Бог превечный, не имея ни начала, ни конца, неизреченною Своею мудростию, яко восхоте и сотвори, создав бо человека от земныя персти и святым Божественным писанием ограничив его. А еже праотец наш, Адам, из границ, назначенных ему, выступил, за то тлению и смерти подпаде: за преступление единыя заповеди 5533  лет пребысть в тлении и в смерти род наш. Егда же восхоте Бог избавити нас от работы диавола и просветити землю Своим познанием, посла Бог Сына Своего Единороднаго в 5500 лето, возсия солнце правды, Христос Бог наш от Пречистыя и Пренепорочныя Владычицы нашея Богородицы и Приснодевы Марии, и просвети светом познания вся человеки. И паки Святым Божественным писанием ограничив, постави седмь столпов вечныя правды, и повеле всякому, верующему во имя его, созидати храмину свою на оных седми столпех.

Аще бо кто в той Седьми Вселенскими Соборами утвержденной правде пребудет, спасен будет, а кто отступит, или в чем нарушит, погибнет во веки. Егда же по тысящи лет, развязан бысть сатана от темницы своея, изъиде и нападе на великую монархию Римскую, и поколеба и разруши оное седмистолпное утверждение, и паки на второй Рим прииде по 1600 лето, а в 66 л. и Россия тому же падению поревнова, и тако исполнися число зверя 1666 лет. В то время Царь Алексей Михайлович с Никоном отступи от Святыя Православныя Веры, и всю Церковь Божию от всего благолепия обнажив, и бысть, вместо владыки, мучитель, яко же свидетельствует Апостол в зачале 275: "Прежде приидет отступление, потом человек греха, сын погибельный", Антихрист. Прежде прииде отступление от святыя веры Царем Алексеем Михайловичем по числу 1666, а после его в третьих на престоле возцарствова сын его первородный, Петр, от втораго беззаконнаго браку, и той помазася на престол Всероссийский законом Жидовским от главы до ногу, показуя, яко ложный есть Мессия и Лжехристос, яко же пророчествова о нем Сивилла, яко же имать царствовати Царь Жидовский. И той Лжехристос нача превозношатися паче всех глаголемых Богом, сиречь помазанником, и нача величатися и славитися пред всем, гоня и муча Православных Християн, истребляя от земли память их, распространяя свою новую Жидовскую веру, и Церковь во всей России.

В 1700 году возобнови, по совершенном своея злобы совершении, новолетие Янусовское, и узаконив от онаго вести летосчисление, а в 1721 году приял на себя титлу Патриаршескую, именовася Отец Отечества, яко же свидетельствует книжка "Царство мертвых" (лист 115), и Глава Церкви Российския, и бысть самовластен, не имея никого в равенстве себе, восхитив на себя не точию Царскую власть, но и Святительскую и Божию, бысть самовластный пастырь, едина безглавная глава надо всеми, противник Христов, Антихрист. На уготованное ему место Царский престол приде по числу своему во свое ему время, на кончину времен; ибо Петр Великий всея воли и злобы Сатанины исполнитель, родися по отступлению св. Веры, в 1672 г., от Царя Алексея Михайловича, неимеющаго уже на себе Царскаго достояния. Яко же бо он преступи закон Божий, яко Иуда предатель от лика Апостольска отпаде, тако и той отсечеся от колена Царскаго, яко же Кирилл Иерусалимский, в знамении 10 пишет: "Ни от Царей, ни от Царскаго рода, воздержит Царство, но прелестию восхитит власть"; тако и той несть отча и дедина престола наследник, восхотел престола Римскаго, сиречь, приемник Римския веры, яко же дивия лоза отсечеся от винограда, от св. Православныя веры, и родив сего сына погибельнаго, Петра, от вторыя жены, Натальи Кириловны, яко свидетельствуют о том Анекдоты, том 10: егда бо сочетася Царь Алексей Михайлович вторым браком от фамилии Нарышкиных с Натальею Кириловной, в 1672 году, Августа 28 день, на память честнаго и славнаго Пророка Крестителя Иоанна, и зачат сего сына, Петра, в ту нощь, небеса же комету в себе показаша, юже волхвы усмотревше, Симеон Полоцкий и Дмитрий Ростовский, и в день 29 по утру приходят к Царю в палату, яко же волхви ко Христу, и поздравляют его с зачатием сына и нарекают имя ему Август, яко от Августа месяца приял зачатие, и по образу Августа Кесаря возобладает. И паки Пахомий Великий: "Да будет и Петр камень: той бо Скифския народы обладает"; изволяяй, да чтет о том Анекдоты, том 10. И тако той мучитель, Царь Алексей Михайлович, скончася в 1676 году.

А после его в третьих воцарися на престоле Всероссийском, сын беззаконный, Антихрист, противник Христов, вознесеся и возвысися паче всякаго глаголемаго Бога, яко же Кирилл святый, в знамении 8 и 9 свидетельствует. "Аще ты же зри, что уже было и что еще имат быти", яко св. Пророчицы прорекоша нам многообразно оком, познаваем, яко от тех лет, по числу 1666, конец прияша проречения их, а совершенное же всея злобы исполнение исполнися на Петре, яко Даниил в главе 7 глаголет: "Зверь четвертый горд и страшен и ни единому неподобный, всю Божию и святых его истину восхощет превратить, злыми делы и всех первых превзыдет, и святая вышняго смирит, и помыслит пременити времена и закон". И тако обновится и укрепится новая вера Жидовская новым помазанником ложным Мессиею, противником Христовым, Петром, его же злобы и хуления на Бога Вышняго не достанет ми время вся подробну поведати, и Даниилово пророчество исполнися на нем: "отверзе уста своя зверь той в хулении на Бога Вышняго"; нача себе величати и славити, возвышаясь над всякаго, о возобновлении в 1700 году собра весь свой поганский синклит, в 1 день Генваря месяца, и постави храм идолу Ветхо-Римскому, Янусу, и пред всем народом нача творити чудеса, чрез диавола, под видом фармазии, и вси воскликнуша ему единогласно: "Виват, виват Новый год!" и от того дни разосла своя Указы во всю Россию, повеле праздновати Новое Лето, яко же Господь наш Исус Христос во осьмый день по Рожестве обрезание приемлет по плоти, исполняя таинство, яко же свидетельствует канона песнь 1 ст. 2: "Сице обрезание приемлет, Христе, своего Рожества вечную сень отрясе, свет возсия новыя благодати"; тако и той лукавый льстец, в той же день, по исполнении своея злобы, возвещая им свою новую благодать.

И паки стих 6 песни: "Прият кончину закон, отнележе Христос младенчествовал исполнитель закону сый, обрезание прият законную клятву"; тако же льстец исполняя свой весь погибельный закон, и разрушая законную Святых Отец клятву, иже на первом Вселенском Соборе положиша праздновати Новое Лето в 1 день Септемврия месяца: "Аще кто инако начнет творити, да будет проклят". Он же, змий лукавый, разрушая сию законную клятву, исполняя свой пагубный закон, во осьмый день таинства Христова, и той исполняя свое таинство, нача праздновати Новое Лето. И паки песни 8 ст. 1: "Во осьмый день обрезывается владыка, Исусово же именование приемлет, яко миру есть Спас и Господь"; тако и той, сын погибельный, Петр, при оном своем Янусовском собрании, поздравлен и принят за Императора Августейшаго, сиречь, надо всеми обладателя, яко же свидетельствует Ипполит: "Но всему хочет льстец уподобитися Сыну Божию". Оле беды жизни нашея! О благоразумная чета! Вонмите зде, кому ежегодно празднуется Новый Год, то несть, а и сим сущим идол храму, со вседержителем, ратующему, Петром устроенному, со идолом Янусом и странным осьмотысячным Сатурном. И како зрим на сей день идолопоклонение с поздравлением Новаго Лета, и мы вси в чьих летех жительствуем? Не всякому ли в производстве письменных делах, а наипаче таковаго Новаго Года, свободно путь провождаем, по данным пашпортом именем Сатаниным? Оле беда! В каковой силе от Духовенства, при открытии Янусовскаго сего года, проповедь? ибо все Господни лета истреблены, а Сатанины извещены.

Воистину исполнися здесь тайнозрительное откровение и власть перваго зверя всю творити пред ним, и творяше землю, и вся живущия на ней, да поклонятся первому зверю, Сатане, глаголя: "Реши мое дело, покорно прошу пожаловать пашпорт!" он отвещает: "Отдай подушное с Новаго Году, и еще нет ли иных недоимок, ибо на моей земле живешь". Оле яма глубока погибели рода человеча! Патерик Азбучный глава 4: "Во Антихристово время удалитися и бегати от еретических жертв прескверных, по Христову словеси реченному, да не тщатися кто, рече, в Антихристово пришествие снабдети душу свою, в мире живущи, погубит ю, не покорився мучителю животолюбия ради, понеже во днех оных тело и кровь Христово не имать явитися"; понеже писано во Откровении Иоанна Богослова, во главе 12, яко "церковь побежит в пустыню от града прелестнича"; а церковь правовернии Християне, истиннии раби Христовы, побежат в горы и в вертепы, и пропасти земныя, от Антихристовы прелести, и спасутся; аще не тако, то вси уловлены будут злокозненным Антихристом и погибнут вечною погибелию. Аще пойдут дерзновенно пред мучителя и страдати имут по Христове вере неуклонно, а не покорятися мучителю, животолюбия ради, чтобы вечною погибелию не погибнути, а в мире живущии, с миром конечно вси уклонятся в прелесть Антихристову и погибнут, а не спасутся никакоже. Книга Кормчая лист 6: "Патриарше имя ничто же именуется, токмо отцем отец, или истее рещи, отценачальник, сущим под ним глава и пастырь и святитель крайний или высочайший, еже убо во Грецех глаголется патер, т. е., нашим языком отец, арх же начало, вкупе рещи отценачальник". От Псалтыри толковыя сице: "яко се врази твои возшумеша, и ненавидящии тя воздвигоша главу". Толкование Кассиодорово: "Сей стих ко временам Антихристовым прилагается, егда врази Божии воплемыми развращении возшумят". Восшумеша бо, рече, и не рече, глаголаша, да их нарекут словеса человеческа быти, иже гласов словесных не имеша: глаголется воздвигоша главу во всем безумным, едина глава есть Антихрист, сущее реша: "приидете, потребим, и не помянется имя Израилево ктому".

Толкование Кассиодорово: "и таково умышление иметь будет Антихрист, да Християнское имя от вселенныя земли загладится". Из книги Мефодия Патарскаго от слова 63: "В последнее время вопросят дани от мертвых, яко и от живых; в то время людие отрекутся Православныя веры, и св. Крещения, и Честнаго и Животворящаго Креста Господня, без мук, и без ран, и без биения, а нехотящии тогда отрещися от святыя истинныя Православныя Веры, и св. Крещения, и Честнаго Креста Господня, оны в домах своих сожигающеся, а иные в реках и во езерах утопающеся, а иные с храмин убивающеся, и сих вменит Бог в мученики". Из Гранографа: "Тогда святии бегати будут от востока на запад, от запада на восток, иным же крыющимся по горам и пещерам, везде же их мерзости гонящи по земли и по морю, погубляя их всячески, изгоняя из миру, не могущи им ни продати что от своих, ни купити, аще не имать зверина знамения на челе, или на руце, вси бо тогда от своего места изгоними будут, от домов своих, и от градов своих в темницы влечени будут; глаголет Господь: "Молитися, да не внидете в напасть, ниже бегство ваше в зиме будет, ни паки в субботу"".

Господи Исусе Христе, Сыне Божий, помилуй нас, верующих в Тя, и помози нам, грешным, соответствовати вопрошающим нас во имя Господа нашего Исуса Христа. Объявляем вам, председящии вопросители или судители сих времен. Днесь, аще убо есмы Христиане, веруем в Господа нашего Исуса Христа и Спасителя миру единомысленно и единодушно со святыми Отцы Седьми Вселенских Соборов и Девяти Поместных, и со св. Отцы Соловецкия обители, пострадавшими за древнее благочестие и за исповедание правыя веры при Царе Алексее Михайловиче и при Патриархе Никоне, в лето 7177. Того исповедания и мы держимся и Христа Спаса нашего закон и повеления соблюдаем. Того ради и в книги законопреступнаго повеления писатися не хощем, и в силу Указа вашего Императора и его законоуложения и ревизии не пишемся, да и писатися никогда не хощем, понеже видим во Святом Писании, яко прежде бывшии в России благочестивии Царие, Иван Васильевич, и Феодор Иванович, и Михайло Федорович, и Алексей Михайлович, бывшии при благочестии до Никонова Патриаршества, яко сии вси народнаго исчисления от мала и до велика, мужеска пола и женска, живых и мертвых, и всего обще человечества описания не творили, и оставляли то в судьбы правительства Всемогущаго Бога.

Егда же, по пророчеству Ездрину, отломися от винограда Христова лоза, сиречь, от Царскаго благочестиваго племени и от веры Православныя, юже содержаще вси Царие благовернии, Алексей Михайлович отступиши и всю Церковь Христову от благолепия обнажи, и вся предания святоотеческия разруши, и бысть вместо Царя мучитель, вместо владыки ратник, на самаго Царя Небеснаго рать воздвиже и на православных Християн велие гонение, и тако томя многих, и муча, и смерти предая, истребляя в России Православну Веру, и тако зле скончая свой маловременный живот; изволяяй, да чтет о том Историю Соловецкую. А после его в третиих возцарствова сын его первородный от втораго беззаконнаго браку, Петр, и помазася на престол Всероссийский от Рима, Жидовски, по закону Римскому, от главы и до ногу, и егда же, по пророчеству Даниилову, вовысися и возвеличися над всякаго глаголемаго Бога или чтилища, сиречь, помазанника, Царие бо, Иереи и Архиереи, по Евангелию, Христи именовашася, и той лжехристос и помазанник Жидовский, Царь прииде на престол Всероссийский в 1721 году, приняв на себя титлу Патриаршескую, назвася Отцом Отечества и Императорства Августейшаго и обладателя многих стран и народов, и так нача паче меры возвышатися той лжепомазанник, и восхити на ся, не точию Царскую власть, но и святительскую и Божию; яко же Папа в Риме, тако и сей лжехристос нача гонити и льстити и искореняти останок в России Православныя Веры, и свои новыя умыслы уставляя и новая законоположения полагая, по духовному и по гражданскому расположению, состави многи регламенты и разосла многие указы во всю Россию с великим угрожением о непременном исполнении оных, и устави Сенат и Синод, и сам бысть над ними главою и судиею главнейшим, и тако нача той глаголемый Бог, паче меры возвышатися. Той же лжехристос сие содела от гордости живущаго в нем духа, учини народное описание, исчисляя вся мужеска пола и женска, старых и младенцов, и живых и мертвых, возвышаяся над ними и изыскуя всех, дабы ни един мог скрытися рук его, и облагая их даньми велиими, не точию на живых, но и на мертвых. Таково тиранство учини и с мертвых дани востребова, сего и в древния времена бывшие мучители не творили. И тако, по описанию Мефодия Патарскаго сбыется: "в последнее время вопросят дани от метвых. яко и от живых".

Егда же той Император, или Монарх, сиречь единоначальник или единовластитель, народное описание учини, называя то ревизиею или исчислением душ человеческих, которыя приняли его за Императора или повелителя и за единовластнаго правителя и пастыря, яко же свидетельствует книжка "Дополнения его Деяний"; изволяяй, да чтет тамо. Мы от Христа Спаса научихомся закон и заповеди Его сохраняти и Веру святую блюсти, и таковому лжехристу в послушество отдадитися не хощем, и в книги его законопреступныя писатися с нечестивыми никогда не будем, да и хотящим спастися никому не советуем. Творите с нами, что хощете, ибо есмы Християне единаго исповедания Седьми Вселенских Соборов Святых Отец и святых страдальцов Соловецкия обители, пострадавших за древнее благочестие того исповедания и мы держимся и в книги ваши законопреступныя, гражданския описи, с нечестивыми не пишемся, ибо мы от святаго крещения записаны есмы в книги животныя у Царя небеснаго на небесех.

Зрите, человецы, и вонмите и разсмотрите по Писанию, в коих летах жительствуем и кто ныне обладает вами; ибо дух Петров царствует во всех до скончания века, яко свидетельствует книжка "Кабинет Петра"; ибо дух Государей Российских есть дух Петра Великаго и есть дух самаго Бога. Зрим, како дух его богоборной во всех властодержцах действует и действовати будет до скончания века, егда приидет Господь с судом вселенней, и убиет таковаго гордаго властителя духом уст своих, и упразднит злобу его явлением пришествия своего, яко же пишет о Нем св. Апостол Павел в зачале 275 сице: "Яко аще не приидет отступление прежде, откроется человек греха, сын погибели, противник, и превозносяся над всякаго глаголемаго Бога, или чтилища". Разумеем по Св. Писанию, что глаголет: "аще не приидет отступление прежде, и откроется человек греха, сын погибельный, противник", Антихрист. Прежде прииде отступление Царем Алексеем Михайловичем в 1666 году, и потом по отступлении его от веры Христовы, скончася супруга его, Марья Ильинишна, и поя себе в жену Наталью Кириловну, и сочетася браком законопреступным, и роди сего сына погибельнаго, сиречь, противника Христова, и всего благоверия разрушителя, яко же толкует Иоанн Златоустый, святый учитель: "Кто убо сей есть? Убо ли сатана?" и разсуждает сице: "никакоже, но человек некий всякое его приимет действо", сиречь, Сатанино действо восприимет богопротивно, и ополчися на завет святый, яко же и Даниил пророк о четвертом звери в видении пишет: "Зверь четвертый горд и страшен, ни единому не подобный, ополчися на завет святый, времена и закон пременити размыслит; кто разумеет тайныя его ловитвы?" Петр Великий, всея злобы исполнитель, Богом преданный на первом Вселенском Соборе Индикт или Новое Лето, преведе с Септемврия 1-го на Генваря 1-е число, в славу свою и в честь имени храма Янусова. Оле великая неразсмотрения!

Како сей дерзну завет святый нарушити, иже Св. Отцы установиша, Индикт, превратити, и именова себе Монархом Августейшим, по образу Августа Кесаря единовластвующаго на земли! И тако той лжехристос, восхитив на себя Царскую и Святительскую власть, и вступи на высочайшую степень Патриаршескую, яко свидетельствует о том изданная им книга "Регламент Духовный", лист 3, в 9-ти пунктах: како и для чего уничтожи Патриаршество, дабы ему единому властвовати, не имея ровна себе, но, вместо того, устави Синод или Синедрию, содержащую в себе правления духовных лиц, имея в себе 12 членов, 4 Ассесора, 2 Президента, 2 Вице-Президента, и утверди их седьмоклятвенною присягою, дабы, кроме его единаго, никаких дел не творити, но имели бы его единаго превысочайшею главою и судиею всея Церкве; и тако, по Ипполиту, совершен собор ученик себе восприят по образу 12 Апостолов Христовых, и сам един безглавная глава, превозносяйся надо всеми, яко же и Ефрем Святый пишет: "Вси вкупе во единой воли будут".

И паки той же лжехристос, восхищая на себя Святительскую власть, именовася Отцом Отечества, ибо Патриаршее имя именуется, по слову Правыя Веры (гл. 19). Отец Отцов всего света; тако и той именовася Отец Отечества; и паки: восхищая себе превысочайшую славу Сына Божия, первенство Господа нашего Исуса Христа, яко свидетельствует Апокалипсис глава 1: "Аз есмь альфа и омега, первый и последний, не имея ни начала дней, ниже конца веком"; и тако той лжехристос, восхищая на себя славу Сына Божия превысочайшую, именовася Петр Первый, и прочие по нем тако же именуются. И паки именовася Божеством России, яко же свидетельствует книжка "Кабинет Петра", лист 2: "Он Бог твой, о Россия! Он члены взял в тебе плотския, сошед к тебе от горних мест"; ибо он древний змий, Сатана, прелестник, свержен бысть за свою гордыню от горних Ангельских чинов, сошед по числу своему 1666, взяв члены себе плотския, яко же Св. пишут Ефрем и Ипполит: "Родится сосуд скверный от жены, и Сатана в него вселится, и начнет творити волею своею". И Андрей юродивый в 44 пишет: "Сотворит ему Господь Бог сосуд скверен и скаредия исполнен, и возмужавшуся человеку его, лестию приемшу царство". И тако той, по Святых проречению, скверный сосуд, Петр, родився 1666 от беззаконнаго новаго Жидовина, Царя Алексея Михайловича, а Сатана в него вселився сам собою, но онаго воли нача действовати. И паки: той же лжехристос, возвышаяся над покорившимися ему заручною грамотою, присягою и целованием креста, именовася Император, сиречь, тем, кои приняли его за истиннаго пастыря: "образ приимет прелестник, хищный волк скрыся в овчую кожу и скры пагубное свое имя под литерою М, а прочий слог по азбуце содержит число имени его 666 Император; в оном слове, кроме излишния оныя литеры, замыкается число 666 пагубнаго имени его, яко же свидетельствует Апокалипсис: "яко имать писать имя свое тайное, в куплях и продаяниях", его никто же от земных и мятущихся в вещех житейских не уведает сими словесы 666. Не изволи бо божественная благодать пагубнаго имени его в книгах написану быти, во образе же обучения может кто обрести, по Ипполиту и Иринею, имена, число сие объемлющеся: "титин, лампетис, мафметис, фармазия, венедиктос"; время бо открывает и искус целомудрствующим, яко же свидетельствует книга Барония, слово 15 о Антихристе: "Той прелестник сый, наречет свое ему пагубное, имя скверное, от века не слышимо нигдеже во всех родех". Дозде от Барония. Воистину, нигдеже не слышимо от века именования сего: Император от Рима изыде, да к нам в Россию, прииде.

И тако той злый сосуд Сатанин, Император Петр, всея воли Сатанины исполнитель, по совершенном своея злобы исполнении, в 1700 году разосла многие Указы и законопреступныя повеления, во всей России повеле праздновати новое лето каждогодно, во вся времена, в 1 число Генваря месяца, ратуяся со Святыми Седьми Вселенскими Соборами, иже Св. Отцы на первом Вселенском соборе, при благочестивом Царе Константине, во вся предыдущая времена праздновати св. Церковию ежегодно до скончания века в 1 день Септемврия месяца Новое Лето, яко начаток свободы Християнския от тяжкаго Августа Кесаря, изчисляя вся мужеска пола и женска, облагая их даньми, не точию на живых, но и на мертвых, яко свидетельствует о том преподобный Мефодий Патарский в слове 66-м: "В последнее бо время Антихрист вопросит дани от мертвых, яко и от живых"; и паки ниже: "Антихрист весь мир данники сотворит, по записании в свои книги дань с душ человеческих".

От великаго неразсмотрения и крайния погибели человеческия, Антихрист, по записании в своя книги, требует со своих верноподданных дани душевныя. Что же есть душа? Душа бо есть невидимаго существа Божия образ, дебельством плоти одеяна, невидима и неосязаема, должна есть приносити Создателю своему дань душевную, веру правую, надежду несомненную и любовь нелицемерную; сын же погибельный уби сию трисвятую добродетель и насади, вместо того, неверие, безнадежие, нелюбовь, яко же свидетельствует Ефрем Сирин: "Вложит страх, пренемогание и люто неверование в сердца человеком". И Ипполит Св. в слове 3 пишет сице: "Омрачит многи души, сотворит бо себе начальники от бесов"; то и св. Ефрем пишет: "Приставник бо приставит творити волю его на всяком месте". А иже на Римское начальство, яко же ныне видим, не Цари Царя избирают, или поставляют, но духовныя духовных, на Монархию Римскую, на Царскую власть света сего перекладают, иже Божию на себя восхитив, и по всему миру расширяют, и держат, и предадут оному последнему Князю мира сего, Антихристу; и ниже: "яко Антихрист он, яко же нынешнии его предтечи, вознесется и возвысится паче всякаго глаголемаго Бога, или чтилища"; и не глаголет напрасно "паче Бога", но "паче всякаго глаголемаго Бога", еже есть паче всех Царей земных, иже суть прозвани, а не беяху суть бози. Царие бо иереи глаголемии бози и христи именовахуся, яко свидетельствует Максим преподобный, Грек, в книге своей, во главе, во главе 30: "Царь есть ни что же ино, точию жив образ одушевлен самаго Царя небеснаго, сиречь, жив пред ним"; и ниже, статья 24: "Остави бо 99 овец незаблудших, и сниде на землю искати погибшаго овчата, человеча рода, и остави по себе пастырей, Царие, Святителей, да отечески и владычески прилежат и пекутся о душах их". А ныне от лет, по числу своему 1666, прииде злый вождь, неправедный Царь Жидовский, ложный Мессия, лжехристос, одушевлен образ самаго Сатаны, яко же Ефрем Сирин свидетельствует: "Яко тать и прелестник есть Антихрист, хощет приити во своя времена, хотя украсти, убити и погубити Божие стадо избранное, истиннаго пастыря образ приимет, да прельстит овец стада". Ибо Петр Великий, всея злобы и воли Сатанины исполнитель, вознесеся и возвысися паче всякаго глаголемаго Бога или чтилища, по Ефрему Сирину: "Яко тать лжею говения", прииде на престол Всероссийский, яко же и сам, велехвалися о себе, глаголет: "Сирым был отец, странствующим пристанище, бедствующим помощник, обидимым избавитель, насилуемым свободитель, для скорбных и престарелых учредил гошпиталь, для малолетних училища, неполитичный народ Российский в краткое время сделал политичным и во всех знаниях равной Европейским народом, Азию с Европою чрез протекты дальные пути на кратчайшия соделал, великую коммерцию учредил, Государство распространил, восхищенное возвратил, разсыпанное возставил, уничтожаемое прославил, ветхое обновил, не имущее создал, спящих в неведении возбудил, немощных в силе укрепил, ленивых к труду подвигнул, буих умудрил, чины и степени и порядки благаго жития образы насадил, своим трудом от идолослужения и от богомерзкаго раскола и безумнаго атейскаго мудрования, до дву миллионов душ во благочестие обратил, многия суеверия истребил, чин духовный к пастве и проповеди слова Божия способнейшим учинил, о должностях издал Духовный Регламент, учредил Сенат, кормило Государственное и уставы, права и законы утвердил крепкими указы о непременном исполнении оных, учредил Академии, школы, училища, фабрики, во всем имел умеренность, ни в чем недостатку не имел, ниже в Величестве и в великославных делах".

Петру Великому от начала мира никто подобен не был, яко свидетельствуют о нем друзии. Зверь той горд и страшен, ни единому не подобный, о чем он и сам о своем достоянии сице вопиет: "Зиждитель мира искони положил своими судьбами прославить в наши дни. Он послал в Россию человека, каков не слышим был от века, сверх всего препятства вознес он главу, победами венчану, Россию коварством попрану, вознес до небес. Стихии сами объявляют, чего все Россы ожидают". Зри, Православный читателю, кто он есть, и сам о себе открывает, и вся деяния ясно предствляют, которому вся Россия, преклоня колена, глаголет: "Кто подобен зверю и кто может ратоватися с ним?" Воистину никтоже, иже в мирских вещех мятется и ум свой пригвожден к ним имать. Аще бо кто озверившемуся тому Антихристу повинется, и злочестивое житие его содержит, оному изображающе, или словом, или делом Бога его проповедает; се бо и сказует печати его даемое начертание на челе и на десней руце; аще кто приимет печать его, той области не имать знаменатися знамением Христа Спасителя своего, но прелестнику приложится и тому единому послужит, всяко погибе той от Бога и человек. Како нынешнии разнаго вероломства сектари хвалятся иметь веры своея быть правыми, возносят гласы своя до небес: "Мир и тишина от Антихриста нам даны", разныя секты водить, не ведуще Святаго Писания, в ересях блудят.

За то окаянный льстец уступил им быть в полной свободе, что ни един из них был противен воли его, и вси последовали вслед лукаваго того зверя, обоготворили его и приняли с клятвенною присягою, богопомазанным, боговенчанным, боговенчаннаго Христа, а сущаго лжехриста. О бедные бедняки, разных вер сектари! Где вы ум свой потеряли, за таковаго лютаго зверя, Антихриста, законопреступно присягали, и крест за него целовали, и в его погибельныя книги верноподданными рабы и слуги себе писали, и тем присяганием и ложным креста целованием обоготворили Антихриста и отступили от Господа Нашего Исуса Христа святыя Православныя веры? По Ипполиту и по Ефрему Сирину: "не имеете область не точию держати веры правыя, но ниже имеете область знаменатися знамением Христа Спасителя своего", о чем Апостол, вопия, глаголет: "Имуще образ благочестия, силы же его отрекошася". Аще бо кто Антихристу поклонится, или предастся, той царствия небеснаго не наследит. Того ради окаянный льстец умолче, понеже всех в сети своя уловил, широкою дорогою, и самовластным житием прельстил всех, яко же сам Господь рече: "Востанут бо лжехристи и лжепророцы, ложнии христи и помазанники царие, иереи, ложнии пророцы", и по Иоанну Златоустому "являюще на себе вид благоверия, а силы его отрекошася", и мечтанием творяще явления пред очима зрящим, сиречь, приведение показующе и блазнену веру проповедающе: "Зде Христос, онде Христос", а всем безумным едина глава есть Антихрист, а вси разнаго вероломства сектари, но онаго воли своя дела творяще, яко уди во едином теле и под единою главою; ибо Святии, предзряще духом о последнем неистовом роде, ужасающеся последних случаев, болезненно описоваху, глаголюще: "будет бо скорбь велия, якова же не бывала от начала мира, и потом не будет" яко же Исаия вопиет сице: "Дни будут во Израили без Бога истиннаго и без Священника учащаго, и без закона исправляющаго"; в человецех несть и разумеваяй во время оно умолкнет, яко время зло есть, яко Св. Ипполит пишет сице: "Навыкни иже сущим тогда во градех и в селех, каково лето время и дние будут, на кийждо бо град взаконения своя пошлет скверный, с бесы же и с чувственными человеки". Нам же подобает писанная Святыми не в забвении полагати, и с усердием всему внимати, и противнича прихода назирати, како и откуда приидет и где воцарится; понеже, по Святых Писанию, сугуб восписуется быти Антихрист, чувственный, по земному и чувственному седению области земныя, тако же и мысленный, чрез отступление нарицается Антихрист, яко же и Златоустый сказует: "Понеже бо чувственный наречен бысть словом, и делом, и образом, строения ради Сатанинских дел и благочестию противных".

О преисподний Титин! Посея семена своя на сердцах человеческих, в разум земный свел душевный и бесовский тьме, и яко нощи и свирепой зиме уподобленный, того ради и пишется "обратив день во тьму", еже и содела, иже Господа нашего Исуса Христа лета премени воплощения, отъя осмь лет по Даниилу, иже времена и закон премени, помрачи и покры неведением, яко вретищем власяным, яко же пишется: "солнце угаснет, и луна не даст света своего, и звезды спадут"; тем пророк вопиет, глаголя, что уже "исправляющаго в человецех несть"; исправители же змиина времени, омрачивше тьмою ум свой и оболкшеся в хоругвь мира, утверждение мнят быти, глаголюще: "Мир, мир!" Се прииде мечь даже до... "В той день, вопиет Пророк, оскудеют девы добрыя и юноши в жажде, т. е. погасиша брак закона духовнаго со Христом, и по плоти к возстановлению, по Исаии, семени, не разумеюще сего, смутишася вси неразумнии сердцем, уснуша сном своим, и ничтоже не обретоша богатства в руках своих.

В таковых Антихрист седе, рекше, во отступницех словес Христовых, но верных воистину ведомо, яко обыдоше ныне, по Большому Катихизису, в трех винах церковь Христову Антихристово воинство по вселенней, от неразумия писание, дерзостию и хулою на закон и истину Бога живаго. Древнии Иудеи, за неприятием Евангельския проповеди, и доныне закон Моисеев хранят, да и хранити будут до дне суда Господня: такожде и новоблагодатныя, по числе зверином, идеже разсыпася рука людей священных; потом восписуется, что служба угаснет и пение не услышится, а идеже таковое совершатися будет, рать с самим Богом, яко рече Господь, глаголя: "Радости и веселия ктому не услышится в тебе, дщи Сионя"; яко истинною и судом навел еси си вся на ны, грех ради наших; яко, Владыко, умолихомся паче всех язык, и есмы смиренни по всей земли днесь, грех ради наших, и несть во время се ни князя, ни пророка, ни вождя, ни всесожжения, ни жертвы, ни приношения, ни кадила, ни места, еже пожрети пред Тобою и обрести милость, но душею сокрушенною и духом смиренным прияти будем. Не внимая сему, нынешний род, вопиюще, глаголют славу и мир в человецех. Удивляяся Господь таковому миру, глаголет через пророка Иеремию: "Исцеляху сотрение дщере людей Моих", к бесчестию уничтожающе, глаголют: "Мир, мир!" Где есть мир? И не бе есть мира, яко той же Иеремия сице вопиет: "Взыде лев от ложа своего"; хищник людский воздвижеся, исшел есть от места своего, да поставит землю твою в пустыню; оставшии без обитателя на том, препояшитеся вретищем, плачите и рыдайте, яко отвращен гнев ярости Господни от вас.

Что сего свидетельства на нынешнее время яснейша, яко вси пророцы согласно вопиют: "вретищем одеятися, повелевают плакати и рыдати, а не пети и веселитися", яко же и Андрей Цареградский пишет: "плакати имут по островем дний 666", и аще кто по Пророческому писанию не внимает, таковыи Пророки убивают, яко же древнии Иудеи, писание держаще, писанием осудишася. А нам, Православным Христианам, подобает всеусердно держатися отеческаго наказания и Пророческаго писания, да не осудимся с древними Иудеи, но всегда подобает нам жизнь препровождати, по Пророческому гласу, "во вретище", и плачи, и во уединительном безмолвии, и пустынном пребывании, яко Господь чрез Иеремию Пророка взывая, глаголет: "Изыдите, людие Мои, из Вавилона падшаго, и не прикасайтеся нечистотам его, да неосуждени будите с неведущими Бога"; яко же жена Лотова бежа, и обозревая вспять, и бысть столп слан каменем; тому же подобно и Ефрем Сирин вопиет: "и пролиют реки слез со воздыханием к Богу Святому избавитися от змия, и побегнут со тщанием великим в горы, и в вертепы, и пропасти земныя, и спасутся; аще ли не тако, то вси уловлени будут Антихристом в погибель".

Сего ради Святии могут избежати, яко всея печали жития сего отрекошася, всем бо имущим тогда боговидение и Божий разум, разумно будет пришествие мучителево, а имущим присно ум в вещех жития, неразумно будет; аще бо и услышит кто слово, то не имут веры, обаче мерзит им, тогда бо в истинное учение ни какую пользу будет, яко же Евангелие вопиет; тогда человецы пространно живущие ничтоже зла чают, но и не веруют, еже им о чем кто случится глаголет, якоже при Нои и Лоте. О таковом лютом времени и неутешном Святии писали, и путь тесный нам к царствию небесному показывали, и аще кто тех времен 1666 достигнет, на брань с самим диаволом выходити поведает; первии бо мученицы с человеки брашеся, а иже при Антихристе, с самим Сатаною очевидно братися будут. како имам сие разумети? Очевидную брань с сатаною, понеже диявол существо есть невидимо, а человек в существе его аще бы увидел, жив не может быти. Сего ради и глаголет; очевидно братися имут с тем, иже образ его возложет на ся и всю волю Сатанину исполнять будет. Сего ради и глаголется сын погибельный, сам погибнет и иныя последующия ему погубит, яко же глаголет о нем Даниил: "паче всех возвеличится, и Бога Маозия на месте своем возславит".

Вонмити зде вси, последующие Янусовскому Новолетию и поклоняющиеся чрез Янусовское новолетие Маозию! Ибо он лютый зверь всея злобы своея, яко Святии Отцы тогда на Первом Вселенском Соборе, при Царе Благочестивом, Константине, уложиша и запечатлеша, и сице написаша: "Аще кто дерзнет разрушити, да будет проклят"; Великий в злобе, Петр, и всея воли Сатанины исполнитель, дерзну клятву разрушити и уставы Святых попрати, разосла свои богопротивныя узаконении, повелевая и по гражданскому производству дел, чтоб писать лета, начиная с 1-го Генваря, яко свидетельствует книжка "Дополнения Петра деяний". Сего ради мы, Християне, от Христа Спаса научихомся и от святых Его ученик и наместник, дабы не приимати ложнаго, яко истиннаго, лжехриста за истиннаго Христа и за богопомазанника, разве за то, что вся уставы Святых разрушил и восхитил на ся, не точию власть Царскую, но и Святительскую и Божию. Царскую восхити, понеже незаконно на престол помазася и именова себя Императором, а Святительскую восхити, понеже незаконно на престол помазася и именовася Отец Отечества и глава Церкви Российския, восхищая себе суд духовный; а Божию власть восхити, сиречь, уставы Святых разрушает и законы Христовы превращает. И о таковом Стефан Зизаний пишет, что "вознесется и возвысится паче всякаго глаголемаго Бога, или чтилища", еже есть паче всех Царей земных, иже суть прозванию, а не беяху суть бози, и заповеди святых сокрушит и своих умышлений заповесть держати. Изволяяй, да чтет Кирилову книгу о том знамении о противнике.

Сего ради прещения мы Св. Отец боимся, таковому славою мира самовластному пастырю в послушество отдатися не хощем, и в книги его самоумышленныя и законопреступныя писатися никогда не хощем, да и хотящим спастися никому не советуем. По закону вашему судите нас, и творите, что хощете, а мы, в силу Указа вашего властодержца и его повеления, не пишемся. Отнесите ему от нас ответ, или представите нас самих к нему на лицо: тогда мы пред ним отвещать не постыдимся и правду глаголати не устрашимся; ибо Российские Императоры от Петра и до скончания века, вси приемницы престола его исполнители законов онаго, разных его узаконений, жив образ его пишуще. Известно вам буди, о власти Всероссийския, яко вера святая, Христом с небес снесенная и Св. Апостолами преданная, и святыми Седмию Вселенскими Соборами утвержденная, и мученическою кровию свидетельствованная, в России, в лето числа зверева 1666, Царем Алексеем Михайловичем и Патриархом Никоном истреблена, а Римская и Латынская возобновлена, а наконец без вести сотворена сыном его, Петром, который, ревнуя Римскому преданию, гоня и муча в древле отеческом предании староверцев, истребляя от земли память их, называя их раскольниками, и еретиками, и заблудниками, и погибшими, а сам, сый раскольник, сиречь, не единомыслен со Святыми, и еретик, сиречь, приемник и узаконитель ересей Римских, и Латынских, и Жидовских, и заблудник, понеже праваго и истиннаго пути не позна, и погибший, понеже сын погибельный именуется, по Святых сказанию.

Сице мы веруем и исповедуем, яко же свидетельствует сия хартия, и по Христе Спасителе называемся Християне, понеже новыя веры Римския и Латинския не приемлем; и есмы не раскольницы или сектоводители, понеже отсекания от святыя Церкви не сотворихом, и не буди нам, Православным Християном, мыслити, чтоб похулити данное Христово нам святое наименование, еже зватися нам по Христе Християне, ибо Христос работающим Ему правою верою обеща дати новое имя, еже зватися Християны. Сего ради мы не приемлем ея от лица лжи, лживаго вашего Бога, осьмотысящнаго Исуса, и его помазанника, лживаго Христа, за истиннаго не приемлем, и законов его богопротивных не слушаем, в книги отступническия с беззаконники не пишемся, понеже видим по Св. Писанию и изъяснению Соловецких страдальцев, что у вас от Р. Христа осмь лет убавлено. О Россияне! На что у Христа украли лета и пишите сице летосчисление 1819 год, а по числу святых от Р. Христова 1829 год? Сего ради лживыми подписками весь род человечь в погибель свели, а мы подо лживыя ваши лета не подписуемся. И почто паки вы лета превратили: Индикт от Септемврия 1 числа на Генварь 1 число, в честь имени храма Янусова превели и называете то новым летом?

И тако от онаго лета, иже сын погибельный, Петр, вам предаде, а вы держите, и нас, грешных, в ту же погибель влечете, того ради мы под ложныя ваши лета осьмотысячнаго князя тьмы не подписум с вами купно ложное исповедание ваше и прелестное Христовых лет утаение; ибо таковое ложное исповедание Св. Отцы проклятию предаша, и мы последуем их учению и преданию, проклинаем же и законопреступное утверждение сына Сатанина, Петра, Великаго в злобе, иже Даниил Пророк рече о нем: "зверь той страшен, ни единому не подобный, иже времена и закон пременити размыслит"; ибо Петр I, а последний воли Сатаниной исполнитель, ревнуя Еллинскому преданию, в честь идола Ветхоримскаго, устави лета числити 1-го Генваря, и называя то Новым Летом, и утверди его ежегодно праздновати, и торжественный молебен приносити за его, и утверди строгими Указы и непременном исполнении оном, разрушая завет вечный, предания Св. Отец, иже положиша Святыи на 1-м Вселенском Соборе, при благочестивом Царе Константине, ежегодно праздновати Новое Лето Септемврия 1-го дня, яко же свидетельствует Минея Четия. Сего ради мы, смиреннии, гордому оному зверю, обогащенному властию самовластнаго Правительства, и его Янусовскому Новолетию не последуем, и не подписуемся под ложное Янусовское числение лет, и Бога вашего, Исуса ложнаго, не приемлем, и всего предания его душегубнаго отметаемся, и в церковь его, Римскую и всех ересей приемницу, не последуем. Творите с нами, что хощете, а мы предания Св. Отец держимся, и настоящаго града, ни села не имеем, но грядущаго взыскуем, вечнаго, и гордому, властию обогащенному, Князю вашему, властодержавцу, в подданство не отдаемся, и в книги беззаконныя не пишемся. Того ради, понеже прежде бывшии в России благочестивии Царие наши таковаго тиранства над человеки не творили, с мертвых дани не искали, мужеска и женска пола, и всего обще человечества описания не творили, яко же случися таково дерзнутие сотворитися при Давыде Царе Израильском, яко свидетельствует Библия, гл. 21 сице: "Писано есть, и возста диавол на Давыда, и научи Давыда, да счислит, иже под властию его, всего Израиля, и посла Князя своего, Иоава, по всей земли, да счислит Израиля", и за то прогневася Господь Бог за таковое законопреступление на Давыда, и посла на него три вины великия, яко же свидетельствует Библия; изволяяй, да чтет тамо. Того ради мы, в книги ваши беззаконныя подложных лет не пишемся, и не проповедуем с вами Янусовскаго Новолетия, установленнаго сыном погибельным, Петром, Великим в злобе.

О Россияне! Вонмите, кто царствует и кто обладает вами от лет 1666. По списателю книги "Правыя Веры", гл. 30, при слугах, и господина указует вашего, властителя, царствующаго над вами. Еще паки пишет: "Мы есмы Християне, веруем во Отца и Сына и Св. Духа, в три лица, а во едино Божество Господа Бога и Спаса нашего Исуса Христа, Сына Божия, Спасителя миру"; а мы веруем в Него: 1) исповедуем Его первенца всея твари; 2) первенца из мертвых воскресшаго в третий день; 3) исповедуем его первенца вознесшагося на небеса со обоженною плотию и седящаго одесную Отца, и показавшаго на небеса путь всем правоверующим в Него, а в первенца осьмотысячнаго мы не веруем, и не исповедуем его перваго, и не приемлем, и не исполняем законопреступнаго повеления, и рабы и слуги его быти не обещаемся: зане писано есть во многих св. книгах: "Аще кто обожившагося и треми властьми высящагося Антихриста послушается, или поклонится, и послужит, и начертание его приимет, и законопреступное его повеление не охулит, таковый небеснаго царствия не наследит, но с ним вкупе осудится вечным судом Божиим". Аминь.