Глава 43
О сем яко сродник своих не презирати никако же. Аще, кто о своих, паче же о присных не промышляет, веры отверглся есть и невернаго горше. Сын озлобивый отца не праведно, да отсечется рука ему
Такоже подобает и се знати и ведати всем в православии пребывающим своих и искренних сиречь, сродников не презирати и не оставляти. Аще в правоверии такоже пребывают, но промышляти о них и пещися. Аще отец или мати, или брат, или сестра, или инии сродницы таковии. Но творити о них промышление и попечение всеусердное, покоити же их и питати и желание имети. Тако бо нас и Писание Святое научает сице глаголя: (Беседа лист 831) «Ни что же тако может сотворити Христу рачителя и подражателя яко еже промышляти о искренних, но аще и постишися, аще и долу легаеши, а ближним не промышляеши, ничто же велие соделал еси. Но еще далече таковаго образа святаго сия творяи».
Тако бо и Апостол (Зачало 285 сказует глаголя: «Аще кто о своих паче о присных не промышляет и не прележит, веры отверглся есть и невернаго горши есть». Сице и богослов Иоанн в послании своем в предсловии первом, учит глаголя: «Яко не любяи ближняго несть достоин християнскому званию, не может глаголати Христов». Сему же подобно и священная правила согласно сказуют (Зинарь правило 30). «Сын аще хулит отца или матерь или озлобит неправедно, смертию да умрет, понеже родители подали ему свет и живот. Аще ли же покается, о нем содея даст ему закон пол лета, яко да отец его и мати простят чадо свое (правило 106), но точию да отсечется рука его».
И паки: «Аще кто родителя своего оставит стара и немощна, а не почитает ни хранит его, но идет пострищеся, без повеления родителя – анафем таковых чад». Сего ради подобает любовь между собои имети (Беседа лист 2378) «Любовь же таковую имети честную глаголет, не даже до словес, но юже от рождения и воли и еже соболезновати от чиста сердца». Или о жительстве глаголет нравом или преискреннеи любви без нея же никакоже спастися возможно. К сим же и еще подобает ведати родителем благочестивым и Бога боящимся и спасти хотящем, да соблюдают закон сеи.
О нем же глаголет Святое Писание и несть наше сие слово, но точию совет благ всем хотящим спастися предлагаем. Не творим же мы сами от себе разлучение или злобу от родителей на чада, но закон преданныи описуем (Кормчая лист 128) «Достоино есть епископом и причетником свое имение даровати имже хотят, но правоверным християном, еретиком же, аще и сродницы их суть, ничтоже от своих не давати. Ни в животе ни по смерти не оставляти ни инако. Ни како же тем от своего богатьства пребытка не творити. К сим же и ина многа Святая Писания о сем в благовести и в беседах и в Златоусте. Да сего ради потщимся Святая Писания опасно и сохранно соблюдати
Глава 44
О сем еже подобает боятися осуждения. Осуждай брата своего антихрист есть
Тако же подобает всяким образом и многим тщанием блюстися и сохранятися осуждения и оклеветания всякому в православии пребывающему. Да не уподобимся бесом и антихристу, яко же сказует о сем Писание. Нам же подобает преподобнаго безмолвия и святаго молчания, всею силою держатися и от сих страстей свобождатися и многоглаголания блюстися понеже во многоглаголании неизбежиши греха в нем же бы не сотворилося оклеветания или осуждения. А осудитель от самаго Господа наречен бысть Антихрист, а клеветатель наричется бес и жидовин.
Таково бо Писание о таковых глаголет: (Пролог сентябрь 22): «И обратися Господь к предстоящим ангелом и глагола им: «Изрините его вонь, яко антихрист ми есть, прежде бо моего суда, осуди брата своего»». В тои же день и оклеветании глаголет: «Лют убо есть оклеветливыи бред паче бо Дияволу есть подобен. Врази бо суть Богу мерзцы клеветницы и обще причастницы продавших истину и распеншим Господа нашего Исуса Христа.
К сим же всем и ина многая Писания Божественная сказуют и научают всяким образом соблюдати себе от осуждения и оклеветания. Да не уподобимся Антихристу, сиречь Сатане и его бесом. О велии страх и ужас неисповедимыи яко страшно есть, а паче в нынешнее последнее время брещися достоит. Понеже всякия святыни и Божественных Таин лишени есмы. Сего ради и о сем пещися подобает даже бы сохранити себе от всякаго бреда душевнаго, оклеветания ради и осуждения.
Глава 45
О еже не подобает бранитися никакоже
Тако же и бранных словес весма сохранитися и соблюдатися подобает ни матерним словом ни черным, ни жидовином ни бесом, а паче же еретиком, когда нарицати. Весма бо Святое Писание возбраняет и не точию таковым скверным каким словом нарещи, но ниже юродом, по Святому Благовестию, ниже «рака». «Рака» же толкуется по Христову Словеси. Сиречь иже не хощет человека по злобе некоеи именем нарещи, но речет во гневе: «Ты поди, или ты возми или ты сделаи что любо и ино таковое и такови человек повинет будет сонмищу». А иже речет «юроде» повинен будет геене огненнои.
Сам бо Господь рекл есть сие запретительно и страшно зело. Кольми же паче сквернеишею и нечистою бранею нарицати кого, и от того человека Бог отступает. Такоже и смиятися не подобает никакоже ни стару, ни глуху, ни слепу, ни нему, ни глупу, ни юродиву, ни ину какову видением. Понеже и во исповеди о сем вопрошаеми бывают вси приходящии на покаяние. И о сем запрещение и заповеди приемлют кающиися еже бы впредь тако творити. Сказует (Василии Велики глава 8) «Аще кии брат буесловит и безчествует братию и ругается – поклонов 100 до земли полагает». Еще же должен пред ним же оболга и оклевета, славу и честь тому воздати. Понеже и Василии Велики глаголет: (Кормчая лист 611) «Оклеветаяи настоящего оклеветуя Бога и судит Бога, их же суд страшен есть».
И паки: оклеветаяи брата или слыша оклеветающаго, обои отлучению достоини. Сего ради блюдемся опасно сие творити, еже бранити кого или оклеветати или оболгати. Не се бо нас созда Бог даже друг друга браним и хулим и ругаем и оклеветаем себо есть благочестию поносно и благоверию укорительно. А паче же душам нашим зело губительно яко же глаголет Писание: «Всяк гневаяся на брата своего туне, повинен есть огню геенскому». Сиречь бранная словеса вся от гнева раждаются и душу погубляют.
Глава 46
О измывании нага тела своего
Еще же и о сем предлагаем совет. Еже аще кому восхощется тело свое измыти на реце или в дому. То по общему соборному древних отец разсуждению положиша вервицу молитися. Понеже тело свое наго видев своими очима и рукама своима осязая и измывая таиныя уды своя. Того ради аще и обычная предаша отцы еже сие совершати.
Но обаче целомудрия ради и чистоты еще же и сего ради отцы тако разсудиша. Яко аще не бы было разсуждение отеческое то бы и многочастно сотворялося омовение телесное. Еще же к сему отеческому разсуждению и святии отцы согласно с ними наказуют. И житии целомудренно научают и души наши спасают и в страх Божии приводят якоже сами положиша и нас тако житии укрепляют.
Не обнажаху бо святии телес своих и не взираху на них ибо о сем жития их являют. Яко же глаголет Василии Велики (о постничестве Исаака Сирина) «Да не обнажити что от удес своих, ниже коснутися телеси нагу своему или чужему кроме зелныя и великия нужды». Сих же всех предании и отеческих наказании в мире живущих человек и с мирскими пребывающих не возможно соблюстися. Тако во всяких наших нуждах касающихся и без измывания и без свидения тела бытии не можем, то понеже отеческое наказание совершити потщимся, еже за очищение помолитися Господу Богу. А лености ради и небрежения, сего ради предание не оставляем. Но со многим усердием волю свою отсекаем и отеческои воли последуем и не глаголем сего яко себе творити повелевают. Но многим видим и древних святых отец повеления от своего разума крепости ради спасительныя предлагаем. Еже пишется в житиях их «иже сына в реку в вергнути, и другому мяса положити на спине». И на многа душеспасительная и полезная нам оставиша и сказания.
Глава 47
О сем еже соблюдатися играния и всякаго безчиннаго деяния
Еще же подобает всем православным християном старым и юным соблюдати себе опасно. Юным от играния и безчиния и скверности. Старым же от глумления и смехотворения и бесед неподобных. И не взирати всем купно юным и старым на скверныя и нечистыя и богоненавистная и проклятая играния и дела сатанинская и бесовская позорища. Идеже игры диявольския бывают, сиречь скакания, плясания, гусли и тимпаны и свирели и арганы. И прочия вся вражия кознодеиства и песни сатанинския и прочая пустошная козлогласования. Хотящим же всем православным рабом христовым спастися, подобает сих всех бегати яко от змия люта или яко от зверя страшна или огня паляща.
Во истину бо и паче того страшнеише и зело лютеише сего наричет, яко и со идолослужители таковым человек осудится по Святому Писанию, еже глаголет (о лжеучителях) Божественныи Златоуст, подобно и во Святом Евангелии. Где бо Святое Писание повелевает глумитися и безобразовати християном, гусли и прочая от сицевых подобных поганских творити, яко чужа суть Святыя Церкви. Да никтоже прельстит вас сатанинским сим умышлением, како бо их же едино отрекостася и отвергостеся. Паки возвращатися хощет кто, яко же пес на свои блевотины. Ниже и паки глаголет: «Кождо бо нас написано есть и поручение и ответы». И иже от Диявола отвержение, и дела наша и помышления и деяния и глумы и смехи. И вся сия написана гряди судити принесет да како ему хощеши солгати, не бо есть мощно. В руку бо его ты и словеса твоя и всем во истинну яко тако есть и знаем.
Яко кождо нас о себе даст Слово Богу и пожнет кто что всеял, и свое бремя понесет кождо на страшнем суде. Вси бо святии о сем согласно свидетельствуют еже всякаго безчиния и игры и глумления и смехотворения и празднословия блюстися и опасатися. Все бо сие дело бесовское есть яко же глаголет преподобныи Ефрем и Исаак Сирин. И вси святии мнози о сем нас поучают. Сии бо вси игрецы и глумотворцы песнопевцы сынове лукаваго наричутся внуцы Диявола и советницы Сатаны.
Глава 48
О играющих християнских детех, а родителем о сем не возбраняющим
Християном имеющим у себе дети малыя и родителем таковым своих детеи играть не пускать никакоже и на улицы их не выпускать. Понеже аще на улицы будут играти и тако тамо навыкнути. Научатся тамо всякои скверности и нечистоте и блуду и прелюбодеянию и воровству и грабежу и всякому безбожному студодеянию и беззаконию и непочитанию родителем и невежеству и бранным словесем. И тако в таковом их навыкновении чада их погибают и родителеи своих с собою погубляют и геене огненнеи вечно повинни бывают. А родителем их паче чад своих тяжчаишая и велия казнь церковная налагается за небрежение свое чадо не наказует. Их родил есть, и иже Божию страху учит их. Еже по истинному пути християнскому и ошаятися и устранятися от всякаго пути развращеннаго – блуда, татьбы и хищения.
Игры и плясания и неправды всякия, анафема таковых родителеи не наказующих и не учащих своя чада страху Божию. Суд бо страшныи примут и огнь вечныи наследуют со своими чады (Зинарь 106). Их же родиша, зле воспиташа иже аще по любви плотстеи. Чада своя сквернословию учат таковая словеса и примут от них и воздадят ответ в день судныи и паки: «Родителие иже не наказуют их еще от юности воздавати должни честь родителем и стареишему брату и сестре». Таковии родители анафема (Кормчая лист 58) «Аще кто оставляет свое чадо и елико же есть подобно на благочестие ненаказует их, но изветом воздержания небрежет о них. Да будет проклят». Слышите вси родителие и устрашитеся сего наказания святоотеческаго.
И аще кто хощет помиловати себя и спасен бытии сеи чадо свое во учении Христове да соблюдает. И не даст не малы воли во еже бы творити им неподобная яже о них прежде речена быша, но и еще паки Писание сказует: «Аще родителие чада своя не равна любят и не наказуют, но едино любят, а другое ненавидя, или своя имения неравно разделяют им – анафема таковых родителеи».
Сего ради подобает родителем своя чада наказовати и учити страху Божию. Аще кто ненаказует и оставляет своя чада во своеи воли жити, и таковых родителеи нарицает и осуждает Писание. Горе разбоиник осуждается мучитися.
Глава 49
О советующих родителех ко браку
Советующим отцем и матереем детем своим християном же сущим женитися или замуж идти, весьма таковых родителей от церкви отлучати, понеже сами тии родителие, возлюбиша нечестие и скверну и прелесть мира сего. И таковии родители во истинну достоины сут не точию отлучению на лета многая, но и до самыя смерти не приимати их по священных правилам. Понеже сих родителеи велие согрешение паче своих чад брачившихся, превосходит понеже от совета содевается дело.
Священное же Писание на таковых обще глаголет: и родителей возлюбивших прелесть и чад приимших ересь. Пишет бо о сем Григорий Ниский, глава 231, правило 1. «Аще кто веры отверглся ест и бысть июдеи или идолослужитель или манихеи или некии таковыи безбожия образ возлюбив. И потому зазрев себе, и покаявся и обратився время имать на покаяние вся лета живота своего. Да не молится с людми, но особь да молится. И да не причастится Божественных Даров». Аще токмо не в болезни смертнаго ради страха, обличен быв от болезни. И аще оживет да пребудет паки не причастен до кончины. (Номоканон лист 16, Кормчая лист 560).
Тако же и другое писание согласно с сим свидетельствует. Подобно и Афанасий Великий глаголет такоже. Аще ли тако глаголет Писание, то како мы инако разсудити можем или рещи кроме сего Святаго Писания. Аще ли же сии сами женившиися восхотят к нечестию тако приступити, инии же присягу готови прияти, како сии могут убежати Святаго Писания, повелевающего тако. То как сему недостоины будут, яко же о сих рече вопреди Писание. Аще ли же нецыи от них глаголати имут, яко мы Христа не отвергохомся, ниже веру возненавидихом, ниже идолослужители быхом. Мы же к сим глаголем: «Аще и сих всех преждереченных не приясте, но безбожия образ возлюбисте. Потому же слову реченному прежде сиречь прелесть мира сего и скверную и безбожную ересь и ко отверженным християнам приступиша и безаконныи брак прияша, а от мира законным браком почтошася и возлюбиша славу плотскую паче закона Божия. И как не могут сицевыи пострадати. Зри и разсуди разумно и еже к сему слыши глаголющее паки Писание, что прежде сего бысть. Аще и не еретицы священницы венчаша, но точию рукоположении, сиречь ложные священницы.
И тако быв глаголет Писание (Кормчая лист 560). Аще кто от селе повеленная сия нивочто положит и к таковому браку привержет, сеи от церкви отвержен будет вся дни живота своего и неприятен будет в покаяние прежде даже не расторгнет брак. Аще ли кто и сим глаголет, яко сии священници не рукоположении, мы же к сим глаголем: «А еретичестии иереи где руковозложени?». Якоже глаголет Писание (Соборное послание), кто бо рукоположи еретиков во учительство. И аще кто паки укорит нас сице глаголя: «Яко бы от себе сия пишите». Мы же противу того подобно и сего вопросим. И отвещаи нам правильно и праведно и о церкви сеи возвестите. В неи же брак прияли есте есть ли Бог в неи и Божие благословение, и священник и таинства вся Божественная, совершаются ли в неи. И аще в неи сия вся есть. То мы повинни закону обрящемся. Аще ли же несть, том мы вашего разсуждения добраго желаем получити. Но точию мы не можем благочестия смисити с нечестием, и свет со тмою совокупити. Понеже кая часть (по Писанию) верному с неверными и таины от них весьма возбраними священными оными правилы приимати но вся отревати и ни во что полагати.
Аще убо не повелевает Писание верному с неверными пребывати, кольми паче таин еретических подобает удалятися никако же примешати праведным лукавому и чистым скверному. Ниже бо купно бытии со священными, не удобь имея омовену греха скверну. Кое бо причащение свету ко тьме. Или кая часть верному с неверными сего ради и родителеи таковых подобает весма от церкве от всея о Христе братии отлучати и не иметь общения с ними (Евангелие в неделю 24) на да но бо нам от закона еже смешатися с таковыми.
Глава 50
О ядении после павечерницы
После павечерницы ясти и питии отнюд не подобает никакоже, кроме тяжкия и великия болезни. Аще ли же кто тако самоизвольно грех сеи творит да будет наказан от Священных Правил, глаголющих сице: Номоканон правило 102 «Инок после павечерницы ядя и пия, да постится седмицу едину сухоядением и поклонов 200 на день». Аще ли же повелит нужда ясти и питии, второе да поет павечерню, нужду же глаголет точию болящему. Еще же подобает после павечерницы ничтоже глаголати, кроме молитвы Исусовы со умилением и со слезами. Помышляти же себе и вменяти яко мертвеца во гроб полагаема бытии.
Мнози тако вечер возлегшее на ложах своих ко утру же не восташа, но мертвы сотворишася. Сице и еще сему же подобно и запретительно (глаголет) являет святоотеческое предание, сиречь книги их святоизложенныя: Старчество великое и малое, тако же и Сын Церковный сказует: «Егда привлечет нужда ясти после павечерницы, и тогда паки да поет павечерницы другую». И паче же подобает безмолвие имети и в молитве пребывати. Подобает же и се ведати, яко после павечерницы, когда бывает ужина, и тогда не подобает между вечерни и ужины питии.
Такоже после ужина до павечерницы не питии. Аще ли же кто, что и делает и сидит долго, но тако и молится за павечерницу. Сице нам устав жития християнскаго показует, и не токмо в сие время воздержанию учит, но и во весь день питии часто возбраняет, но точию две чаши питии повелевает, нужды ради великия, или трудов ради тяжких. Третию испити чашу и посем терпеть соблагодарением, в терпении вашем стяжите душа ваша. «Да не малодушествуите» - глаголет Господь во Святом Евангелии.
Глава 51
О поминании умерших во вся пятки после вечерни
Еще же подобает всем православным християном, а паче грамотным людем по вся пятки после вечерни, за умерших всех православных християн иже во благочестивей вере скончавшихся, от начала мира даже до сего дни, грамотным людем подобает во многом умилении канон говорити общии за умерших и всех християн поминати. А простым людем такожде подобает канон молитися, сиречь три лестовки. И аще кто реченная исправити потщится со умилением и с сердечным сокрушением и со слезами, сеи участник будет Царствия Небеснаго. И в недра Авраамля вселится со всеми избранными от века богоугодившими.
Яко же глаголет Иоанн Дамаскин «Не толико убо пользует поминанием души умерших, елико паче свою душу приводит ко Господу, и благодать и милость велию приимлет в сии век и в будущии». Да сего ради потщимся елико по силе нашеи творити поминовение, не точию о своих сродницех приносите моление, но и за вся православныя християне. И не точию едины субботы, но и по вся дни аще возможно елико по силе. Аще и не целыи канон, но хотя лестовку или половину или 17 поклонов полагати подобает за вся православныя християны. За нечестивыя же никакоже невозможно ни много ни мало моление приносити, ниже милостыню давати, понеже всюду и везде во Святых Писаниих помяновение о них отречено и милостыня. Сице сказуют святии: «Аще и всего мира и имение даси по нем, никую же пользу сотвориши ему. Но аще нецыи во оглашении скончавшася скоропостижно и тех достоит поминати, не яко же християн. Но тако просто молитися со многим умилением и со слезами, и плакатися о них много подобает, да бы Бог избавил вечнаго мучения.
Тако же и о познавших благочестие и скоро хотевших приити в Закон Божии и внезапу постиже смертныи час, и о сих такоже молитися долженствует. Аще и в Писании сего не обретаем, но обаче советом братским и отеческим благословением за желание и усердие хотящего скоро приити в Закон Божии. Аще же нецыи и ведают о Законе Божии, но отлагают время. Еже прияти веру Христову, аще и всячески возможно в законе Божии бытии, но аще скоро такоже умрут, никако же о тех поминати, ни моления о нем не творити, яко же писано о грешницах. Отлагающии во время на покаяние, таковые не сподоблаются ему. Тако и сии отлагающии прияти Закон не сподобляются прияти милости Божия. О горе! И во истину вправду лютое горе таковым злым человеком.
Глава 52
О сем яко подобает всем християном ждати кончину и како погребати умерших
Слышите братие и сестры о исходе нашем отсюду. (Иоанн Златоуст слово 57). Аще суда онаго не быхом ждали, то никаковы творили о душах своих полезная аще муку не быхом чаяли, то не быхом от греха отступили, и веру быхом повергли Божию. И не молилися быхом и Писания Святаго ни како же не послушали бы. И были бы яко разбоиницы и татие и без страха блудове творили.
Сего ради сотвори Бог смерть и муки вечныя и День Судныи. Да нечестивых и злых еретиков и отступник зле имать мучити огнем геенским, да сего ради умираем. Да живущии покаемся от беззакония нашего, понеже бо Христос Бог наш к пользе нам тако устрояет. Аще бо праведнии преставися то душа радуется чая мзду прияти от Бога на небесех. Аще умрет грешныи, а душа неочистившеся от беззаконии своих о том не тужите приобретоша бо себе сами место нечистое. Яко же изволиша сие и невосхотеша сами себе помиловати и не покаявшееся от злобе своих.
И паки: не весте ли что над умершими творим тако мертвыя провождаем пением и песньми и с фимиамом и со свещами и по них идем, и позади ковчега кадим фимиамом, ногами наперед несем Мертваго во гробе и образ Божии пред ним несем со страхом, хотя малыи отрочишь. Или на раме над гробом умершаго икону поставити и до погребении вертепа нести и тамо да снимится образ с мертваго, с рамени его, и тако прости человецы да погребают и с крестом иже на рамени его иже имел на Диавола оружие и победительство.
Аще епископи и иереи ибо и у тех на ризах нашвени кресты и на рамех их да будут погребены с ними и ко оному жилищу отходят с ними и тако вслед идущее провожаем и плачем, и душу умершего поминаем. И у Господа Бога просим со слезами прощения грехом его, просящее получити, и о себе такоже внимаем и образ от мертваго приимлем и глаголем. Яко ты избежа сего жития тленнаго и к свету истинному отиде.
И на восток образом погребаем, рекше лицеем к западу и к верху лицеем и сложив на раме руце его десную наверх, а левую под десную полагаем и портами новотканными и белыми повивающее полагаем и калиги или лапти новыя обуваем. Тако же стара или мала мужеска полу или женска да погребаем и посем над умершим хлеб пшеничныи раздробляем, сиротам и убогим и вдовицам подавающе по душе (умершаго), отшедшаго от нас. И пенязи нищим разделяем и тогда ему много помощи сотворяем. Приходят бо воздушная клеветницы горних двадесяти дву мытарств. А по отпетии же погребения по 15 поклонов поясных полагаем к Богу о нем, глаголющее молитву сию: «Покои Господи душу усопшаго раба своего имя рек и прочая». И сие трижды глаголем за 15 поклонами. Аще в суботу и в неделю, то полагаем 30 поклонов с тою же молитвою.
Сия же вся творити повелено есть иже в вере святеи скончавшихся и поминати поклонами и псалмы и панихидами со усердием и со слезами. И при исходе душевнем подобает канон глаголати на исход души. Аще ли некому канон говорити, то простии люди канон помолятся поклонами с молитвою Исусовою за раба Божия. И егда по смерти в саван облачат, покадити саван, но и гроб покадити пред положением.
Сия вся творити повелено иже кто во Святеи Вере скончатися имать. О них же подобает весма со всем усердием помяновение творити, сиречь третины и девятины и четыредесятины и годины сим бо помяновением прощает Господь многая и безчисленная согрешения умершему сему християнину.
Глава 53
О почитании наставников и учителеи
Тако же подобает и еще к сим всем в памяти имети, еже слушати и повиноватися наставником и учителем о Господе и не сваритися с ними не злословити. Аще и досадно от них нечто придет, но терпети со благодарением и безгневие возимети во всем. И тако же и заочно боятися подобает Страшнаго Судии Царя Славы. Еже что про них говорити или клеветати или слушати клевещущих. Сам бо Господь о них глаголет: «Слушаяи вас мене слушает. И отметаяся вас мене отметается». И апостола такожде: «Помните наставники ваша, иже глаголаша вам Слово Божие». И паки: повинуитеся наставником вашим и покаряитеся тии бо бдят о душах наших.
А иже кто в чесом хощет противитися или прекословити учителю си, таковыи паки подобен по Писанию: «Противляяися власти, Божию повелению противляется». Ибо вся сия Божественная Писания не о единех священицех глаголет, но о всех купно наставницех и учителех. Ныне же аще и несуть священницы, но наставницы по Святому Евангелию (Неделя 18), тако убо с ним не Галилея и Июдею обыдем, но грады добродетелеи обыдем и не токмо сами делатели заповедем Божиим будем, но и другим будем наставницы и учители.
Тако же паки и об учителех глаголет: (Кормчая) «Учитель аще и мирскии человек будет искусен же слову таковыи да учит». Ныне же слово подобно паки писанное: «Аще и прости человецы, но едина ко святеи вере учители, и на путь спасения наставляют, и заповедем Господним научают и в разум истинныи приводят и о душах наших попечение имеют. И несть достоино сих учителеи, како поносити или гневатися на них или пререковати или клеветати, или заочно про них говорити. Тако бо и священная правила сказуют о сих сице: (Зинар. Правило 186) «Инок оклеветаяи игумена и поношаяи недалече есть от гнева Божия» и таковыи аще покается даст ему заповедь на 6 месяцев, а поклонов по 2000 на неделю.
И не точию же сие еже на духовных гневатися, но на своего брата аще кто прогневается или возненавидит. Сице о сих глаголят священнии правила (Зинарь правило 163 «Ненавидяи человека 2 лета да покается». А поклонов 36 на день. И преподобныи Ефрем в слове 81 «Иже повинуется стареишине рекше игумену, тои ангелы подражает, противляяижеся ему Диявола вселяет в себе» Подобно. Подобно и Божественныи Златоуст отворящих тако глаголет: «Не почитающих и не повинующихся еже о Господе своим учителем и наставникам егда не обрящет ума Божественнаго егда нецеломудренною душею егда не поминает заповедеи Божиих, ниже хранит оправдания его, тогда пленена взем (Диавол) отходит».
Того ради подобно и многая Святая Писания о сем сказуют и научают, еже не злословити и не клеветати никакоже на таковыя. Того ради подобает и нам опасно сие створити, кроме ересеи и раздора. А на погрешительства их не сматряти и не судити. Аще убо веры учение имат развращенно, аще и ангел будет не повинуитеся ему никакоже. И паки: «Яко повиноватися подобает учителем и священником и не судити их». Аще и житие имут укорно, аще же о вере погрешат тако не подобает покарятися им, но отбегати и судити. Аще веры учение развращено и ангел будет не повинуитеся.
Но ина многа Писания о сем равно сказуют, того ради подобает нам зело боятися и страшитися гордыни и выскоумия и не покорения, но всяко смиряти себя и худеиша паче всех вменяти себе и молчание многое имети. Аще же в чесом и сомнение будет, то заочно не судити, но в лице с тихостию вопросити. И аще не будет от него решения, ино рцы паче уменеишему человеку, и с ним пришед побеседуите.
Глава 54
О сем яко подобает благословлятися ко всякому делу
Еще же заповедаем всем православным християном не свои и не свои разум предлагаем. Живущем во градех и в селех и в скитех держати устав и предание древле православныя святыя кафолическия и апостольския церкве. На всяко дело велико и мало, без благословения ни начатии ни кончати, понеже со благословением Господним всяко дело бывает свято и богоугодно и совершенно. Еще же и любовь Божия совершается и гнев братски разрушается. Тако бо нас и Писание Святое научает сице глаголя: (Сын Церковныи. Глава 86) «Внимаите себе и о всяком деле, егда что хощеши начатии, и творити доброе дело: аще молитися Богу и аще востати или ложитися аще ясти и питии или нацижати или уливати и пререзовати или раздробляти, аще затворяти или отворяти, или где когда что не есть, какое дело начинаеши делати и рцы всегда ко всякому делу: «Благолови Отче» и посем глаголи непрестанно молитву Исусову».
Сице бо всегда сотворяи Богом повеленное и святыми заповеданное. Аще когда пищу и питие устрояеши, много тем сладости и вкусу добраго исполняеши. Тако аще и на трапезе сядеши ясти и благословение от отца или старейшаго или от брата благословение восприми и тако со благословением и с молитвою Исусовою и с воздержанием и с безмолвием ястие и питие сотворяи, а не возгнушаися никим же. И в небытие стареиших, аще от юнаго, аще жены благоговейныя и богобоязливыя, еже благословение восприимати, понеже не сами собои, но Богом благословляют.
Тако и Священная Правила повелевают (Зинарь правило 104) «Иже гнушается благословения трапезнаго и не брегии о рекшем, яко молитва подобает прежде вкуса трапезнаго, то таковаго анафема». Слыши зде правильное страшное запрещение. Сего ради святии мнози показаша нам сеи образ, яко же пишет в житии праведнаго Марка Фряческаго. «Егда благословляшеся от преподобнаго Серапиона на трапезе, ангелом принесенная си». И на том помнити подобает непрестанно, еже благословение приимая не гнушатися ни стара ни мала, ни мужа ни жены, но точию были бы верни понеже они ни сами собою благословляют, но Господем Богом.
И тако с Божиим благословением дело свято и приятно Богу бывает. К сему же и еще помнити достоит. Аще начати си есть хлеб творити то прежде начало положити и благословитися. Но и месити такоже, три поклона положити и благословитися. Но стряпания ради подобает начало положити и благословитися, но и по воду и по дрова и по муку и квас разводити и сливати и капусту рубити и со гряд носити. Такоже на стол собирати и по квас ходити и прочее ино начатии дело всякое. И полагати три поклона и благословитися да сие вся помнити подобает и совершати тако реченная вся достоит.
Глава 55
О восприятии иноческаго образа и хранении его опасно
Иноческии святыи образ аще восприял кто будет, или от инока или сам на ся возложити иноческии образ да не дерзнет паки совлещи с себе, но блюдет опасно. Понеже чин ангельски велик есть пред Богом и пред всеми святыми Его. И приятни будут на небесех в славе небеснеи, якоже святии ангели. Яко же есть писано в житии Паисия Великаго: «Егда прииде к нему от Славы Небесныя святыи царь Константин, и возвести ему о иноческом чине, какову славу и честь дарова им Бог». И се ныне в сия времена последняя зело оскуде сеи свят образ, страха ради и гонения и сласти жития сего. Понеже не имамы монастыреи и скитов и пустынь глубочаиших. Но аще и не сие время, но свободное было бы, но и тогда под искусом время не мало в монастрырех пребывали бы и по искусу жития пострещи подобает. Яко же глаголят священная правила: (Номоканон глава 50) «Не достоит без искуса пострещи инока или рясу возложити на него скоростию, но со искусом». Искус же знаемым и местным да будет шестомесячное время или егда увидит игумен изволение добродетели их и прилежания. Аще ли же странни суть и незнаеми в трех летех искус да будет по Божественным Правилам.
Аще ли кто предварив почернитися или в рясу облещися внутрь искуса, аще и кроме страннаго, да не дерзнет совлещи его прочее, но и неволею понужден будет пострещися. Яко же и Матфеи Иерусалимскии во главе 40 глаголет: «Аще ли же кто и троелетием внутрь иноческим кроме молитв одеянии облачаются велико подимет осуждение. Аще ли совлещися сего восхощет яко ругаяся явственнее не наругаемым и не волею в сие поужден будет. И паки Матфеи глаголет: Правило 54 «Отложившаго святыи образ и не исправляющегося не подобает подкров вводити или радоватися глаголати ему, воистинну убо добро есть и спасительно». Чин ангельскии, рекше иноческии в нынешнее страшное и гонительное, последнее время достоит нам оныи образ иночества держати. Яко же глаголет преподобныи Максим Грек в слове 38, сице рече: «К сим убо да вест таковыи, что иноческое житие, ему же желает, ино ничтоже есть, точию прилежно исполнение спасительных заповедеи Божественнаго и поклоняемаго Христова Евангелия, сиречь: «Всяка правда, всяка милость и милосердие и любы нелицемерна, смирение сердечное, кротость целомудрие, презрение богатства погибающаго и славы мирския и чести и тщеславия и всякаго лихоимания отложения». Аще убо кто сих добродетелеи довершит яко же се есть Богу любезно в мирском житии не далече иноческаго жительства и блаженьства. И паки: «Яко же паки обложенныи иноческими платьми аще заповедеи Спасовых и отеческих предании преобидя, безчинне и недостоине ходит и жительствует ниже. И таковыи ризами точию разликует от безчиннаго бельца, по глаголющему апостольскому гласу: «Обрезание ничто же есть, но соблюдение заповедеи Божиих». И сего ради подобает всяким образом внимати и разумевати Святому Писанию.
Глава 56
О молитве еже молитися лестовку после павечерницы
После павечерницы прияхом от отец вервицу молитися. Ибо о сем просим и молим Премилостиваго Владыку и Господа нашего Исуса Христа, милости Его и человеколюбия. Даже бы дал Господь разум истинныи и совершененныи и душеспасительный всем человеком. От начала первейших лиц и высокопрестольных даже и до последних человек Божия создания. Яко же ангел глаголет (Зачало 382) «Молю убо прежде всех творити молитвы и моления, прошения, благодарения за вся человеки да тихо и безмолвно житие поживем во всяком благоверии и чистоте». Се бо добро и приятно пред Спасителем нашим Богом иже всем человеком хощет спастися и в разум истинныи приити. Аще убо Господь Славы хощет всем человеком спастися, кольми паче нам подобает за единосозданное от Бога естество человеческое молитися. Еже ко обращению благочестия, даже бы прославил Господь православною верою и душеполезным спасением.
Того ради и мы о сем молим Премилостиваго Владыку еже бы прити всем человеком в совершенство истиннаго благочестия и праведнаго пребывания, и жития душеспасительнаго, и конца добраго и благаго получити. И райскаго преселения и царствия небеснаго наследовати. Ибо о них и молитвы издревле от святых отец предани суть. Первое во Псалтыри в молитвах 17 кафизмы. Господи, иже суть верни да будут вернеишии, а иже не разумнии, Ты Владыко вразуми я. Иже суть погани обрати Господи во християнство, да тии будут наши братия. Такоже и старчество подобно сказует: «Обрати Господи иноверных от прелести их, да чистою совестию к покаянию и ко крещению придут и послужат ти во благоверии и чистоте». Но и в канонике Иосифа Патриарха в помяннике пишется: «Отступивших от православныя веры и погибельными ересми, ослепленных светом Твоего познания, просвети, Святей Твоей Апостольстеи и Соборнеи Церкви причти».
Но убо святии мнози молишася о неверных, сице пишет в мучении святых мученик 40 и 2 иже во Амории. Реша святии: «Истинну глаголем, яко молихомся о нем ко Богу, да бы просветил потемненные неверием душевные того очи, еже бо познати ему путь правды, и почитати Бога благочестно, приемши истинную Християнскую веру». (Маргарит 10). Тако и в мучении святаго мученика Кондрата. Глагол святыи: «Обаче молитися нам за них (сиречь за неверных) Святое Писание повелевает да обратятся и уразумеют истинну». А паче же о сем молим премилосердаго Владыку, даже бы укротил Господь всяку злобу и лютость и гонение. И вопросы истязания и мучения и даровал бы нам всесильныи Царь Славы мирно и тих и благополучно и душеспасительно житие и пребывание имети. И о сем просим и молим Господа Бога о всем мире еже вразумитися ко благочестию.
И нам во благовременстве благочестие содержати. Еще же и о вразех наших ненавидящих нас и гонящих и обиду велию творящих нам, молитися и о них подобает. По Господню словеси реченному: «Любите враги ваша, добро творити ненавидящим вас и молитеся за творящих вам напасти». Понеже и сам Господь молящееся о распинающих его.
Глава 57
О молитве еже по утрени в праздники и воскресныя дни, по вервице молитися
В воскресныя дни и в праздники Христовы и Пречистая Богородицы и святых великих, молитися после утрени по вервице. За хотящих за нас трудитися и пищу готовити. Того ради понеже не доидет им о чесом помолитися или оутрени или часов или келейнаго правила или молебна. И таковыи недостаток их наполняется оною излишнею братскою молитвою. Ибо они нам помогают в телесных понеже вся устрояют на потребу нашу и пищу и питие. Мы же им елико по силе нашеи духовным брашном наполняем и сие б по священному апостолу: «Друг другу тяготы носите и тако исполните закон Христов». И мы бо веруем исполнену бытии закону Христову. Сице бо зрехом и многажды и испытахом, яко во отеческих книгах, сиречь во уставех обретохом яко за братию труждающуюся оставшая братия в монастырех или в скитах не точию по единой вервице, но и многое моление и молебствование в Церкви и особное за них в келиях моление приносили. Яко же и Никон Черногорский в Тактиконе глаголет (Слово 1). «По отпущении Перваго часа отлучена 3 коленопреклонения велика о милующих и служащих и послуживших нам».
По образу «Черныя горы» тако же и наши идеже аще обретаются общежительная где братьства, тоже повеленныя святыми уставы за труждающихся сотворяют. Сице и мы ревнующее и последующее Отцем нашим прежде бывшим и почившим о Господе. Понеже и молитва согласная сему от Святыя Церкве предадеся верным творити глаголемая сице: «Помилуи Господи труждающихся и служащих нам милующих и питающих нас, даруи им вся яже ко спасению прощения и живот вечныи». И паки: «Милостивее Господи, помилуи раб своих, нас питающих, и сего ради молимся». Да бы Господь Бог даровал обоими нам купно и молящимся и труждающимся преизобильную свою и богатую милость в сий век и в будущий».
Глава 58
О лишении святыя Литургии полагаем двести поклонов
В праздники Христовы и Богородицы и святых великих и воскресныя дни, после часов, прияхом от первеиших древних отец, молитися за лишение Божественныя Литургии с поклонами полагати. Просящи от Господа Бога тоя же благодати и милости и великих Божественных и Пречестных даров насладитися. Тако бо нас и Святое Писание научает. И к сему таинству наставляет. Сице глаголет (Номоканон Глава 8). «Аще кии инок лишитися собора Святыя Литургии да сотворит поклонов 200, исповедаяся греха сего, зане смертен есть.
Паче же аще в неделю и святыя дни лишится кто не брежением Святыя Литургии сего ради и мы, аще достоино и приятно будет Богу, аще не по вся дни, но точию хотя бо святыя дни недельныя и в праздники Христовы и Богородицы и святых великих молитися лишения ради Божественныя Литургии, полагающее 200 поклонов. Просим убо сподобится тому же великому дару от Владыки нашего Бога прияти. Утешает же нас при великои нашеи скорби и печали и в нестерпимои сеи болезни Божественная и Златая уста - великих и пречудных отец сказания, и пресладкия словеса сице глаголющая: «Не сумневаитеся рече и не измнемогите умом вашим, благоговеинии и Бога любящи и души своя. Веруите яко равну мзду и благодать и милость убо за сицевое ваше благоговение и за сицевую ревность и намерение духовное».
Аки бы воистинну уже причастилися и на смирение сицевое неизреченне и благоугодно есть Господеви свидетельствующу и сем и учителю Церкве поучив сими словесы, веру искусил еси. «Пребудите в чистоте, бегаите греха», что вам предложи Церкви Христова: «веруите, стоите, повинуитеся». Заповеди Божия соблюдаите (Глава 21) «От всего сердца любите, и вседушно причаститися телу его желаите». Аще же когда доити сего не можите, то колико будете имети мздовоздаяние, елико в самом Причащении Святом пряли есте.
К сему же и инии мнози святии веселием духовным нас утешают и просити о сем у Премилостиваго Бога молением повелевают и сего ради молимся получити, того же Святаго Дара. Якоже прежде бывши православнии верою сподоблялися слышати и видети и да улучим с ними и мы милость прияти от Господа Бога в День Судныи. Аминь.
Подобает нам братие всеусердно молитися и просити в молитве того же дара - Пречистаго Тела и Животворящия крове его. Ибо видимо сего получити не можем, но не видимо. Сиречь, духовно просим получити от Христа Бога во вся дни до скончания живота нашего. Яко же глаголет и паки Писание: «Егда мощно будет исправити и не исправим, и кто нас пощадит, никто же помилует себе». Егда молимся Богу глаголющее: «Помилуи мя Господи», глаголем к себе и себе помилуем. Сего ради прошение и моление чаем от Господа Бога, богатыи Его дар прияти. И вся бо рече елико с верою просите и будет вам.
Глава 59
О сем яко подобает молитися за всяко ново возрастшее плодоприношение
Еще же подобает всем православным християном за всякое плодоприношение нововозрастшее молитися во единои вервице. Вместо молитв иереиских за всякое снедное, сиречь просто рещи. Что, которое зелие возрастет, лук и огурцы и морковь и свекла и чеснок и капуста и ретька и грибы и губы и всякия ягоды различная и лесная всякая гобина. Такоже и за всяки полевои нововозрастшии хлеб. Кроме единых яблок. Тии бо разрешаются токмо в Преображении Господнем, а прежде Преображения ясти их не подобает. И аще кто прежде Преображения яблоки яст и тому по уставу чрез весь месяц август яблок не ясти.
А за прежде реченныи хлеб и овощ, да не грешит кто еже тако ясти, но подобает всем в Православии пребывающим молитися по Лествице по благосоветию отеческому и со благословением от стареиших иже во всех домех пребывающих. Сие же повеление влечется от времен Клавдия Кесаря Римскаго (Гранограф Глава 79). Иже бе в лето 5776 (268 год по Р.Х.). При сем бысть в Риме папа Евтихий, тои соборне повеле на всякое лето молитвою освящати новыи овощь, всякои хлеб, и потом со благодарением приимати человеком.
Аще кто преждереченнаго не исполнит, сиречь, ни моливы ни благословения, и таковыи повинен будет осуждению по Святым Правилам, сице глаголющим: (Зонарь, правило 102) «Иереи или ино, кто приимет плодоносное не в законное время, сиречь без молитвы и без благословения, и таковаго анафема». И Номоканон такоже глаголет: «Инок ядыи от плода новаго без благословения игумена, да отлучится днеи осмь». Такоже и Кормчая и ина многа Святая Писания, согласно о сем сказуют. И без благословения и без молитвы нововозрастшее плодоприношение ясти не повелевает.
Видиши яко еретицы ничто же тако вкушают, но аще и сосуды водныя наполненыя хлебом и над ним молитвы своя отправляют. Кольми паче нам подобает древних святых отец законоположениея держатися. Леность же и нерадение отложити, и реченное святыми (соблюдати) совершати. И не надеятися точию на едино братское благословение, и не уподобити игумену братское благословение. Тои бо весь освящен богоносен показуется, и не точию словом, но и рукою освященною благословляет.
Не быша бо тогда тако же многая и безчисленая братия, еже от них повелено благословлятися, но от игумен. Нам же не подобает взирати на прочия человеки, не имущих сецеваго исправления, но боятися того преди реченнаго словеси. Еже отлучения и осуждения от Святых и Божественных Правил, понеже не всуе, ниже туне предаша нам святии, но от Божественных Правил узаконоположиша сия творити.
Глава 60
О молении за брашно, еретическими руками устроенное. Понеже мнози святии лучше соизволиша от глада умрети, нежели брашно их вкусити
Брашно от еретических рук сотворенное, тако просто вкушати не повелеваем, и совет таковыи не предлагаем. Но молитвою от Господа Бога освятити и очистити просим брашно сотворенное от них. И потом со благодарением и со знамением Креста Господня вкушати повелеваем. Понеже убо видем многих общающихся со еретики, и брашно взимающих из рук еретических, и ядущих посреде торжища без сумнения. Тако же и вино пиющих без опасения, на скверных кабаках еретических и не вменяющих сие во грех. И соблазняющих о Христе братию и в велии вред душевныи и в грех смертныи приводящих.
И указующих своим не смысльством и не разсуждением и сказуют апостольское слово глаголющее сице: «Вся продаваемое на торжище, ядите ничто же сумнящеся за совесть». Сие слово апостольское вси малоумные человецы и слабии и растлении умом вытвердиша и в памяти то имеша. А оное слово после сего реченное твердейшее и крепчайшее паче всех святых того же святаго апостола и поминати не хотят, которое после онаго слова реченное сице: (За совесть), а Божественный Златоуст о совести разсуждая сице: (Беседа 830) да невредится другии. Того ради и первое слово рече, совесть же глаголю не свою, но другаго. Како будет сие укрепление Братии или утвержение вере. Аще видим иных ядущих на торжищах и пиющих како не соблазнится брат видя сия. Како не смутится совесть кого. Воистинну убо по Святому Евангелию: «Горе миру от соблазн (а паче же), горе тому человеку им же соблазн в мир приходит».
Виждь и паки реченное слово, того же апостола глаголюща: «Аще идоложертвенное есть не ядите». За онаго поведавшаго и совесть ныне же по разуму Святаго и Божественнаго Писания, сам зри и разсуждаи разумно. Како стоит ныне мерзость запустения на Месте Святем и паки: «Таина уже беззакония деется, и сесте ему яко Богу на месте святе и помолятся ему яко Богови святому». И тако паки от части разумеваем от того же Святаго Писания, тому же подобно и Зиновии от Ниловои пустыни (Соборник малыи) яко еретицы служат отцу своему Дияволу и во всем Богови противятся. И паки: «В еретикох дух лживыи Сатанин живет, со злейшими духи нечистыми». И Златоуст подобно глаголет (Маргарит) «Аще и кумир не стоит, но бесове живут». И паки: «Яко же преподобнии святители освящают, тако и еретицы оскверняют».
И аще тако есть и будет подобно по Писанию, кое бо ныне от еретик, освящение брашну произыти может. И аще крещение их сквернение – паче, глаголют святии, то по сему и всякое их действо скверно. Тако и ныне разумеваем и брашно от еретик сотворенное и освящено от них – скверно или паче идоложертвенно. Хлеб и соль и вино и овощь, и кладязь и доми и сосуди и ряды и лавки и всяки харчь окроплением и благословением их. И как не идоложертвенно именоватися будет освящением их и како будет возможно християнину ясти без сомнения.
И аще оное слово приводят глаголющее: «Вся продаваемая на торжище ядите, то подобает и на пир еретически ходити с ними ясти». Тако и сосуда своего с собою не подобает носити, понеже апостол того не написа, что бы сосуд свои носити. И аще тако будет, то не подобает и в дому разделятися от иноверных, но вся за едино имети подобает общение с ними. Во всем и в житии и в ядении и в питии, то которое будет разделение между нами и еретиками.
Аще брашно еретическое чисто нарицати, то и сосуды их чисты именовати, понеже руками их и в сосудех их брашно сотворяется. И свои сосуд посему разсуждению не подобает носити излишнее будет. И златоустово толокование в тех же беседах апостольских глаголет: (Лист 801) «Аще ли кто речет: се идоложертвенно есть, не ядите». За онаго поведашаго совесть и паки глаголет, но аки мерзским удалятися повелевает. Ниже убо аки могущих повредити веруите, ни едину бо крепость с ними, но разнственно причащайтеся. Врагов бо есть безчествованных трапеза. И како нам возможно будет от врагов пищу без сомнения ясти. Оле не разсуждения вреднешаго и не опасныя погибели половину убо апостольскаго слова вси с любовию прияша, а другую же половину и слышати не хотят. Реченное сице: «Аще идоложертвенно есть не ядите».
Понеже и паки таже Златыя Уста глаголют и от скверны еретическия разделяют. Колико лучше еже не дати ему судити, аще убо удаляешися, ниже сих речет. И паки рече святыи: «Тако и мы много вящее посреде мира живущее чисты пребываем». Видиши ли како святыи повелевает посреде мира чистым бытии. Неции же и паки от того же апостола приводят слово писанное, глаголюще сице. Вся чиста чистым, и аще по сему их разуму чиста чистым, то подобает и поганое что без сомнения ясти, понеже чистыи яст, а сего в разум не примут разсудити, яко чистое чистым. А не глаголет сего святыи, аще скверно что яст да будет чист. И паки Златоуст глаголет: «И ниже аще рече ямы избыточествует, ниже аще не ямы лишаемся».
И кроме сего бегательну вещь яви, яко отнюд из удалятися, не себе ради точию, но иных ради. Аще свет есмы и квас и светила и соль, просвещати, а не помрачати, подобает стесняти, а не разслабляти, и како убо именоватися свет и квас, и светило и соль, и не помрачение и не разслабление еже посреди торжища ясти и пити. Или в мирских домах из рук их нечистых ясти или паки из их нечистых сосудов в свои чистыи сосуд вливати и кое будет разделение наше с еретики, но точию то едино, что вместе не ядим. А все едино и сосуды и брашно и руце еретичестии строивши брашно и к чесому будет нам по Писанию привлачати неверныя, а не прогоняти, что убо гониши. Их же привлещи подобает.
Ибо елицы уязвляются егда видя ны возвращающая на сицевая. Видел ли еси коликия вины егда видят ны возвращающася на сицевая положи. Их же ради подобает идоложертвенныя удалятися за не полезное и за излишнее, за братнии вред и из июдееву хулу, за еллинов понос. И се зри зде опасно, что глаголет Писание и к чесому нас приводит во истинну подобно есть рещи паки писанное к крепости нас приводящее. Сице рече: (Беседы) се правило есть християнству пресовершенному се предел опасныи, се верх превысочаишии, еже всем общеполезная искати».
И паки Божественныи Златоуст глаголет: «Не рече яко возбраненных удалятися токмо, но яко изволенных». Егда соблазна будет, виждь зде разума разсудительнаго что глаголет. Яко не точию возбраненных удалятися, но и повелительных. Того ради и паки глаголет Божественный Златоуст: «Никако же подавати вину никому же иже брат соблажняется. Июдеи паче тебе возненавидят и посмеются и еллин подобнее аки гортанобесиву и лицемерну». Виждь зде от чесого соблазна бывает – от того ли что ясти среди народа, сиречь на торжище или блюсти себе опасно и сохранно от смешения сквернаго со еретики.
Понеже и паки святыи отводя от нечистоты, тако глаголет: «Аще нечистое веси прочее, и приемлеши в снедь нечист будеши». Мы же нужды ради презельныя настоящагоради времени прияхом по совету и по благословению прежде бывших отец наших молитися за брашно оскверненное от рук еретически соделанное.
Не брашно убо непщуем скверно бытии, но прикосновения ради рук еретических. Занеже всяко создание Божие добро, ничтоже отметно со благодарением приемлемо, освящается Словом Божиим и молитвою. Слыши и паки, того же Златоуста сказание (Беседы лист 2462). И что есть еже глаголем: «Освящается Словом Божиим и молитвою». Явлено яко нечистое брашно освящается молитвою и молением еже ко Богу. Понеже подобно и Фотии митрополит московский о нечистом брашне сице пишет: (Послание в лето 6925 (1417 год от Р.Х.) «А что сынове пишите, что из немецкия земли приходит что потребное вино или хлеб или овощь. Сынове очистивше то от иерея и потом ясти и пити». И к сему слову, аще кто глаголати начнет: яко подобает священнику освящати, а не нам простым». Речем же к сим и мы: «Аще нам возбраняете за брашно оскверненное молитися возбраним и мы противу сего и глаголем: «Яко и вы не молитеся за оскверненныи от роженицы храм и за кладязь и за сосуд оскверненныи». И на Пасху и на Рождество и на Преображение, понеже вся сия свяенническая деиства, а не простым.
И аще кто не хощет молитися за брашно тои да ничтоже купит с торжища, от рук еретических, ничтоже приемлет. Яко же угодницы Божии: Феодор великомученик и Михаил и Александр Невскии и преподобныи Никон Суханов и Евсевии Веркелинскии и Стефан преподобномученик и инии мнози от святых. Изволиша бо святии умрети от глада и жажды и не восхотеша прияти оскверненнаго брашна или бы не можаху святии Крестное Знамение на себе вообразити, яко же нынешнии расколотворцы глаголют: «Токмо прекрестися и яждь, а не молися». И аще хощеши тако бытии и ничтоже взятии от еретик, то будеши согласен с ними всеми святыми, и не благословен будеши Богом, понеже ничтоже прияти от еретик ни брашна ни пития.
Наше же пребывание зело нужно есть и немощно, и не можем тако творити, яко же святии соделаша, велие опасение они имеях от еретик. Мы же нужды ради и за немощь нашу не можем тако бытии, еже бы с торжища что купити и тако ясти. Но просим и молим Господа Бога молением святоотеческим и благословением их преданным нам да бы освятил Господь Бог брашно от еретик состроенное, а не единым токмо Крестным Знамением. Аще бо едино (токмо) Крестное Знамение освящало вся скверныя и нечистая, то бы не надобно был священник и молитвы священныя еже и храм или кладязь или сосуд оскверненныи освящати. Все бы сие освятило Крестное Знамение, но се нигде в Писании не видехом, ниже слышахом, но точию сему научихомся.
По Божественному Златоусту (Беседа лист 2000) яко Словом Божиим и молитвою брашна очищаются и како нам и чим подобает брашно от еретик строенное очищати, аще не молитвою. И како противницы и единовернии с нами инако разсуждают инии же на леность слагают, еще же инии не убоявшееся Господа Бога и страшнаго его Суда ересью нарицают и зело жестоко укоряют. Во истинну сласть и прелесть мира сего погубила есть и в пропасть бездны адовы низводят. Понеже отговорили себе не точию торжища, но кабаки скверныя отложения ради сея молитвы. И аще от нас противность сия мнится быти и невероятельное свидетельство, то зри сам оную речь апостольскую, реченную юже вы помните сию твердо и толкование на сию речь разсмотрите опасно и зрите со многим испытанием и разсуждением здравым, а своему мнению не последуите, но повинуитеся Святому Божественному Писанию.