниже видехом в Писании яко нарочно на сие соделати храмины, во еже самим от себе сожженным быти в них, нашествия ради мучителеи. Аще бы и сие сотворено было на сожжение и от мучителеи зажженным быти и сие бы страдание вменилося за Имя Господне, но сие невидехом в Писании. Еже самим уготовати хврастие на сожжение, но мы сие судити и во осуждение полагати не можем, но в Судьбы Господни возлагаем и помяновение о сих сотворяем по разсуждению святоотеческому. Но точию ныне и всегда и на всяко время и час поминати Слово Господне реченное сице: «Будете готови на всяко время и паки бдите и молитеся да не внидите в напасть».
Глава 42
О сем, яко не подобает никого же ни чем же обидити
Паки же подобает в нынешняя последняя времена нам в гонительстве всем пребывающим православным християном весьма хранитися и соблюдатися во всяких делех духовных же и телесных, что бы кого чим не обидити и чужаго у себе не утаивати. И не имети потаением чужаго что в дому своем. Понеже яко огнь по Святому Писанию си есть лихоимственное имение и весь дом свои и яже в нем все имение сожигает. Аще и настоящая и своя сущая воистление приводит. Подобно и правильное запрещение о таковых глаголет: (Зинарь глава 135). «Восхищая и приемля чюжая с неправдою 5 лет в покаянии пребудет, а поклонов 100 на день».
Подобно и ина многая Святая Писания и Евангелие и Правилный Разум вся сия согласно о сем сказуют. Тако и еще сим же образом блюстися и сохранитися достоит еже траву соседа своего прекосити, или ниву к своеи ниве преорывати весма страшно. Ибо о сем Божественная Правила глаголют (Зинарь глава 135). «Преорывая на ниве со оралом чужую ниву или иного от чего 4 лета на покаяние поклон по 16 на день». Сим же подобно и Номоканон и Кормчая и ина вся Божественная Писания и Священная Правила тожде согласно и едино вси утверждают. Воистинну по Писанию (Благовест) обидник яко тать и яко разбоиник осужден будет. Сего ради молю вас возлюбленная о Христе братия, бегаите обиды и досаждения братии своея, поминающее Слово Господне: «Лучше обидимому быти нежели обидети кого чим».