И аще бо кто Царь всей вселенней будет, и всеми имении земными обладает, не может искупити душу свою. Аще и все имение вселенныя даст. Ниже мирская вся питания, и красная одеяния, мал покои и утешение душе могут сотворити, егда вечно мучима будет.
Боголюбивии читатели, чтуще сию боговдохновенную книжицу, и аще обрящете вкравшееся при переписи от моего нерадения и невежества, кое любо несогласие с первою книгою, Прошу любовь вашу Господа ради меня простите, и вы от Господа прощение получите, по реченном: в ню же меру мерите возмерится и вам
Переписася сия богодухновенная книжица «Поучение о Христианском житии» из книги собранной от Божественного Писания, тщанием же и труды, настоятелем кинешемских стран Трофимом Ивановичем[1] почившем о Господе во изгнании и истлением прославленным.
Так о сем повествуется в книге «Отеческия письмы», части первой и главы первой, в вопросах к старейшинам Преображенского кладбища в Москве в бытность Ильи Алексеевича Ковылина, в лето 7313 (1805), Апреля в 26 день, и во главе сто второй в ответах ко Алексию Никифорову в лето 7318 (1810), той же книги во второй части и главы второй, в московском соборном ответном письме в Петербург на подтверждение 18 статей изложенных в Петербурге петербургским духовным собранием в присутствии Илии Кавылина и Калины Касцова, о подтверждении и соблюдении христианских обрядов в лето от мироздания 7317 (1809).
И сия книжица по духовному разуму с вышесказанными соборными уложениями прежде бывшими християны во всем согласует, как объясняется в ней же на листе 335, и во истину полезна есть для християн, не словом точию нарицающихся, но истинных християн желающих удалятися от соблазн ищущих спасения своей души. Но особенно в нынешнее от прелести развращенное, страстми обуреваемое и никем же окромляемое время. В несуществовании не точию священных лиц напутствовавших человеческий род в Царство Небесное, но не видно простых, искусных мужей, лобызающих и прочим советующих лобызати и без изменения блюсти предание матери нашия от змия гонимая и в пустыни паримая Святыя, Соборныя, Непорочныя, Апостольския Церкви.
Како гонимая знай!
Сущее: (тайновидца) И даны быша жене две крыле орла великаго да парит в пустыню в мест свое, идеже препитана бяшу ту время времен и полувремени от лица змиина (Древлеписьменный Апокалипсис. Глава 25, статья 152. Пандекты часть 8, глава 81).
Толкование.
Даны быша сей нищей жене, сиречь Церкви Христове две крыле орла великаго, еже еста два Закона, Ветхий и Новый имее сия жена летает утверждающися и удаляющися от еретических учений.
Внемли же где залете! Услышиши яко в пустыню, сиречь, к человеком нехудожным и немудрым, о них рече Господь: «Яко утаил еси от премудрых и разумных и от крыл еси сия младенцем» (Лука, 52). И тако среди из имать бытии питеема даже до воли Господни.
Дозде Апокалипсис:
Инии же пустынею разумеют: християнскую пустынную жизнь, пусту и удаленну от всех мирских сует, без супружну упражненную в неизменном исполнении апостольских и святоотеческих преданий, от иноверных от всех поносную и гонимую. Тамо пребывати жене, сиречь истинней християнстей вере.
Подобно апокалипсическому предсказанию значится и у святаго пророка Даниила. (Книга Феодорита Епископа Кирскаго на видение пророка Даниила. Издание Московской Синодальной типографии. 1816 год. Глава 12, лист 312). «Егда скончается разсыпание руки людей освященных и уведят сия».
Начало и совершение жития християнскаго, как подобает всякому православному християнину житии, и жизнь свою в заповедях Господних совершати, и закон святоотеческий преданный исправляти, а без сего творения заповедей, житии и спастися невозможно.
Глава 1
О почитании праздников Господних
В праздники Христовы и Пречистыя Богородицы и святых великих, и во святыя недельная праздновати подобает яко же устав повелевает, или рещи сам Господь и предание святых Отец, и ничто же в сия дни недельныя неделати ни мало не велико, ниже купити, ниже продати. И аще кто сия законныя заповеди ни во что положит и не будет творити да будет от закона Божия проклят. Яко же глаголет Давыд: «проклятии вси уклоняющиеся от заповедей Твоих». Заповеди же Господня сия преданная нам из начала, яко же глаголет Бог Моисею сице рекии: «Смотрите и субботы моя снабдите, и се есть знамение между мною и вами, и осквернивый же сию смертию да умрет, и иже сотворит вню дела, да потребится душа та от людей своих. Шесть дней да сотвориши дела твоя, в день же седмый покои свят Господу Богу (Числа 15). Всяко иже сотвори в седьмый день дела, смертию да умрет. И беяху сынове израилевы в пустыни собирающа дрова в день суботныи. И рече Господь ко Моисею смертию да умрет человек сей. Сынове же израилевы побиша его камением, и паки глагола Господь ко Израилю: «помни день суботныи (Исход 20). Шесть дней делати и сотвориши в них дела твоя, а в день седмыи да несотвориши никоего дела, ни ты ни жена твоя, ни сын твои, ни дщерь твоя и раб твои, и раба твоя, и вол твои и осля твое и весь скоты твои, и пришлец твои обитая у тебе.
Сему же подобно и от новыя благодати зде сказует (правила святых апостол 1). Аз Петр и Павел апостоли Христовы. Заповедаем рабом Христовым о деланиих человеческих, еже делати шесть дне, в субботу же упражнятися от осмаго часа всем и к церкви прибегати и сострахом бдети молящееся со вниманием, мужем и женам и детем стояти до заутра недели и отпустивши святую литургию и тако в домы своя отходити и почитати до наутрия понедельника, и от второго часа начинати дела своя.
Подобно уверяет и Макарий преподобный, в видении от Ангел Господних. Научаемь еже хранити и соблюдати дни недельныя и праздники Христовы и святых его. А аще кто не хранит и не соблюдает, яко же заповедано есть, сей Господа ни во что вменяет Пречистыя Матерее Его не почитает и святых Его уничижает. К сему же и вся яже в дому своем проклятию сподобляет, и огнем духовным, сиречь, гневом Божиим, весь дом свои сожигает, а душу свою весма погубляет, и вечному мучению повинен бывает.
Зри о сем пространно в книзе Алфа и Омега, во главе 88 и Номоканон правило 158 и Зинарь. В неделех же и праздники завещеваем не делати, но приходити в Церкви, яко же подобает Християном. Аще ли кто делает в тыя дни да отлучится. А Шестой Вселенский Собор глаголет тако: «неточию молитися должни есмы, но и службы Божия послушати». Глаголет убо в притчах: уклонивыи ухо свое еже не послушати закона Божия, сей молитву свою омерзил есть. Аще ли иерей не проповедает Слова Божия, и люди еже о вере жити не учит, да извержется по правилу святых апостол. И паки еще воспомяну преждереченнаго Макария беседовавшего со ангелы. Вопроси святый ангела: скажи ми и о сем, котории преобидят святый день Воскресения Христова, еже есть неделя, отвеща ему ангел: «Горе тем яко велика их ждет мука … и проклятии человецы и в сии век и в будущий».
Глава 2
О светлой недели како подобает всем православным християном праздновати
Светлую неделю, еже есть Воскресение Христово, всю сию светлую и пресветлую седмицу праздновати подобает, и никако же к делу касатися, ни малу ни велику сиречь, работати что. Тако бо и Святое Писание нас научает еже не делати ничтоже во всю светлую неделю. Сице глаголет: (Евангелие о Фоме) и яко же един день и праздник един, неделю всю проводившее. Тако же и Афанасий Александрийский «О сказании святыя Пасхи», сице глаголет: «сей день иже сотвори Господь возрадуемся и возвеселимся вонь». И церковь святая соборне прияла есть, сей день всею светлою седмицею яко един день во единогласии победными пении духовне ликовствовати радостно. Изобразующе осмоперваго века будущаго в нетленном образе всех нас Воскресение и безконечное ликование.
Такожде подобне и соборник великий старописьменный слово на Святую Пасху. Ведому буди всем, яко светлая неделя един день есть и подобает всю сию светлую неделю, яко един день Святое Воскресение праздновати. И паки в другом слове глаголет сице. И того ради верным Отцы святи заповедали всю неделю сию праздновати. И паки ниже в том же слове глаголет, ибо всем верным в чистоте неделю сию за един день препровождати. Сице нам подобает святому писанию последовати и внимати глаголемым от Святых Отец преданный разум, еже нам предожиша, о всем познавати и ведети и обычаем некоих стран невнимати, иже во иных странах, почитают дела всякая творити с полусветлыя недели. И сие зело богопротивно есть, и аще с полунедели делати делание возбранимо есть, то подобает по вся недели. Сиречь, воскресения с полудни не делати. И о сем не буди на сицевых, ни Божие, ни отец наших благословение, ни наш весь братский совет, еже творити тако, понеже посеем зрети подобает, не точию на верныя, но и на отступники благочестия яко тако не творят, яко сии нарицаемии христиане, но тако же всю неделю празднуют, кольми паче подобает нам праздновати и духовно веселитися и всю сию Святую Неделю проводити честно и богоугодно и тако за сие исполнит нам Вседержитель Господь вся благая и полезная душевная в купе и телесныя. И всем изобилием наградив рабов своих богатно и не имут обнищати во веки. Сего ради подобает по святому писанию верным праздновати во свете радостотворном (Афанасий Александрийский) яко свет воскресения, преведение и освобождение от темных адовых пропастей.
Сице подобно и святии апостоли Петр и Павел глаголют (Пролог мартовский день 27). Субботу убо речем создания ради дел, а неделю воскресения ради. Великую же неделю всю, и яже по ней да празднуют раби яко ова страсти ест Христовы оваже Воскресения. Дозде от уставления святых апостол[2]. Но многая святая писания о святей сей недели воскресения Христова согласно всюду и везде свидетельствуют и повелевают всю неделю яко за един день праздновати и торжествовати и во чтении Божественных Писании упражнятися, а дело ни кое ни мало ни велико не подобает творити, понеже за един день положиша святии отцы, всю сию святую седмицу праздновати и ликовствовати духовно, и приходити не престанно к славословию Божию и ко чтению святых и божественных писаний и слушати прилежно со вниманием.
На игры же некия богомерзския и всепагубныя не давати волю младым людем исходити. Аще ли родители волю будут давати, еже на игры ходити, или глядати на играющих и таковыя родители соизволившая на зло и на пагубу своим душам и детем, вси да отлучаться от церкви. И аще будут обратитися от таковыя погибели, то поставити их не на единое начало, но на тысячу поклонов при всей братии. А кланитися до пояса и нижайше, поклонов же земных тогда не полагают, понеже воскресения день, и потом прощатися всей братии и сестрам. И не токмо детем сия поклоны творити, но и родителем с ними. Аще ли паки обратятся на тоже, то отлучити их на шесть недель. И аще обратятся паки, то на тысячу земных поклонов поставити при всей братии, и прощение всем приносити, а в дом так просто их не пущати, и аще не отступно держатся своих обычаев (Кормчая лист 261) и сластем паче работати восхощут нежели Господеви, и евангельского жития не приемлют ни едино нам обще к ним слово. И паки: аще ли нецый рече, неотступно держатся своих обычаев, и не престают согрешати, к таковым ни едино нам общение. Слышим бо от Писания, спасаяи и спаси свою душу. И блюди да не погубиши себе неисправленным приобщаяся, и се зри разумно.
Глава 3
О соборном пении на праздники Христовы
В праздники Христовы и Богородицы и Святых Великих такожде и недельныя дни, сиречь, воскресныя, идеже славословие Божие и служба совершаеся и тако не оное собрание тщательно и неленостно приходити, и собора братии не отлучатися, яко же глаголет Писание (Кормчая. Правила святых апостол 9).
Аще рече несть мощно собиратися в Церковь на пение неверных ради еретик в дому собираемся на пение, по сему же и на многая Святая Писания братский собор еже на славословие Божие собиратися повелеваем и вельми похваляем, яко и рещи невозможно. Зри убо во всященных писаниих, яже о сем Евангелие на Рожество Иоанна Предотечи и неделю 27, и беседе зачало 121, и преподобный авва Дорофей, слово 10 и Никон Черныя горы, слово 1, и во Евангелии в неделю 21, и в книзе о священстве лист 373, глаголет: «идеже аще будут два или три собрании во имя мое, ту есмь посреди их. То аще идеже два или три суть собрани посреде есть глаголет Христос много паче вас.
Иже аще кто о себе моляся пряти не может, сие же со множеством моляся приимет, почто, яко аще не своя добродетель, но согласие многое имать сию крепость, иде же аще будут рече: два или три собрании, чесо ради два, аще бы един был, ту во имя твое то почто неси ту, яко всем вкупе (рече Господь) хощу бытии и нерастерзатися. Сего ради да соградим друг друга, и да свяжемся любовию и никтоже нас да неразлучается, и тако держащееся, вся да творим и руки себя подадим, да похвала наша вы будете, и мы ваша в день Господа нашего Исуса Христа, виждь радость и утешение и похвалу собрания ради еже на славословие Божие.
Сего бо ради всюду и везде в Божественных Писаниях на славословие Божие собиратися повелевает. Тако же и беседе апостольския научают творити: идеже бо суть два или тире собрании во Имя Мое ту есмь посреде их, а идеже Христос нужда Ангелом бытии, нужда Архангелом и инем силам. Видим же и се в Писаниих, яко да время гонения и нужды прежде бывши христиане, не точию в домах, но и на полях собирахуся на службу Божию. Велика убо ест и зело похвальна общая молитва, писано бо есть, елико убо аще рекут едино Господи помилуи с братией, паче тысячи псалмов, еже един стоя и глаголет (Катехизис глава 61, Кормчая 6 собор, правило 81). И никто же может спастися кроме соединения церковнаго, а Церковь глаголется по Писанию – всякого христианина дом.
Священная же правила на отлагающих сея, глаголет: иже за три недели кроме Церкви кто пребудет без великия нужды или напасти, аще причетник есть да извержется, а Мирский да отлучится сие бо есть речено извержение и отлучение за леность и небрежение. Аще ли же кто мудрствовати се будет, яко прятно есть Богу, еже единому молитися не обще и на таковых Писание не обще, и на таковых Писание тако глаголет: (Зинарь 102) Яко аще кто глаголет: «лучше есть на ся молитися, нежели в Церкви, таковаго Анафема и паки. Еже от молитвы и пения уклоняются сами от своея воли, и ходят яко скот, да отлучатся на покаяние лето едино, поклонов по 100 на день. Сего ради молю и припадаю ко всем в православии пребывающим, собора церковного не отлучайтеся и братского совокупления не удалятеся и славословия Божия не уклоняйтеся, но точию потщитеся к началу приходити всякия службы, еще же к сим в смиренном образе приходите, не украшайте себе одеждами драгими, ни покровы красными покрывайтеся.
Глава 4
О круге Церковном, яко подобает всем купно Христианам совершати
Круг церковный всем подобает православным християном отправляти, а без того бытии невозможно никако же, ниже на дело поити, тако же и ясти не подобает, аще сего не отправя, яко же о сем свидетельствует Писание: Номоканон Глава 57 и Зинарь, аще презвитер или инок не чтет 1 часа и 3 и 6 и 9 неже ясти достоин. Тако же и Василий Великий во своей книзе о постичестве глаголет, и всем заподедано бысть, и нужно нашей жизни, показано бысть по естеству и слову, презиратися не подобает воображенная временам молитва. Тако же и Никон Черногорский сказует: внимай себе всегда, и тщися сотворить правило свое, сиречь: часы и еже нужнейшее вечерня, и прочая и паки глаголет: и всегда скорбь имей, еже сия исправляти.
Такоже и епитемейник глаголет (Глава 11). Аще кто достигнет сия вся исправити, со страхом и смирением, и с любовию, и с чистой совестию, той велик будет пред Богом и мзду велику приимет. То есть лествица возводящая на небеса и колесница огненная. Тако же и правила святая глаголят: (Номоканон лист 78). Аще кто презвитер или диякон, или инок вед писания, пренебрежет, утреню и часы вечерню, и аще на пути сыи, а свое правило презирает, да имать запрещение два года поклонов.
К сим же согласно и о вере[3] списатель сказует (Лист 349), а повседневных дней, полунощницы и утрени и часы и междочасия, и вечерни и павечерни, их же вси должни есмы совершати. Также и Фотии митрополит в послании своем глаголет: понеже должни суть вси, сия творити, вечерню и павечерню и полунощницу и утреню, вси правовернии живущии да потщатся совершати. Сим же подобно и Симеон архиепископ селунский во главе 83 глаголет, сия же вся предреченная исправляти повелевает. Тако жде и Филимон отшельник исправляти сия, еже есть: 1-й час и 3-й час, и 6-й, и 9-й, и вечерня и нощныя службы потщися о человече совершати и всею силою соблюдати.
И Макарий великий также же подобно заповедает творити, глаголя: «Да будут убо благоговением Божиим молитвы твоя пречестны и несмутны 1-й, 3-й, 9-й, вечерня и полунощница и утреня, их же должен еси укрепльшей тя благодати Божией всегда совершати. И сие есть добро и благо, и катехизис малый (Лист 29) сию заповедь первую предает. Первая заповедь сия есть: первое на всяк день по обычаю християнскому, подобающее благочестие, еже любо слушати пения в Церкви, или самому отправити усерднее, яко же се: утреню и часы и вечерню и павечерню. Тако же и соборник великопосный в понедельник 3-я недели. Подобает бо всегда Пети умеющим утреню и часы и вечерню и нефимон, и аще кто сего не совершив, тои сам себе лишает света Божия.
Часослов же сказует(Могилевской печати): и о трудных людех како молитися круг церковный, сице: аще ли сего предреченнаго исправити несть мощно или не учен кто книгам то вместо сих да исправляет поклонами земными или поясными, по уставу указания Святыя Церкве, во дни на то уреченныя, и никако же отлагати, аще и зело кто труд великий имать, кроме болезни со одра несходимыя, но и тем подобает не престанно имети молитву Исусову и память смертную и исповедание грехов, а на отлагающих и не исправляющих лености ради своея, тако сказует о сих Писание (Никон Черной горы слово 29). Аще ли кто преступит заповедь сию да будет проклят. Тако же и Нил Сорский (Глава 15) страшно паки запрещает о неисправляющих сего круга церковного. Аще ли кто не имать попечение о своем правиле, да ведано будет таковому (Пролог февраля 10 день) яко поткнулся есть в ересь масалианскую или поткнутися имать вскоре. Тако же убо и о нем совет благ предлагаем, аще которыя и в дороги ездят, кроме нужды, и правило свое реченное оставляю и не отправляют, а возможно бы им и на едином месте пребывати и довлетися трудами своими, и таковии зело душу свою погубляют и зле повреждают. Яко же глаголет о сих Писание (житие христианское древлих писмен).
А иже не имут в себе реченнаго попечения, на всяк день, о своем правиле с разумом, таковии ниже совесть чисту могут стяжати, когда в своем житии, но забвением и слепотою провожают дни своя яко невидяще света, но во тме ходящее претыкаются во всяком деле. И занеже от сего есть безвременное хождение комуждо, и посту разорение, от того же разслабление о своем уставленном правиле. Отсюду паки слепота и помрачение уму, и о сего конечное нечувствие своему неразумению с ними же и ина многа и горшая последуют, о них же мы множае не глаголем, но Божественнаго Писания с великим запрещением отлучают глаголющее: «проклятии вси уклоняющиися от заповедей твоих, и паки, проклят всяк творяй дело Божие с небрежением. Понеже сей презиратель своего правила и свою душу погубляет, а инем соблазн и погибель устрояет. А паче же горе настоятелем, иже сему твердо и крепко не научают и по слабости человекоугодия ради сходят. Тако же и родителем велие горе и мука готовится, иже чад своих имут християн, а о молении их не пекутся. Обаче и ина многа елика такова. Иже сих обличают по всюду не престанно, ко благому нас настовляюще. Сего ради подобает всякому хотящему спастися правила своего келейнаго и церковнаго реченаго о святых отец установленнаго и преданнаго хранити и соблюдати опасно и никако же не оставляти, аще в самое нужное или работное время, но помянати слово реченное Господем: «Ищите прежде всего Царствия Божия и правды его и сия вся приложатся вам».
Глава 5
Об исправлении церковнаго круга простым людем, како отправляти в праздничныя дни
Удобно и сие уставное предание сохранити, всем в православии пребывающим. Еже есть сие. Аще и кроме славословия и праздник Господских и воскресных дне, идеже собор на службу братия собираются, и тамо соборнаго пения и чтения слушати со вниманием, и стояти неисходно, а в простыя дни идеже кто живет, един или два или три во едином дому молитися им подобает купно всем по вся дни вместе за вечерню и за павечерницу и за утреню и за часы, и правило келейное, яко же кто хощет по своему изволению тогда отправляет. Точию просим союзом духовным совокуплении о Христе братия, спасения ради души своея, не отлагати сия уставная моления никогдаже, но правило и церковный круг, по вся дни отправляти неленостно, но тщательно подвизатися. Еще же и о сем совет благ предлагаем, идеже в некой веси или селе, аще в разных домех пребывающии по единому или по два, аще и книжных несть ни службы, то подобает всем купно на праздники и воскресныя дни собиратися во един дом, аще возможно есть, хотя по Псалтыри или молитвами стояти. И се весма добро и благоприятно Богови и похвально благочестию и душам спасительно. Любит бо Господь совет благ и в неразделимей любви повелевает всем купно пребывати. Яко же паки сам Господь глаголет: «идеже есть два или трие собрании о имени моем, ту есмь посреди их, но точию молю и припадаю, ко всем в православии пребывющим не отлагати молитвы и моления на всяк день, еже есть установленнаго предания и святоотеческаго взаконения непременно и неизменно соблюдати, даже до конца потщимся. Но точию сходятся не глумитися, ни празднословити, ни осудити кого, и тако сподобимся благословения Господня получити.
Глава 6
О келейном правиле, его же не подобает оставляти никакоже
Правило келейное всякому христианину подобает с великим прилежанием и усердием многим и со умилением на всяк день исправляти и ни единаго дни не призирати, се бо есть надежда наша спасительная. Сие правление правила путь к Царствию Божию приводяи, се жива творит человека душею и телом, сего ко святей вере крепка и тверда устрояет стояти. Тако убо и писание о презирающих правило сице сказует: (Номоканон правило 87 и Зинарь). Иже кто правило свое презирает и не исправляет таковаго человека мертва вменяет Бог. И аще мертва вменяет Бог таковаго человека, то мертвый чесому потребен бывает, кроме точию в землю погребения. В правду убо правая глаголет Божественный Давид: не мертви восхвалят тя Господи, но мы живи благословим Господа, и аще хощеши жив бытии, православныи христианин, прави правило свое не леностно, еще же и паче сего страшенейшее являет Писание о отлагателех правила своего, тако глаголет (Житие христианское).
Аще кто нерадит о сих и преобидит леностию, или ради вины иныя, таковый да весть: таковый яко со отпадшими церковнаго закону предания, ереси подлежит. Виждь зде и устрашися. Всяк хотяи спастися, страшное и грозное и лютое осуждение яко оставляющаго свое правило со отпадшими от православныя веры причитает и с еретики равно уподобляется паки же о таковых и еще Писание сказует: (Житие христианское) аще которыя умом мнятся молитися, делом же сие не исправляют (ниже) мнятся бо кто Духом молитися, телом же в молитвах линив есть трудитися, таковый прельщает себя. От телеснаго бо раждаются духовная, яко же от гола зерна класс. Так обо упрежают всегда телесная духовных, видимая невидимых. И паки о том же (Житие христианское), что не презирати иноку, такоже и истинному христианину своего ему уставнаго правила. Ниже. Друзии же предавают сие. Колико рече можем, или егда можем творити творим и не яко не имущи в своем правиле спасеннаго хранения, или уставления коего любо, но разслаблении провожают дин своя. Паче же в неразумии, или в не смотрении, яко и Святое Писание о таковых глаголет иже не сматряет дому своего, подобен есть ветру. И паки, иже без разума творит путь свои суетно болит, сиречь порожнее и тщее хождение его и пребывание, но и запрещение о таковых глаголет: «проклят (рече пророк) всяк творяи дело Божие с небрежением». Так обо священная правила о сицевых глаголют: (Зинарь глава 188) иже кто небрежет о дневных и о нощных молитвах, иже совершати их со страхом и трепетом, анафема да будет. Правило же свое подобает отправляти все земное, кроме суббот и недель и праздник великих всия бо дни поклоны точию до пояса полагаются.
А в простыя дни во весь год никогда не изменяются, но всегда земныя полагаюся, но точию правило на изволение коегождо по силе, ов великое, ов среднее, ов же меньшее. Яко же и паки (Христианское житие сказует) а аще кто от сих немогии совершати весь преданный устав, и о половину или частьтретию или четвертую, яко же рече когождо противо своей крепости точию да не ленимся о своем спасении, елико мощно есть. И не сам о себе, или своеволием разсуждает кождо своя уставления, да не будет се но духовным отцем последовати и вопрошати и повиноватися, а не своему разуму внимати. Но точию на правиле своем стояти со страхом и со вниманием (Зинарь Глава 88).
Аще инок самовльно смиется или беседует кроме нужды на правиле своем запрещение да имать поклонов 80. Зде же разсуждение отческое о правиел предлагаемо на произволяющих, ов 300 поклонов земных, и 600 молитв Исусовых 10 лестовок Богородице поясных, да еще 17 стихов6 Богородице Дево радуися, поклон земной. Да страстем Христовым 17 земных: поклоняюся страстем твоим Христе. Да 17 земных ангелу: Ангеле Христов святыи спаси мя грешнаго раба твоего, посем 100 поклонов поясных всем святым: Святи вси молите Бога о мне грешнем. А среднее правило 108 земных, да 300 молитв, да 100 Богородице поясных, да тех по 17, да 100 всем святым. Еще же паки меншее среднее правило, 100 земных, 200 молитв да 100 Богородице поясных, да теж по 17, да 100 поясных всем святым. Еще же правил самое малейшее самым малейшим отрочатам, и вельми трудным людем: 50 земных, да 100 молитв да 50 Богородице поясных, да теж по 17, да 50 всем святым, и отпуст. Сего ради молю и припадаю всем хотящим спастися, правило свое не отлагайте и не забывайте, но отправляйте повседневно, да не забудет и вас Господь помиловати в сии век и в будущий. И аще невозможно будет летняго ради труда (правила) правила правити, ино в зиме летния правилы потщитеся отправити, а без праила не мозите ни единаго дни во весь век жития своего пребывати.
Глава 7
О сем яко подобает всем православны християном приходити к началу на всякое словословие Божие
Всем иже в православной вере пребывающим и не далече живущим от словословия Божия, скоро таковым по призвании или по времени настоящем приходити и спешно тщатися ко всякому началу славословия Божия и всем тщанием к душеспасительному сему молитвенному подвигу, а не отлагати ни мало ни за каким делом, сего ради и Писание тако нам повелевает творити уставы вси великия и среднии и прочия иныя святыя книги: Сын Церковный и Нил Сорский и старчество и епидемейник и Василий Великий вси сии согласно глаголют и повелевают скоро и тщательно к началу приходити всякаго пения церковнаго, и не за каким делом не оставляти и невзирати на иныя человеки нерадивыя и не хотящая спастися, или лености ради, или сна ради или недосужности. Сих бо вся сия молитвы, несть приятны Господеви, по истине по Писанию всем речено бысть, яко начало неискусно и кончина отвержена сих бо всех молитва несть такова от Бога, иже сна ради или недосужности, кто отлагает и не суть подобни яко же с первоначала приходящих, тии бо воистину, велию благодать и милость от Господа получити имут в сии век и в будущий, неции же от нерадивших слово производят – оно чтомое Божественнаго Златоуста на Священную Пасху, яко и последних приемлет Господь, яко же и первых. Сие же слово глаголется не о службе, но о приходящих или в веру или в покаяние. А о службе слыши реченная святыми уставы со с многим вниманием. Того ради и из начала о сем созывати, било и звоны и аще бы сие приятно было моление, последи приходящих, то не подобает быти и благовесту и звону к сему же и вси человецы отлагали на отпуст последняго пения приходити. Еще же и сие ведати всякому хотящему спастися достоит, егда на утрени чтомо бывает первое поучение от Святаго Евангелия, или от инех книг, тогда подобает всем приседящим слышати со многим вниманием, а не исходити вон и накакоже, кроме зельныя и великия нужды, а на прочих статиях исходити нужды ради естественныя единою точию и то свелием себе осуждением и уничижением, и приити помолитися два поклона до пояса, а трети земныи и проститеся пред братиею, а тако просто без нужды никакоже не исходити.
Так обо научает и Писание яко же глаголет преподобный Ефрем (Слово 107) «Не мозите молю вас из Церкве исходити, ниже в неи стояще беседовати ниже часа того служебнаго без страха препровождати, но да стоим со страхом и трепетом, очима долу зрящее, умом же горе возносящееся, и воздыханьми безгласными вопием в сердцы. И аще соблюдем себе опасно и сохраним реченная вся Писания, то примем велию и богатую милость от Господа Бога в сии век и в будущии. Сице убо и се да разумно будет всем, аще нужды ради великия или дальности ради жития, не успеет приити к началу, то последи да вопросит настоящаго, и да возвестит когда прииде на службу, и то повелит ему настоятель помолитися по разсуждению времени. О братия и отцы прошу и молю вас сия вся створити по разсуждению настоящих, а своей воли никакоже предаватися и последовати, но Святым Писанием внимати.
Глава 8
О сем яко подобает скороглаголания в прославлении Божии боятися
Буди о сем ведомо всем хотящим спастися и во благоразумии бытии, и закон Божии чисто соблюдати и заповеди Христовы, и святых отец законоположения разумно сохраняти и себе благоугодна Богови и человеком возлюблена сотворити, и да буди сохранитисяя опасно в чину церковнем еже есть во псалмоглаголании, благочинно и благоискусно, сиречь говорити не скоро и не дерзостно, и по точкам останавливатися, и запятых не забывати, а паче всего Бога боятися и душу свою приводити в страх Божии благоумиленным и реткоглаголанным речением, и человеки слушающия во умилении словес благоумиленных, и слезы мнози от внешняго реткословия испущаху, аще ли дерзновенно и скоро и часто, и без остановления на точках, псалмы и иныя слоавословия, тои не пользует душу свою, но паче погубляет и пользы не малы не приемлет и слушающих сие частоглаголание и ни мало внимающия понеже неразслышаху слвовес глаголания и за оныя неразслышныя сии читатель тако же и еще сугубую погибель приимет за души их. Воистину убо осужден будет таковыи за небрежение свое и слушающих такоже в велию погибель приводит, осуждения ради за глаголание его понеже ничтоже ни разслушают. Оле неразумие погибели онаго, и несть ли се погибель, и по внешнему речению: «Аще кто пред Господином или пред своим братом неискусно кто глаголати будет и се не приимет честь себе, но паче безчестие и поругание и биение подимет, кольми паче пред Господем Богом и пред святыми его за глаголание неподобное осуждение приимет понеже и Писание от сих тако ясно сказует сице: «А о сем нам подобает зело прилежати, чтобы учеником спешно не говорити, но говорити против силы верхняго разума, а от успеха разума учению не будет, и языку учеником великая спона, паче же и Богу досада и душам нашим великий грех, а избирати бы нам лучшая. Зане проклят всяк (рече Писание) творяи дело Божие с небрежением, а грамотное учение вемы яко дело Божие есть. Ниже. И аще сице будите учити учеников, за сие от Бога милость и благословение получите, а от человек похвалу приобрящете, и учеником крепост будет во языцех и в смысле разум, и в речении словес чистость. Подобно и Фотии патриарх антихохийский (Книга Кирилова). В послании 5-м сице глаголет: подобает же яже в словесех, скорости брещися, скорословие в подвижнеческих убо беседованиях и подвигох не удобь пренебрежнонегли. Ниже не доблественно и блазнено в повелниих же и наипаче градских и общих худо и смерено. Сего ради подобает сия вся разумно и нам знати и ведати. Како бы Господа Бога не прогневати, нежели умолити, а паче же свою душу не токмо помиловати, но сею говорею погубити, и милости от Бога не получите, и сего ради блюдемся опасно.
Глава 9
О уставных земных поклонах
Поклоны же земныя, еже положены суть в церковном Крузе, подобает убо никако же презирати или оставляти кроме великих праздник Господьских и Богородицы и суббот и недель и святых великих, в сия бо дни точию поклоны земные оставляются и в правиле келйном и в церковном Крузе, приходныя и исходныя и почестнейшую, сия вся в пояс полагаются, точию после «Достойна» поклон земныи никогда же изменяется пишет бося во святых и богоносных отец 1-го Вселенскаго собора, правило 2-е еже не преклоняти колену во всякия недели и во дни Святыя 50 – цы, такожде и 6-го собора правило 90 – е. Сим же подобно и Никон Чернои Горыв 57 – м слове.
Во всякую неделю и в субботу и праздник Владычныи и Богородицы и Предотечи Рожества и Усекновения и святых апостол Петра и Павла, и Иоанна Богослова и инех святых храмовых и бденных поклоны творит приходныя и исходныя и келейныя, сиречь правило вся поясныя, а во Святую Четыредесятницу и в прочия посты, когда поют «Аллилуия», тогда вси поклоны земныя, точию два дни полагати поясныя. А во Святую Четыредесятницу по вся дни земныя. А на Благовещение аще случится в седмицу приходныя и исходныя и по 4 поклона великия и правило земное. А во весь год и в посты и в мясоястия кроме суббот и недель и праздник, приходныя и исходныя и по «Честнейшую» все поклоны земныя, а в прочая посты – Петров и Филиппов разсуждение отеческое трудным людем, или два дни земныя поклоны полагают вся или во все пять дней по 17 поклонов земных полагати после вечерни и павечерни и полунощницы и утрени и часов, а пост успения Пресвятыя Богородицы, един день точию вся земныя поклоны полагати, а по всем во весь пост, точию приходныя и исходныя и по «Честнейшую» земныя полагати, но точию весма страшно и ужасно вельми священная нам уставы земныя поклоны презирати и оставляти никакоже повелевают, чтобы земныя поклоны никогда не оставлят и не отлагать, яко же о сем являют Писания – Псалтырь учебный и следованный, такожде устав великий и среди сказуют: яко сии земныыя поклоны повсюду вообще всем православным иноком же и мирским предании от Святых Апостол и Святых Отец. Яко же никакоже сии призираеми бывают во Святыи Великий Пост, но да и паче подвигнемся еже исправити сие Святых Отец предание, сиречь коелнное поклонение, якоже устав повелевает, а не разрушати, и вместо света тму возлюбити проклято бо сие есть, и с еретики отвержено таковое злочестие, еже не творити поклонов до земли, в молитвах наших к Богу в Церкви во уреченныя дни, яко же устав где повелевает, а не внимающих и не вницающих и презирающих Святых Отец предание паче же раскол творящих в Церкви Божии, и душа своя и инех в пагубу совводящщих во отлучение от Бога. И паки глаголет: не может всяк слышати благочестив, иже соборной и апостольской Церкве сын, таковаго нечестия и ереси, ниже буди в нас таковое зло в православных.
Яко же глаголют Святи Отцы и да слышат таковии зде о сем написаннаго, не от нас, но от Святых Отец устави сия вся на пользу положихом, а не буди преступник заповеданнаго устава от Святыя Божия Церкве, яко же глаголет Божественный Златоуст, а иже догматы страшныя и неизреченныя погубляяи, сей получит ли ответ и милость, несут сия несут но и самое сие убо, всем есть виновное злым, еже и о малых неивстовствовати, сего ради подобает всем православным християном писанная вся исправляти, и реченная вся совершати да не будем подобны поганым еретиком, тии бо не уведеша ниже разумеша во тме ходят, на нас же Господь просвещение полагает, сице глаголя: «Тако да просветится свет ваш пред человеки, яко да видят ваша добрая дела и прославят Отца Вашего иже на небесех.
Глава 10
О постех Господних и о среде и пятке
В среду и пяток рыбы и масла не ясти, тако же и понедельник всем православным християном подобает хранити, яко же среду и пяток, друзии же тако на произволение свое како восхотят понедельник хранити, но точию блюстися опасно от млекоядения и рыб. Тако же и святую 40 – цу поститися крепко и твердо и крепко подобает, во вся 5 дней единожды ясти, а среду и пяток и понедельник сух ясти сиречь варения не ясти, а суббота и неделя дважды с маслом, а в чеверток и во вторник, варения ясти, а первою неделю и последнюю варения не ясти, но соблюдати спасения ради душевнаго весма опасно, а рыбы точию на Благовещение да на цветоносий ясти. Тако же подобно есть хранити и пост Пресвятыя Богородицы Успения, якоже и во святую 40 – цу, в Филипповский же пост до Святителя Николы ясти рыбу, а во вторник и четверток ясти с маслом, а ясти единою днем во весь пост. Такожде и в Петров пост ясти подобно якоже и в филипов пост до Николы, и паки в Филиппов пост за 5 дней до Рожества Христова не подобает с маслом ясти кроме субботы и недели, пред празднества ради Христова Рожества, и паки в всия посты аще случится когда «Аллилуия», во вторник и четверток, то преложити на среду и пяток, и поститися в сия дни «аллилуиныя» варения не ясти.
И тако подобает опасно и твердо хранити посты Господские и среды и пятки никакоже преступати. Священная правила согласно сказуют нам сице глаголющее: (Кормчая. Святых апостол правило 69): «Аще кто епископ или презвитер, или диакон, или чтец или певец, не постится во Святую 40-цу и дни страстей и всяку среду и пяток да извержется. Сему же подобно и другия многия священныя правила глаголют: (Кормчая лист 19, 59, О вере лист 24, 125. Номоканон правило 125). Изряднее же всяк спастися хотяи, всяку среду и пяток всего лета по 60 правилу Святых Апостол сухоядением и водопитием должен есть совершати, аще ли кто не может за немощ телесную, да разрешает на вино точию, и то с сокрушением сердца, удаляяся рыбы и масла, храняижеся и вина, яко заповеди исправитель мзду обрящет. Вино же зде негорелое разумеваем, но виноградное, тако бо во уставе сказует и Триодь Цветная в навечерии святыя Пасхи: В неимущих странах вина да испивают братия от квасу или меду. И паки святый Афанасий Великий глаголет: «Среды и пятка час учинен есть, излишнее же аще сотвориши, велию мзду души своей приобрящеши, излишнее же есть: среду и пяток не ясти и не питии, а уставное есть хлеба и воды вкушение в 9 час или по захождению солнца. Сие бо воздержание высоко и похвально и зело возлюбенно Богом, во истинну бо честно и похвально и образ вели благочестию (Беседа лист 1505) Закон бо вся писаная творити повелевает, а не творящего мучти яко же глаголет Божественный Златоуст.
Глава 11
О безвременном ядении между обедом или до обеда
Между обеда или до обеда отнюд ясти не подобает понеже сие ядение кроме утаения не бывает, но о всех верных опасение имеет даже бо кто не видел его ядуща, подобно како придет Писанию сию ядь нарещи, яко крадя ясти, и таковыи человек воистину подобен будет таковым и повинен сотворися священным правилом, глаголя сице: «Крадяи овощь епитемии да имать месяц 6 поклонов по 16 на день, такожде и Номоканон второперваго правила 25. Аще кто инок яст кроме братства, да отлучится две седмицы, творя поклонов 1500.
Тако бо нас научают святии воздержанию, и в терпении житие свое провожати. Понеже и сам Господь научает нас глаголя: «В терпении Вашем стяжите душа ваша, да малодушствуйте, и паки: претерпевыи же до конца тои спасен будет. И паки глаголет Писание о таиноядущих (Соборник лист 183) многибо аз, страстьми одержимых видех, здравии быша, единаго же от них таиноядца, или червообядлива зрава не видех, но или отлучившияся воздержательнаго жития. И паки глаголет (Лист 134) да не приимеши советника, змия другим ключем советом крадо водити хотяща, даже яст кроме братства, да отлучится две седмицы, творя поклонов 1500, так обо нас научают святи воздержанию, и в терпении житие свое провождати.
Понеже и сам Господь научает нас глаголя: «В терпении вашем стяжите душа ваша, да не малодушествуйте и паки. Претерпевыи же до конца тои спасен будет. И паки глаголет Писание о тайноядущих (Соборник лист 183) многи бо аз, страстьми одержимых видех, здрави быша. Единаго же от них таиноядца или чревообядлива зрава не видех, но или отлучившияся воздержательнаго жития. И паки глаголет (Лист 134) да неприимеши советника, змия другим ключем советом крадоводити хотяща, даже до вкуса языка, от таины ядения греха хранитися. Аще бот я в мале повредити возможет в ложит тя в борьбу и содержит тя язвою малою, убо всех вас возлюблении, и ко всем припадая прошу от сея страсти и лютыя язи и бы всем удалятися и весма опасатися и хранитися от безвременнаго ядения таинаго и явнаго, но убо тинное ядение зело страшно есть возвещено о нем от Святаго Писания, но еще легчаиши явнаго, то и бо грех едину точию душу губити согрешившаго, сей же грех многи души погуби соблазна ради.
Брежет нас Святое Писание и на путь правыи наставляет спасению да вкуса языка. От тины ядения греха хранитися, аще бот я в мале повредити возможет и в ложит я в борьу и содержит тя язвою малою, убо всех вас возлюблении и ко всем припадая прошу от сея страсти и лютыя язи бы всем удалятися и весма опасатися и хранитися от безвременнаго ядения тинаго и явнаго, но убо таиное ядение зело страшно есть возвещено о нем от Святаго Писания, но еще легчаиши явнаго, то ибо грех едину точию душу губит согрешившаго, сеи же грех многи души погуби соблазна ради.
Брежет нас Святое Писание и на путь правыи наставляет спасению да последуем стопам его, даже от Господа великия милости и здравия душевнаго и телеснаго сподобившееся понеже к семи и се ведети, яко сеи грех зело тяжек есть. Понеже и еще явит нам о сем Писание о некоем старце ядущем таино, и змию преден бысть на снедение, и тако умре, погубив своея души пользу. Другии же брат такоже творящее крадыи ядяше, но о сем сказует преподобный авва Дорофей: «И исповедаша преподобному сие свое согрешение, но обаче того злаго обычая не оставаше зрите кое окаянство, которое страдание ведяще яко зло есть творит, и скорбше и плакаше, но да последуем стопам его. Даже от Господа великия милости и здравия душевнаго и телеснаго сподобившееся понеже к сему и се ведети, яко сеи грех зело тяжек есть. Понеже и еще явит нам о сем Писание о некоем старце ядущем таино, и змию предан бысть на снедение, и тако умре погубив своея души пользу. Другии же брат такоже творяше крадыи ядяще, но о сем сказует преподобный авва Дорофей: «И исповедаша преподобному сие согрешение, но обаче того злаго обычая не оставаше зрите кое окаянство, которое страдание ведяще яко зло есть творит, и скорбяше и плакаше, но обаче привлачим бываше окаянныи злым обычаем, мнози же ныне глаголют несмыслении человецы, яко мы не в таине ядим но видимо всеми, и хотят тем оправдатися, а не ведят сего сии соблазнители и прелестницы, яко и паче злеише согрешают таино ядущаго, понеже многих смущают и в погибель велию приводят поистине сей злыи обычаи велию пагубу душам сотворяет, яко и паки глаголет погибель.
Веруйте братие яко едину стасть аще кто имат во обычаи подлежит муце. И научает яко сотворит кто десят дел добрых и един зол обычаи, и одолевает оно едино еже бываемый злыи обычаи десятим добрым. Того ради и нам подобает всяким образом блюсти себе опасно от таиноядения даже бы невпасти нам змию лютому, сиречь Дияволу на изъядение. Тако же и недузи мнози от сего таинаго ядения раждаются и погубляют человека.