О сицевом вступлении пишет святый апостол Павел сицевы словеса: Да никтоже вас прельстит ни по единому образу яко аще не приидет отступление прежде, и открыется человек греха, сын погибели, противник, и превозносяйся паче всякаго глаголемаго Бога, или чтилища, яко сести ему в церки Божии: и прочая. Ниже: И ныне одержащее весте, во еже явитися ему, во свое его время. тайна бо уже деется, точию содержаи ныне, дондеже от среды будет. и тогда явится беззаконник. то Павел яве время вступление антихристова сказа. На кое место святый Иоанн Златоуст сице разсуждает: яко сие о римской власти разуметися имать. то есть, егда власть римская от среды возмется, тогда он приидет: донележе бо (рече) власть сия страх будет, никто не покорится, а егда разорится, нападет на безначальство и человеческую и Божию поищет похитити власть.
О сем верныя и Иоанн Богослов утверждая пишет: Дети последняя година есть, и яко же слышасте. яко антихрист грядет, и ныне антихристи мнози.
На сия возглашая творец книги О вере тако глаголет: О правде! много предотечев, но и сам уже близ есть, по числу еже о нем 666. число бо человеческое есть антихристово кто весть, аще в сих летех 1666 явственных предотечев его. или того самого не укажет.
И сего вступление многих прельстит и отлучит от правды, а наипаче тех, кои растленное житие любят.
Ибо тии и ныне множайшии от святыя церкве отпадают, и небрегут о правости веры, яко не хотят узким путем ходити. блажен обрящется той, кой не соблазнится, и претерпит такову лютость гонения. аще кто достигнет тех времен, на брань с самим диаволом. И ниже убо в забвение слово Ефрема преподобнаго полагати, еже в 50-м слове книги своея тако писа: убоимся и мы любимицы мои, да не и мы в сия впадем, писанная бо вся совершишася. и несть ино ничтоже прочеее, токмо соперника нашего, еже есть антихристова слава. на конец бо римскаго царства, подобает всему совершитися.
Ибо тии и ныне множайшии от святыя церкве отпадают, и небрегут о правости веры, яко не хотят узким путем ходити. блажен обрящется той, кой не соблазнится, и претерпит такову лютость гонения. аще кто достигнет тех времен, на брань с самим диаволом. И ниже убо в забвение слово Ефрема преподобнаго полагати, еже в 50-м слове книги своея тако писа: убоимся и мы любимицы мои, да не и мы в сия впадем, писанная бо вся совершишася. и несть ино ничтоже прочеее, токмо соперника нашего, еже есть антихристова слава. на конец бо римскаго царства, подобает всему совершитися.
Что же; несть ли уже совершилося о римских царех яко престати сим царствовати; но ниже убо слышится имя римских царей за многая лета в последняя ныне времена: яко бы рещи, от великаго Карла. всю же власть от тех времен царьскую и святительскую папа на себе привлече, вкупе и царь и святитель наречеся: не явный ли сей антихристов предотече.
Тем же всегда в памяти своей нам всем православным подобает имети прежде бывшыя вины, и сему внимати, яко по тысящи лет от воплощения Божия Слова, Рим отпаде со всеми западными странами от восточныя церкве.
В пятьсотное лето девятьдесят пятое лето по тысящи, жители в Малой России к римскому костелу приступили, и на всей воли римскаго папы заручную грамату дали ему. се второе отрвание христиан от восточныя церкве.
Оберегая же сие пишет.
Егда исполнится 1666 лет, да не чтобы от преждебывших вин зло некаково не пострадати и нам, но покаянием Бога умилостивити, и милость Его нам к себе привлещи.
Ибо я мирский человек есмь, всегда о плоти пекуся, всегда в мирской суете пребываю, всегда имею печальми житейскими ум помрачен. аще и случится ми когда книгу прочитати. но подавлением внешних мыслей, память моя погибает. тем же прошу тя, оставив мя вопроси могущих.
Разная суть о сем [антихристе] толкования предаются разумети: Павел апостол нарицает антихриста противником. а Златоуст нарицает антихриста отступление. Кирил же святый антихриста тожде наричет с прилогом сим, отступление правыя веры: Памва же Берында, в писмени 1: антихрист что есть, противник Христу, абы противник Богу.
. о них же Павел глаголет: от нас изыдоша, но не быша от нас, зде знаменает оных еретиков и отступников, кои изыдоша от праваго учения ложным учением, оставивше правую веру и догматы святыя церкве, их же кроме спастися не можно. се явих ти в чем сие имя состоит антихрист: аще уветливо ти есть.
Павел апостол ясно о сем глаголет: яко аще не придет отступление прежде, и открыется человек греха сын погибели, противник, превозносяйся над всякаго глаголемаго бога, или чтилища, тако, яко сести ему в церкви Божией аки Богу, и прочая.
Извещаяй.
Чувственное ли по телеси седение Богу творцу во своей Его церкви; или умное.
Требуяй.
Умное и благодатное за слова Его хранение.
Извещаяй.
Отсюду нам научитися подобает и о антихристе, сести бо ему Павел глаголет, аки Богу: уподобительне сказует. зде разумети леть, яко Божие в церквах седение не есть чювственное, то есть не видимое, не телесное, не осяженое: так и антихристово. ибо глаголет сести ему аки Богу, ино вместо инаго сказательне.
Повествует о сем Апокалипсиею Иоанн Богослов, во главе 36-й.
И видех инаго зверя восходяща от земли, имуща два рога, подобно агньчим. и глаголюща аки змий.
Толку 1-го: стих 164-го. Змий сей лживый пророк есть, из земли убо восходящь, сиречь из земнаго жития. Имяше же два рога подобна агньца. гладок бо кажется сокровенный волк в кожи овчей убийственное сокрывающий, за образ благия веры в начатце его.
Сущее. И власть перваго зверя всю творяше пред ним: и творяше землю, и вси живущия на земли, поклонитися первому зверю.
И паки во главе 52. стих 199.
Сущее. И видех (рече) из уст змиевых, из уст звериных, из уст лжаго пророка, духи три нечистыя, аки жабы исходящыя.
Втораго толка: Ложнаго пророка разумеваем быти еретиков бывших, и еще попущением Божиим быти хотящих, да вернии искусни явятся, жабами же их наричет за многоглаголивое и нечистое на Господа нашего Исуса Христа хуление, и на верующих вонь.
Дозде от Апокалипсии 4 толковой.
О сих всех предложенных, явственное решение восприяхом. яко Павлова словеса проречением быша о римской державе, в ней же гананствова быти отступлению, им же воспоследствова, самаго антихриста настатие. о чем и Иоанну откровено бысть, яко римская держава антихриста перьвее произведет
Смотри тамо же есть писано. яко бы родитися ему от оныя. но по приведению; разумей. привиденныя бо вещи в нас, сия суть, кия чювствы телесными не объятны. и таковое видение есть безплотно и некое есть сонное, и единаго мечтанию ума подлежаще. и сие что есть; разве диявольское, или сам диявол, а не человек. о нем же и Ипполит. того ради церковнии учители, разная описания антихристову рождению дают.
1: Иеремия пророк глаголет родитися антихристу от Дана, по оному спех от Дана услышим, борзостию коня его потрясется вся земля.
2: Моисей глаголет родитися антихристу от Васана, по оному: скимен львов Дан искочи от Васана.
3: Даниилу пророку показано, родитися антихристу от четвертаго зверя, по оному: и видех рог мал восходящ, имея уста хулна.
4: Пророк Иосия глаголет родитися антихристу от пустыни, по оному во дни оны наведет Господь ветр жгущь от пустыни на ня (сиречь церковь).
5: Во Откровении явлено Иоанну. родитися антихристу от моря по оному: и видех зверя восходяща от моря.
6: Ипполит же святый родитися антихристу аки бы от девицы: а во ином глаголет от жены.
Но сию антихристову матерь аще восхощем како ю нарещи, не обретаем. Ибо:
нарицается, женою прелюбодейною.
нарицается дщерию вавилонскою.
нарицается римскою державою.
наричется гордынею.
наричется мирскою роскошью.
наричется Вавилоном.
наричется Египтом.
наричется Галилеею.
наричется греховным калянием.
наричется и самим грехом.
наричется силою сатаниною.
и прочими имены наричется.
И от сих предложенных, кое ей имя глаголати определенно, не вемы.
Аще же восхощу и сына тоя антихриста определено имя знати, не обретаю на кое прибегнути.
Ибо сей антихрист, глаголется:
и отступление.
глаголется зверь седмоглавный и десятирожный.
глаголется и ересь, и мерзость запустения.
глаголется змииная икона.
глаголется и ветр от пустыни исходящий.
глаголется и князь мира сего.
Место ли рождения его взыскати. но сия множественна суть:
1: Сказуется, антихристу родитися в Риме, по оному: антихрист от Рима изыдет.
Место ли рождения его взыскати. но сия множественна суть:
1: Сказуется, антихристу родитися в Риме, по оному: антихрист от Рима изыдет.
2: Сказуется антихристу родитися в восточных странах в земли персидстей идеже колено Даново, от корене еврейска.
3: Сказуется родитеся антихристу во Египте.
4: Сказуется антихристу родитися в Галилеи, отнюду же и Христос изыде, яко же пишется, скимен львов Дан, изкочит от Васана. сей же есть, Скифополь, рекше скифский град.
5: Родитися имать антихрист в Вавилоне граде велицем, по разумению Иеронима в толковании на 11 главу Даниила пророка.
И аз на сия тожде тебе глаголю. что оная антихристу и матери его и месту не есть существенная и свойственная, но иносказательная и уподобительная имена: речеся ему родитися от Васана: васан толкуется студ. речеся родитися ему от Дана: сиречь от диявола. родитися ему от моря, сиречь от мирскаго жития: и прочая. но сия вся имена уподобительная, и свойственнаго имене его и прочим не обретаем.
Глава 4.
О времени антихристова настатия.
Требуяй.
Но аще каковым либо образом, обаче ведомо то есть известно от писаний, яко антихристу не отменно в мире явитися: сего ради прошу рцы ми: мощно ли от писаний священных время его появления знати свойственне.
Извещаяй.
Святый апостол Павел во втором послании к селуняном тако о сем пишет: и ныне одержащее весте. во еже явитися ему (сиречь антихристу) во свое ему время. тайна убо деется беззакония. точию содержай ныне, дондеже от среды [отъят] будет: И тогда явится беззаконный.
На сия Павлова словеса святый Иоанн Златоуст толкуя глаголет: точию содержай ныне, донележе от среды будет: сиречь, власть, римская, егда возмется от среды. тогда он приидет. И в лепоту. донележе бо сия власти страх будет, никтоже скоро покорится: егда же тая разорится, нападет на безначальство, и человеческую и Божию поищет похитити власть. яко же бо прежде сего разоришася царствия.
мидское от вавилонскаго,
вавилонское от перскаго, сиречь
перское от македонскаго,
македонское от римскаго.
Так и сие от антихриста: а он от Христа. и к тому не содержит.
О том же и святый Ипполит пишет сице: Приведу же, рече, в среду достоверна свидетеля, пророка Даниила, иже сония Навходоносору разреши. и от царствия даже до скончания показа путь неуклонен, шествовати хотящим во истинне явления. что бо пророк Навходоносору изрече; зряще ты о, царю: и се образ велий стоящь пред агнцем твоим,
его же глава злата.
мышца его и рамена сребрена.
лыста и чресла и стегна медена.
нозе часть некая железна и часть скуделна.
Зряще дондеже отсечеся камень без рук, и порази образ на нозе железне, и скуделне, и истни и до конца. тогда истнися купно скудель и железо и медь и сребро и злато, и быша яко прах от гумна жатвеннаго. и камень поразивый образ бысть в гору велику, и исполни всю землю. И ниже. К сему присовокупи самого Даниила видение четырех зверей от моря восходящих яже суть.
Первый [зверь] яко лвица, криле ея якоже орла: и зрех дондеже издаде крыле свои, и взятся от земли, и на ногах человеческих ста, и сердце человека дадеся ей.
И се зверь вторый подобен медведице, и на страну ста три ребра во устех его.
Зрех, и се зверь третий, аки рысь и тому крыле четыре птичи превыше его главы четыре зверю.
Последи же сего зрех: и се зверь четвертый страшен, и удивляя, и крепок зело: зубы его железны. и ногти его медяны поядая и истнивая, и прочая ногами своими попирая: и той разньствова паче всех зверей прежде его бывших.
И имея десять рогов. внимах убо рогов его: и се рог мал взыде посреде их, и трие рози пред ним искоренишася, от лица его. и се яко очи в розе сем, и уста глаголющая вельми. Дозде самая Ипполитова словеса.
Истолкование же на сия звери кратко из его словес полагаю тако: Перьвый зверь есть вавилонское царство в подобие златыя главы образа онаго. Вторый зверь есть перское царьство: а три ребра, три языки персы мидяны, и вавилоняны, еже значит образа сребро. Третьяго зверя глаголет, еллинское царьство бывшее во персах: еже значит медь. четыре же главы знаменают, яко по Александре на четыре части разделися царство оно. А четвертый зверь есть римское царьство, твердо аки железо. десять рогов десять перст ножных образа значит, во указание десяти царств от него востающих. рог же малый посреде их, являет антихриста.
На уяснение же сих и святаго Кирила предлагаю сия словеса.
Приидет бо [рече] преждереченный антихрист таковым подобием, егда исполнятся лета римския власти. то уже близ есть кончина мира. Ниже. Сие бо учим не от себя глаголюще, но от святаго писания собирающе а наипаче взяв от пророчества Даниилова, якоже и архангел Гавриил поведа тако глаголя: зверь четвертый, царство четвертое будет на земли, иже превыше будет всех царств. и сие поистинне римския церкве учители предаша ми.
первое бо славно было царьство ассирийское.
второе мидское соединено с перским.
третие македонское.
четвертое ныне римское.
Таже паки Гавриил прилагает глаголя, десять рогов его, десять царей востанет. И по нем востанет другий, иже преидет всех первых злобою, не токмо глаголет десяти, но и всех иже прежде его быша, и триех царей победит.
Ведати же подобает, яко из тех десяти, трех царей того ради победит, яко сам осмь будет царьствовати, и наивышняго имать рещи словеса еретическая отступных беззаконник.
Разсуждение
Двоя подобия о наставании антихриста на царстве римском, от пророчества собрав поведает нам.
Первое
От того времене антихристово царьство в Риме зачнется, яко же глаголет егда исполнятся лета римскаго царьства. и не глаголет, егда возмущено будет: но егда, исполнятся лета еже есть когда уже Римом цари не имут владети яко же и ныне видим, уже не владеют. Ниже.
Второе
Подобие показует нам, како и коим образом последняго антихриста на оном престоле римском надеятися леть, яко же глаголет тогда востанут в Риме десять царей в разных местех к римскому единонадесятому царству воедино послушание будет, тогда в Риме на том единонадесятом царе последнем антихристе, скоро содеятися имат ибо седмь царей в послушание свое антихрист к римскому престолу слугами своими в то время доброволно и без брани взыскати имать: а трех паки войною и силою со оными седмию цари достанет яко же во главе 4 воспомяне. тии же трие цари за единым римским царем, и именем пребывати начнут, понеже повелением и промыслом римскаго престола побеждени будут. и того ради сам осмь прозовется антихрист на царстве римском седя дух лукавый седмь лютейших поймет: и приходит к человеку тому лесть последняя горше первыя. Дозде свидетельство святых о времени.
От коих явственно ти показася время антихристова настатия как от святаго апостола Павла, так и от толковника его Иоанна Златоустаго, и как от Даниилова видения, так и от Новходоносорова и так и от Ипполитова и Кирилова истолкования, во всех единаго согласия, яко тогда антихристово время открыется, когда римское свойственное царство разрушится.
Требуяй.
Внях убо добре сие, но не могу того ведати, истее ли разрушися римское царство, или еще пребывает; и по чему я дознаюся сего.
Извещаяй.
Аще добре разумееши о показанном образе Навходоносору, то дознатися известно можеши и о разрушении римскаго свойственнаго царства. ибо две голени онаго образа знаменованием быша римскаго царства, во единой державе двоих мест, востока и запада. но уже восточных царей власть на западе быти преста, кая от лет древних, и от лет великаго Константина в новом Риме (сиречь в Константинополи) царствоваша неотъемлемо и ветхим Римом владеюща, власть оная до францужскаго великаго короля Карула пребываше. сего же на царство римское возведением разрушися: и начало великой схисме с востоком западу сотворися. и се видиши единыя голени онаго образа сокрушение: после же нахождением Моамефа на восточныя страны и вторая голень сокрушися: и тако до конца оный образ сокрушися, и четвертый зверь показанный Даниилу упразднися иже знамением бысть четвертаго римскаго монаршества
Требуяй.
Рекл бо еси прежде, яко внегда престати римской державе, антихрист приидет. а власти римской, сказуеши тогда престати, егда Леон папа помаза на западное кесарство Карула короля французов, кое помазание в лето Господне осмьсотое бысть. Обаче после сего до лета Господня 895-го папы римския с восточными патриархи в вере согласны быша: о чем в последующей Кириловей книге главе, 25. тем же как умствовал на той час быти антихристова прихода: Ибо в западной церкви и по той власти престати 95 лет до папы Формоса благоверно папы и прочии пребыша.
Извещаяй.
Отвещаю на сие первое:
Может сего исполнения дело и в сей приятися разум: яко вместо начала: якоже рече Бог ко Адаму вонь же день снесте от древа сего, смертию умрете. но не тогда умроша егда снедоша. сиречь, осуждение тления, от него же и смерть. И паки: рече Гавриил архангел Даниилу, разорится место жертва и помазание, ветхозаконная, егда Христос приидет: но не абие разорися егда прииде, обаче вину прия, от нея же разоришася.
Посему мощно глаголати и о власти римской: яко егда власть римская престанет. антихрист приидет.
Не прииде же антихрист абие, но вины тыя приидоша, от них же нужда антихристу явитися: се есть, разделения царства, раздоры, и вход Каруловым еретиком, иже самыя вины и начало антихристова появления.
Ныне же должность имамы показати то, чего ради тако не разньственно всех еретиков антихристами нарицающе, а последняго антихриста святии тяжка вменяют, и в лепоту. ибо аще и вси не разньственно еретики антихристами наричются. но последний еретик или антихрист, или рещи последняя ересь и последнее отступление тяжше народу и притруднейше явится. не токмо слабым и нерадивым, но и самым спастися хотящим в том: Яко первии еретики и антихристы, при последнем антихристе аки езера некая быша, а по многим местам суша бысть благочестия, и доволное бяше духовных чинов исполнение, ибо куда трезвящимся в нуждах обстоятелных прибегати. А во дни последняго антихриста [отступления] аки потоп некий всемирный явится, всюду вси отоцы и всю землю нечестивою ересию церкви святыя, облиящи (обдержащи) по писанному в Катихисисе во главе, 4-й.
И сицевыя ради вины, аще бы кто и избран хотел быть Богу, обаче от нахождения онаго еретичества утеснен, и житейскими вещьми объят. и хотя и не хотя во оную вступит, и причастник будет тоя злобы: разве едва едва мали отрясше тину плотских страстей, прибегше в церковное суще предание аки в Ноев ковчег, и в нем неисходно пребудут трезвенно, незабытную память тех в себе имуще спасутся. но яко не всем сие делание есть, сего ради и не всем тогда Ноево спасение будет.
Тем же предзряще Духом сие святии, сожалеюще душ христианских оплакаваху грядущия быти беды, ужасающеся последних случаев, болезненно описываху хотящую на вся быти диавольскую область, вся верныя утвержающе, да не впадет кто в ню. ибо случай онаго нахождения вся смутит.
Человек убо от Бога разумною тварию сотворен, во еже разумети сокровенная в нас от Духа Святаго. колико же в том истязан будет от Бога в день он, иже разумное от Бога приим, и употреби его в земная, нежели гласа словес им навыче. тем многажды таковии, видяще не видят, и слышаще не разумеют. одебелеша бо сердца их, и ушима тяжко слышаша, и очима сомжиша.
Егда приидет скончание света. будут в людех великия страсти, которыя прежде не бывали, во всяких родствах в людех покажется злость. правда и вера и покой и милость, и всякая добрая дела от человек отлучатся. и добрыя от злых в тесноте будут, и милости над сиротами не будет. лакомство в людех вселится. мужество в женстве будет. войны и междоусобия востанут. отец с сыном, а сын со отцем злотворити начнут. и больших и честных мужей слов не начнут слушати. всяк свою веру вознесет. мудрым людем посмеются: а безумных людей чтити будут, младыя старым противитися имут и прочая.
Ипполитова предречения.
Сия предповествовахом, да разумеете напоследок быти хотящая, болезнь и молву, и всех человек друг ко другу развращение и зависть, и ненависть и рвение. пастырем о овцах небрежение. и людское к священником непокорства належание, зане вси во своей воли ходят. И ниже. развращение церковное всюду. писания небрегома будут, а вражия песни всюду петы. блудове и прелюбодейства и клятвы землю исполнят. ниже. пастырие яко же волцы будут, а священницы лжю возлюбят. иноцы черноризицы мирская вожделеют. богатии немилосердием одеются. князи убогому не имут помощи. сильнии щедроты отложат. судии праведное от праведнаго возмут, и мздами ослепляемии. неправду приторгнут. И ниже. Навыкни и сущим во градех и в селех каково люто время и дние будут. тогда от восток на запад пойдут, и восплачются вельми, и возрыдают крепко. И ниже. Вси бо во еже бежати и крытися тщатся, и нигде же возмогут убежати с пути сопротивнаго: но знамение его обносяще, удобь ведоми и знаеми тому явятся. И выше. Но суетно мудрование стяжавше, и писания прилежно непочитающии, взыщут мя обрести, и не возмогут. Ниже. Слышащии же Божественная писания, и в руках тая имущии, и в мысли всегда поучающиися, мнози прелести его убегнут.
О сем непослушливый Александр папа Римския церкве западныя возгордевся, отрине хлеб животный, и совершенную Христову жертву: и опреснок во олтари на месте святем постави, иже есть хлеб злобы. яко же Бог к людем жидовским рек: седмь дни ядите опресноки, хлеб злобы. от него же христианом всем апостольская и отеческая правила возбраняют. яко же бо разность между человеком и трупом тако же разность хлебу со опресноком. яко же бо тело без души разумныя, тако же и тесто без кваса и соли мертво есть. квас бо паки и соль вместе, знаменает душу разумную в теле.
Ниже. Аще кто не пиет крови Моея, живота не имать в себе: а опреснок знаменает, мерзость запустения и работу египетскую. яко работа египетская знаменова душам вечную работу. того ради Христос, не вместо опреснока мертваго теста знаменует работу, но вместо живаго Агньца, иже знамена свобождение прииде глаголя: Аз есмь хлеб животный сшедый с небесе. Ниже. Но жестоковыйни яко же и жидове, великаго Победителя Господа нашего Исуса Христа видяще во убожестве, возгордеша, и Ему противящеся, опресноки мерзости египетския работы, и до сего дне жрут, ничего на жертву не закалают, иже антихристу предотечи суть и помощники. иже строятся совершенную Христову жертву везде помрачити, а их мерзость работы египетския вместити, и на месте святем поставити ложь со истинною вкупе. и место готовят князю мира сего последнему глаголюще. яко наш един имать быти отец папа, и всех по своей воли во всем мире сберет, его же и жидове имут восприяти. понеже он возмет власть величайшую мерзость египетския работы. и сонным богомолием, и церковь Соломоню древняго закона, прелести ради создати покусится. о чем в знамении девятом пишет.
Знак осмый антихристова настатия.
Христос истинный Божий единородный Сын, уже не приидет от земли. аще кто приидет, в пустынях привидения показуя, не исходи. и паки: аще кто глаголя, се зде Христос или онде, тому не веруй, и в дол на землю не зри. ибо Владыка с небесе приидет. ниже: А яко же первое егда восхоте на землю снити, и от девицы родитися ожидаемый Бог: дивол первее омерзи лукавым льщением сведе человеки идолопоклонением лживыми богами, иже от человек родишася, и их же они родиша, даже ложью первее нечестиву учинит правду. такоже и во второе паки егда приити имать Христос истинный, помощь диавол себе взяв, буих сопротивников ожидание, наипаче же от жидов, приведет беззаконника человека волхва и отметника чародея, и в мечтании все злое хитрствующаго, восхищая себе власть римскаго царьства. и ложью христом прозовется, и тем прозванием жидов прельстит, иже они его надеются, да с ними пребудет. А окрестныя же царства и власти и всех человек своим волшебством и чародейством приведет к себе.
Первое, от того времене, антихристово царство в Риме зачнется, яко же глаголет, егда исполнятся лета римскаго царьства. и не глаголет, егда возмущено будет, но егда исполнятся лета, еже есть. Когда уже Римом цари не имут владети. Ниже. Егда изгубится римская власть тогда антихристово начнется властительство, и то явно в Риме от того времене настала власть антихристовых предотечь, егда власть царей римских престала: тогда человек духовный папа Римский, Божию и святительскую власть нача держати.
Понеже повелением и промыслом римскаго престола побеждени будут. и того ради сам осмь прозовется антихрист на царстве римском седя дух лукавый седмию лютейших поимет: и приходит к человеку лесть последняя горши первых.
Разумей же: аще предотечи антихристовы образы суще того, так хитро так искусно под верныя подхождаху, окрадающе благоверныя умы их: коль паче сам той образуемый, кую лесть не покажет. коими покровы цветными не сокрыет свои козни, да теми дремлющыя в разуме на ся дивитися привлечет, и кланятися себе устроит, не ощущаючи лсти.
Разсуди вся опасно: аще бы так антихрист в верныя пришел, и рек бы: я Бог есмь, оставте веру во Христа, и веруйте в мя, и службы творите мне, и кланяйтеся ми как Христу кланялися: а народ бы замрачившеся, и вменили его за Бога. не суть сия не суть. но аще бы тако хотяше во Христове церкви той явитися, отвращая яве от Христа, и себе нарицал Богом, и жертвы Божеския к себе яве превращал: то чего ради святым знаки его толикия описывати, да по них и целомудрствуяй в разуме чтобы дознавался яко антихрист прииде. Но яко хитро яко подметно: яко в подобенстве Христова учения. яко в великом благоговейньстве. яко в житии чюдне. яко и во многих чюдотворении. тем же и за едва кто между Христа и между антихриста отличество признает, точию горе очи сердца возводящии, и оттуду свет небесный на указание приемлющии: о чем многими святыми речеся.
Еже глаголет, и инде первый ангел, сие бысть во время первыя печати, егда июдее ожесточеннии ослепоша. а иже бысть гной лют на человеки, сии суть, иже учители июдейстии, от рода своего и язык прельстиша, на них же бысть начертание зверя, сиречь дух антихристов.
3-го толка.
Сим первым ангелом и фиалою от него излиянною являет первое оскорбление церкве. еже бысть во июдеох на Христе Господе нашем и учеников Его апостолех святых.
И вторый ангел излия фиал свой в море, и бысть кровь мертвеца. и всяка душа жива умре в море.
Толкование
Не дивно есть Божией силе во обличения антихристова и льстимых им святыма пророкама Енохом и Илиею претворяти в кровь море. и яже в нем изморити, яко же и во Египте сотворити. да быша вернии утвердилися, а невернии убоялися. Или егда Гог и Магог востанут на всю землю, и многия кровопролития будут по всей земли и мори, всем воям секущимся.
2-го толка.
Морем писание нарицает мир сей нань же изливается фиал Божия гнева. и бывает кровь бледа аки мертвелая, им же знаменает смерть на человеки посланную. кровию же зде князи неверныя и гонители церкви Божия, и мучители христианстии. А еже глаголет, всяка душа жива умре в мори, глаголет о тех, кои не прияша благовествования евангелия Христова. или и прия но во время гонителей, и страха мучителей отступиша.
Реки и источники водныя многажды писание наричет учение Господне, текущее от источника животнаго Господа нашего Исуса Христа, яко же сам рече, аще кто жаждет да придет ко мне и пиет воду живу. апостол же учителей ложных наричет, облаки безводныя. сии же реки и источницы суть еретическая учения, плотская мудрствующе: еже многажды сих и кровию наричет. А еже слыша евангелист ангела воднаго глаголюща, яко крови святых и пророк излияша. и кровь им дал еси пити достойни бо суть.
Пустыня есть отпущение злобы и истления в ню же вложишася святии и избраннии жития сего и избегнут, небрегуще ни о чем же или в пустыню горскую бежат, укрытися от антихристова лета три и пол лета: яко же и первии мученицы делаху.
Втораго толка.
И жена бежа в пустыню. церковь святая по вознесении Господа нашего Исуса Христа на небеса с воздыханием и слезами прибегаше к Богу, оставивши все вещи мира сего плотския идеже место уготовано, сиречь опочинение под силою крепости и хранения его.
Виждь убо и внимай: каково и се сокровище положенное населе святаго Апокалипсиса ибо писмены видимыми, сказано церкви укрыватися дней 1260. дней определиша на все время от лет Христовых даже до скончания мира, сия ей 1260 дней вся дни непрестанно бегати от лица змиева. сиречь от соборища еретическаго, ибо диавол умный змий и жрец душ человеческих непрестанно приемля своя сосуды. и сими гонит рабы Божия. в начале Иродом. потом Нероном и протчими, и соборищем июдейским. егда же мало отвоздохне церковь Христова при царе Константине, и погна ю диавол Арием и протчими сосуды своими. Македонием, Несторием и протчими. и испущаше скверныя на церковь Христову воды лживыми ересей, хотя ю потопити, но и ныне не спит, таяжде изблевает, и гонит, и покоя выну не дает. тем истинно есть слово и всякаго приятия достойно. яко дни церкви святыя бегания 1260. сие время от лет Христовых, кая приемлются образителне бывших. сицевых дней при Антиохе проявленном. тогда бо лютая зело 1260 дней, июдеи пострадаху. кия и зде дни вместо скорби дней на церковь гонения примлются. И зри убо: вси святии церковнии учители согласно проповедаша антихристову пришествию тогда быти, егда римская власть престанет. но в книге О вере нехрамлющий богослов именно описа. яко уже давно преста римская власть. и время антихристово в Риме от 1000-го лета наста.